1 Samuelu 24:1-22
24 Ua foʻi mai Saulo mai i le tuliloaga o Filisitia,+ ona latou taʻu atu lea iā te ia e faapea: “Faauta! O loo iai Tavita i le toafa o Enokati.”+
2 Ua ave e Saulo o tagata e toʻatolu afe na filifilia+ mai iā Isaraelu uma, ua ō atu e saʻili iā Tavita+ ma ona tagata i luga o papa e tataa ai ʻoti o le mauga.+
3 Ua oo atu o ia i le pā maa o le lotoā o mamoe i le ala na iai le ana. Ona ulu atu lea o Saulo e faaalu lona otaotavale,+ ae o loo nonofo Tavita ma ona tagata i le muliana.+
4 Ona fai mai lea o tagata o Tavita iā te ia: “O le aso lenei ua fetalai mai ai Ieova iā te oe, ‘Faauta! ua ou tuuina atu lou fili i lou lima,+ ma ia e faia iā te ia e tusa ma le mea ua e loto i ai.’”+ Ona tulaʻi lea o Tavita ma alu atu lemū, ua sesele ese le pito o le ofu tele o Saulo.
5 Mulimuli ane, ua tuia+ pea lava le loto o Tavita auā ua ia sesele ese le pito o le ofu tele o Saulo.
6 Ona ia fai atu lea i ona tagata: “Ia mamao mai iā te aʻu lenei mea i le silafaga a Ieova, ona ua ou faia lenei mea i loʻu alii ua faauuina+ e Ieova, ina ua faaoo atu loʻu lima iā te ia, o lē ua faauuina e Ieova.”+
7 Ua taofia e Tavita ona tagata i upu nei, e na te leʻi faatagaina i latou e faasagatau atu iā Saulo.+ A ua tulaʻi Saulo mai i le ana, ma alu atu i lona ala.
8 Mulimuli ane, ona tulaʻi lea o Tavita, ua alu i fafo mai i le ana ma valaau atu iā Saulo e faapea: “Loʻu alii e,+ le tupu!” Ua tepa mai Saulo i ona tua, ona faapaʻū lea o Tavita i le eleele+ ma ifo atu iā te ia.
9 Ona fai atu lea o Tavita iā Saulo: “Aiseā e te faafofoga ai fua i upu a tagata+ e faapea, ‘Faauta! o loo saʻili Tavita e faia se mea leaga iā te oe’?
10 O le aso lenei e pei ona e silasila i ai, ua tuuina mai ai oe e Ieova i loʻu lima i le ana; na fai mai foʻi se tasi ou te fasioti+ iā te oe, a ua ou alofa iā te oe ma ou fai atu i ai, ‘Ou te lē faaoo lava loʻu lima i loʻu alii, auā o ia o lē ua faauuina+ a Ieova.’
11 Loʻu tamā e,+ silasila mai foʻi i le pito o lou ofu tele o loo i loʻu lima, auā na ou sesele ese le pito o lou ofu tele ae ou te leʻi fasioti iā te oe. Ia e iloa ma ia e silafia, e leai se leaga+ o iā te aʻu pe ou te fouvale iā te oe, ou te leʻi agasala foʻi iā te oe, a ua e lamalama e faauma loʻu ola.+
12 Ia faamasino Ieova i lo taʻua va;+ ma ia taui+ atu e Ieova iā te oe ona o aʻu, ae e lē oo atu lava loʻu lima iā te oe.+
13 E pei ona fai mai o le muagagana i aso anamua, ‘E tupu mai le leaga i ē e amioleaga,’+ ae ou te lē faaoo lava loʻu lima iā te oe.
14 Po o ai ua maliu mai le tupu o Isaraelu e mulimuli i ai? Po o ai ua e tuliloaina? Po o aʻu ea o se taʻifau ua mate?+ Po o aʻu ea foʻi o se ʻutu fiti?+
15 Ia fai Ieova ma faamasino, e na te faamasino i lo taʻua va, e iloilo e ia le mea ua tupu, e tū+ foʻi o ia mo aʻu, e na te faamasinoina aʻu ma laveaʻi aʻu mai i lou lima.”
16 Ina ua uma ona tautala atu Tavita iā Saulo i nei upu, ona fai mai lea o Saulo: “O lou leo ea lea loʻu atalii e, Tavita?”+ Ona tagi ai lea o Saulo ma le leotele lava.+
17 Ua fai mai o ia iā Tavita: “Ua sili atu lou amiotonu nai lo o aʻu,+ auā ua e taui mai iā te aʻu i le lelei,+ ae ua ou taui atu iā te oe i le leaga.
18 Ua e faaali mai i le asō le mea lelei ua e faia iā te aʻu, ina ua tuuina atu aʻu e Ieova i lou lima,+ ae e te leʻi fasiotia aʻu.
19 O lenei, pe afai e maua e se tagata lona fili, pe e na te auina ese atu ea o ia ma le filemu?+ O lea, ia taui atu e Ieova iā te oe i le lelei,+ auā ua e faia le mea lelei iā te aʻu i le aso nei.
20 Faauta! ua ou iloa lelei lava e fai oe ma tupu,+ ma o le a faatumauina le malo o Isaraelu iā te oe.
21 Ia e tautō mai iā te aʻu i luma o Ieova,+ e te lē tafiesea laʻu fanau pe a mavae atu aʻu, e te lē tineia foʻi loʻu igoa i le aiga o loʻu tamā.”+
22 Ua tautō Tavita iā Saulo, ona alu ai lea o Saulo i lona fale.+ A ua ō aʻe Tavita ma ona tagata i le nofoaga e faigatā ona sao i ai se tasi.+
