1 Samuelu 27:1-12
27 A ua faapea ifo Tavita i lona loto: “O lenei, e iai lava se aso e tafiesea ai aʻu e Saulo. E leai la se mea e sili atu ona lelei mo aʻu, nai lo o loʻu sola+ atu i le nuu o Filisitia;+ ona lē toe saʻili lea o Saulo iā te aʻu i nuu uma o Isaraelu,+ ona ou sao ai lea mai i lona lima.”
2 Ua tulaʻi Tavita, ma ua latou ō ma tagata e toʻaono selau+ na iā te ia, iā Akisa+ le atalii o Maoka, le tupu o Kata.
3 Ua nonofo faatasi pea Tavita ma Akisa i Kata, o ia ma ona tagata, e taʻitasi ma lona aiga,+ o Tavita ma ana avā e toʻalua, o Ainoama+ le Isereelu, ma Apikaila+ le avā a Napalu le Karamelu.
4 Ona taʻu atu lea iā Saulo e faapea, ua sola atu Tavita i Kata, ona lē toe alu lea o ia e saʻili iā te ia.+
5 Ua fai atu Tavita iā Akisa: “Afai e te fiafia iā te aʻu, ia latou tuuina mai iā te aʻu se mea ou te nofo ai i se tasi o tamaʻi aai, ona ou nofo ai lea; aiseā e nofo ai fua lau auauna i le aai o le tupu faatasi ma oe?”
6 Ona tuuina atu lea e Akisa iā te ia o Sekeleka+ i lenā aso. O le mea lea ua fai ai le nuu o Sekeleka mo tupu o Iuta, e oo mai i le asō.
7 O aso uma na nofo ai Tavita i nuu maotua o Filisitia, o le tausaga ma masina e fā.+
8 Ua ō aʻe Tavita ma ona tagata ina ia o latou osofaʻia tagata Kasuri,+ o tagata Kisera, ma tagata Amaleka;+ auā ua latou nonofo i le nuu e amata mai i Telama+ e oo atu i Sura,+ ma alu ifo ai i le nuu o Aikupito.
9 Ua fasia e Tavita le nuu, ae e leʻi faasaoina e ia se tane po o se fafine;+ ua ia ave lafu mamoe ma povi, o asini ma kamela, ma ofu, ona ia toe foʻi atu lea iā Akisa.
10 Ona fai mai lea o Akisa: “O fea na outou osofaʻia i le asō?” Ua fai atu Tavita:+ “O le itu i saute o Iuta,+ o le itu i saute o le nuu o Ieramaelu,+ ma le itu i saute o le nuu o Keni.”+
11 Ae e leʻi faasaoina e Tavita se tane po o se fafine e aumai i Kata, auā ua faapea ane: “Neʻi o latou taʻuina atu i tatou e faapea, ‘O le mea lenei na faia e Tavita.’”+ (O le mea foʻi lenei o le a ia faia i aso uma e nofo ai o ia i le nuu o Filisitia.)
12 Ua talitonu+ Akisa iā Tavita, ua faapea ifo iā te ia: “Ua matuā inosia o ia e lona nuu o Isaraelu;+ ma e fai o ia ma aʻu auauna i aso uma lava.”
