1 Samuelu 4:1-22
4 Ua faaoo atu pea e Samuelu le upu i Isaraelu uma.
Ona ō atu lea o Isaraelu e faafetaiaʻi iā Filisitia i le taua; ua latou tolauapi i tafatafa o Epenesa,+ a o Filisitia ua tolauapi i Afeka.+
2 Ua faapotopoto faatasi+ Filisitia e faafetaiaʻi Isaraelu, ua mataʻutia le taua ma ua faatoʻilaloina ai Isaraelu i luma o Filisitia,+ o ē na fasiotia tagata pe tusa e toʻafā afe ina ua fetinaʻi ʻau o le taua a o iai i le tafā.
3 Ina ua toe foʻi fitafita i le togālauapi, ona fai ane lea o toeaina o Isaraelu: “Aiseā ua faatoʻilaloina ai i tatou e Ieova i luma o Filisitia i le asō?+ Seʻi o tatou ō ma ave le atolaau o le feagaiga a Ieova+ mai i Sailo, ina ia aumai iā i tatou ma faaolaina ai i tatou mai i lima o o tatou fili.”
4 Ua aauina atu e le nuu o tagata i Sailo ma aumai ai le atolaau o le feagaiga a Ieova o ʻau, o lē o loo afio i luga o kerupi.+ Na iai foʻi atalii e toʻalua o Eli o Hofeni ma Fineaso,+ e faatasi ma le atolaau o le feagaiga a le Atua moni.
5 Ina ua oo mai le atolaau o le feagaiga a Ieova i le togālauapi, ona alalaga leotetele+ ai lea o Isaraelu uma, ma ua galulu ai le laueleele.
6 Ua faalogo foʻi Filisitia i le leo o le alaga, ona fai ane lea: “O le ā ea le uiga o le leo o le alaga tele+ i le togālauapi o tagata Eperu?” Mulimuli ane, ua latou iloa ai ua aumai le atolaau a Ieova i le togālauapi.
7 Ona fefefe ai lea o Filisitia, auā ua latou faapea ane: “Ua oo mai le Atua i le togālauapi!”+ Ona latou fai ane lea: “Oi talofa iā i tatou, auā e leʻi iai lava se mea faapenei na tupu muamua!
8 Oi talofa iā i tatou! O ai ea e na te faaolaina i tatou mai i lima o lenei Atua mamalu? O le Atua lenei na ia fasia Aikupito i fasiga eseese uma i le toafa.+
9 O outou Filisitia e, inā lototetele ia ma ia faatamatane, ina ia outou lē auauna i tagata Eperu e pei ona latou auauna iā te outou;+ ia outou faatamatane ma ia outou tau!”
10 Ona tau lea o Filisitia ma ua toʻilalo ai Isaraelu,+ ua taʻitasi le tagata ma sola i lona faleʻie;+ na matuā tele lava le fasi,+ lea na fasiotia ai tagata Isaraelu e toʻatolu sefulu afe o le ʻautau e savavali.+
11 Ua faoa ai le atolaau a le Atua,+ ma ua feoti ai atalii e toʻalua o Eli, o Hofeni ma Fineaso.+
12 Ua momoʻe mai le tagata Peniamina mai i le taua ma taunuu i Sailo i lenā aso, ua saeia+ ona ofu ma le eleele i luga o lona ulu.+
13 E taunuu mai o ia, a o nofo Eli i le nofoa i tafatafa o le auala, o loo vaavaai atu auā ua gatete lona loto ona o le atolaau a le Atua moni.+ Ua sau le tagata i le aai ma faamatala mai le tala, ona fetagisi ai lea o le aai atoa.
14 Ua faalogo foʻi Eli i le leo o le fetagisi. Ona fai atu lea o ia: “O le ā ea le uiga o lenei vāvāō?”+ Ona faatopetope mai lea o le tagata ina ia sau e faamatala mai iā Eli.
15 (A o Eli, ua iva sefulu valu ona tausaga, ua pō lana vaai, ma ua lē iloa se mea.)+
16 Ua fai mai le tagata iā Eli: “Ou te sau mai i le taua, na ou sola mai i le taua i le aso nei.” Ona fai atu lea o ia: “Loʻu atalii e, o le ā ea le mea ua tupu?”
17 Ona tali mai lea o le tagata na sau ma le tala, ua faapea mai: “Ua sosola Isaraelu i luma o Filisitia, ua matuā toʻilalo foʻi le nuu;+ ua feoti foʻi ou atalii e toʻalua, o Hofeni ma Fineaso,+ ma ua faoa le atolaau a le Atua moni.”+
18 Ina ua ia taʻua le atolaau a le Atua moni, ona paʻū ai lea o ia i tua mai i luga o le nofoa i tafatafa o le faitotoʻa, ua gau lona ua ma ua oti ai, auā ua toeaina o ia ma e mamafa foʻi; e fā sefulu tausaga na ia faamasino ai iā Isaraelu.
19 A o le avā a lona atalii o Fineaso, sa tō o ia ma ua toeitiiti fanau, ua faalogo o ia i le tala e faapea ua faoa le atolaau a le Atua moni, ua oti le tamā o lana tane faapea ma lana tane. Ona tootuli lea o ia ma ua fanau, auā ua faafuaseʻi ona faatigā o ia.+
20 Ua oo ina a oti o ia, a ua fai mai fafine na tutū i ona tafatafa: “Aua e te fefe, ua e fanauina se tama tama.”+ A ua lē tali atu o ia, ma ua lē manatu foʻi i ai.
21 Ua ia faaigoa le tama iā Ikapoti,+ ua faapea ane: “Ua aveesea le mamalu mai iā Isaraelu i le nuu na ave faapagota i ai,”+ ua faasino lenei mea i le atolaau a le Atua moni lea ua faoa, ua faasino atu foʻi i le tamā o lana tane, ma lana tane.+
22 Ua faapea ane o ia: “Ua aveesea le mamalu mai iā Isaraelu i le nuu na ave faapagota i ai,+ auā ua faoa le atolaau a le Atua moni.”+
