1 Samuelu 6:1-21
6 Sa iai le atolaau+ a Ieova i le nuu o Filisitia i masina e fitu.
2 Ua aami e Filisitia o ositaulaga ma faataulāitu,+ ua faapea atu: “O le ā se mea e matou te faia i le atolaau a Ieova? Inā taʻu mai ia iā i matou, pe faapefea ona matou auina ese atu le atolaau i lona nuu.”
3 Ona latou faapea mai lea: “Afai e tou te auina ese atu le atolaau a le Atua o Isaraelu, aua neʻi outou auina ese atu e aunoa ma se taulaga, e tatau foʻi ona outou toe faafoʻi atu faatasi ma se taulaga o le nofosala.+ Ona faamālōlōina ai lea o outou, e tou te iloa ai foʻi le māfuaaga ua lē teʻa ese ai lona aao iā te outou.”
4 Ona latou fai atu lea: “O le ā le taulaga o le nofosala e matou te toe faafoʻi atu iā te ia?” Ua latou fai mai: “E tusa ma le aofaʻi o alii ua pule faatasi+ o Filisitia, ia outou avatu silailalo auro e lima ma imoa* auro e lima, auā o outou taʻitoʻatasi ma o outou alii ua pule faatasi, ua aofia ai i lenei mala.
5 Ia outou faia foʻi ni faatusa o o outou silailalo ma ni faatusa o o outou imoa+ ua faatamaʻiaina ai le nuu, ma ia outou faamamaluina+ le Atua o Isaraelu. Atonu e na te faamāmā ai lona aao iā te outou, ma lo outou atua, ma lo outou laueleele.+
6 Aiseā foʻi e faamaaa ai o outou loto e pei ona faamaaa e Aikupito ma Farao o o latou loto?+ Pe e latou te leʻi tuuina atu ea i latou e ō, ona latou ō ai lea,+ ina ua Ia faasalaina i latou?+
7 O lenei, inā ave ia ma fai se taavale toso fou,+ ma ni povi fafine se lua o loo fesusui a la tama, e leʻi faaeeina i ai se avega,+ ia outou nonoa povi i le taavale toso, ae ia toe faafoʻi a la tama i le falepovi.
8 Ia outou ave foʻi le atolaau a Ieova ma tuu i luga o le taavale toso, ma ia outou tuu i totonu o se pusa i tafatafa o le atolaau, o mea ua faia i le auro+ e toe faafoʻi iā te ia o se taulaga o le nofosala.+ Ona outou auina ese atu lea, ma tuu atu e alu.
9 Ia outou vaavaai: afai e alu aʻe le atolaau i le ala o lona nuu o Petesemesa,+ o ia lava na faaoo maia lenei malaia tele; ae afai e leai, ua tatou iloa ai e leʻi paʻi mai lona aao iā i tatou; ae o se faalavelave faafuaseʻi+ na tupu iā i tatou.”
10 Ona faapea lava lea ona faia e tagata. Ua latou ave povi fafine e lua o loo fesusui a la tama, ma nonoa i le taavale toso, a ua loka a la tama i le falepovi.
11 Ona latou tuu lea o le atolaau a Ieova i luga o le taavale toso,+ atoa ma le pusa, o imoa auro, ma faatusa o o latou silailalo.
12 Ua ō atu saʻo povi i le auala i Petesemesa.+ Ua ō atu i se tasi o ala tele, ua fetagisi, ma e leʻi liliu lava i le itu taumatau po o le itu tauagavale. O loo mulimuli atu i o la tua alii ua pule faatasi+ o Filisitia, o loo savavali e oo atu i tuaoi o Petesemesa.
13 O loo faia e tagata Petesemesa le seleselega o saito+ i le fanua laugatasi. Ina ua latou tetepa aʻe ma iloa ai le atolaau, ona latou matuā olioli ai lea.
14 Ua oo le taavale toso i le fanua o Iosua le Petesemesa ma tū ai pea i inā, i le mea sa iai le maa tele. Ona latou taisi lea o laau o le taavale toso, ma o latou ofoina atu povi+ o se taulaga mū iā Ieova.+
15 Ona ave ifo lea e sa Levī+ o le atolaau a Ieova ma le pusa sa iai, lea na iai mea na faia i auro, ma latou tuuina i luga o le maa tele. Ona ofoina atu lea e tagata Petesemesa+ o taulaga mū, ma ua faaauau ona latou faia taulaga iā Ieova i lenā aso.
16 Ua iloa atu e alii e toʻalima ua pule faatasi+ o Filisitia lenei mea, ona latou toe foʻi ai lea i lo latou ala i Ekerona i lenā aso.
17 O silailalo auro nei na avatu e Filisitia o se taulaga o le nofosala iā Ieova:+ o le tasi mo Asetota,+ o le tasi mo Kasa,+ o le tasi mo Asekelona,+ o le tasi mo Kata,+ ma le tasi mo Ekerona.+
18 O imoa auro foʻi e tusa ma le aofaʻi o aai uma o Filisitia, o aai o alii e toʻalima ua pule faatasi, e amata mai i le aai malupuipuia e oo atu i nuu maotua.
O le maa tele lea na tuu ai i luga le atolaau a Ieova, ua fai ma molimau e oo mai i le asō i le fanua o Iosua le Petesemesa.
19 Ona fasia lea e ia o tagata Petesemesa,+ auā ua latou vaavaai i le atolaau a Ieova. Ua ia fasiotia foʻi i le nuu o tagata e toʻafitu sefulu, o tagata e toʻalima sefulu afe, ona faavauvau ai lea o le nuu auā ua matuā toʻatele lava tagata ua fasiotia e Ieova.+
20 Ua faapea ane tagata Petesemesa: “O ai e mafai ona tū atu i luma o lenei Atua paia o Ieova,+ o ai foʻi e na te ave aʻe mai iā i tatou?”+
21 Mulimuli ane, ona latou aauina atu lea o ni avefeʻau i ē o nonofo i Kiriata-iarima,+ ua faapea atu: “Ua faafoʻi mai e Filisitia le atolaau a Ieova. Inā ō mai ia, ma avatu iā te outou.”+
Faamatalaga Pito i Lalo
^ O se ituaiga o isumu e osooso.
