1 Samuelu 29:1-11
29 Ua faapotopoto faatasi e Filisitia+ a latou ʻautau uma i Afeka, a ua tolauapi Isaraelu i le vaipuna i Isereelu.+
2 Ua ō ane alii ua pule faatasi+ o Filisitia i taʻitoʻaselau ma taʻitoʻaafe, a ua mulimuli atu Tavita ma ona tagata faatasi ma Akisa.+
3 Ua fai mai perenise o Filisitia: “Aiseā ua iai ai i inei nei tagata Eperu?”+ Ona fai atu lea o Akisa i perenise o Filisitia: “Pe e lē o Tavita ea lenei le auauna a Saulo le tupu o Isaraelu, o lē na ma faatasi i le tausaga e tasi pe lua+ foʻi, ua ou lē maua+ iā te ia se mea e tasi mai i le aso na sola mai ai iā te aʻu e oo mai i le asō?”
4 Ona feita ai lea o perenise o Filisitia iā te ia; ua fai mai perenise o Filisitia iā te ia: “Ia e fai atu i le tagata e toe foʻi+ i le mea na e tofia iā te ia e nofo ai; aua neʻi o tatou ō ifo faatasi ma ia i le taua, ina neʻi faasagatau+ mai o ia iā i tatou i le taua. Ma o le ā se mea e faalelei ai lenei tagata ma lona alii? Pe e lē o ulu ea o o tatou tagata?
5 Pe e lē o Tavita ea lea na latou pepese fetaliaʻi ai i siva, ma faapea atu: ‘Ua fasia e Saulo le faitau afe, a o Tavita e faitau sefulu afe’?”+
6 Ona valaau atu lea o Akisa+ iā Tavita ma faapea atu iā te ia: “O loo soifua Ieova,+ ua e amio saʻo, ua lelei+ foʻi iā te aʻu lo ta auauna faatasi+ i le taua; auā ua ou lē maua lava se mea leaga iā te oe mai i le aso na e auauna ai e oo mai i le asō.+ Ae e lē o fiafia alii ua pule faatasi+ o Filisitia iā te oe.
7 O lenei, inā toe foʻi ia ma e alu ma le filemu, ina neʻi e faia se mea leaga i luma o alii ua pule faatasi o Filisitia.”
8 A ua fai mai Tavita iā Akisa: “Aiseā? O le ā se mea ua ou faia?+ O le ā foʻi se mea ua e silafia i lau auauna mai i le aso na ou iai i ou luma e oo mai i le asō,+ o le a ou lē alu atu ai ma tau ma fili o loʻu alii le tupu?”
9 Ua tali atu Akisa, ua faapea atu iā Tavita: “Ua ou iloa sa e lelei, e pei o se agelu a le Atua.+ Ae e na o perenise o Filisitia ua latou fai mai, ‘Aua neʻi o tatou ō aʻe faatasi ma ia i le taua.’
10 O lenei, ia e tulaʻi i le taeaopō ma auauna a lou alii na outou ō mai faatasi; ia outou usu i le taeaopō pe a malamalama. Ona outou ō ai lea.”+
11 Ua vave tulaʻi Tavita, o ia ma ona tagata, ua ō i le taeao+ ma toe foʻi atu i le nuu o Filisitia; a ua ō aʻe Filisitia i Isereelu.+
