1 Samuelu 9:1-27
9 Sa iai se tagata o Peniamina, o lona igoa o Kiso,+ o le atalii o Apielu, o le atalii o Seroro, o le atalii o Pekuro, o le atalii o Afia, e mai i le ituaiga o Peniamina,+ e matuā mauʻoa+ lava o ia.
2 E iai sona atalii e igoa iā Saulo,+ e talavou ma e aulelei, e leai foʻi se tane o le fanauga a Isaraelu e sili atu lona aulelei i lo o ia; ma e sili atu lona umī i tagata uma e gata ifo i ona tauʻau.+
3 Ua leiloloa asini fafine+ a Kiso le tamā o Saulo. Ona fai mai lea o Kiso i lona atalii o Saulo: “Faamolemole, inā tulaʻi ia, ma ave se tasi o auauna, ia lua ō e suʻe i asini.”
4 Ona ia ui atu lea i vaega maugā o Efaraima+ ma ui atu ai i le nuu o Salisa,+ ae la te leʻi maua. Ona toe ui atu lea i le nuu o Saali ae e leʻi iai i inā. Ona ui atu lea i le nuu o tagata Peniamina, ae la te leʻi maua ai lava.
5 Ua la oo i le nuu o Sufi; ona fai atu lea o Saulo i lana auauna na la ō: “Inā sau ia seʻi o ta toe foʻi, ina neʻi uma le popole o loʻu tamā i asini na leiloloa, ae popole iā i taʻua.”+
6 A ua ia fai mai: “Faauta! E iai le tagata o le Atua+ o loo i lenei aai, o se tagata e faaaloalogia. O upu uma e fai mai ai o ia, e taunuu lava.+ Seʻi ta ō i ai i le taimi nei. Atonu e na te taʻu maia le ala e ta te ō ai.”
7 Ona fai atu lea o Saulo i lana auauna: “Afai o le a ta ō, o le ā se mea ta te avatu i le tagata?+ auā ua uma falaoa i a ta ato, ma e leai foʻi se mea e ta te avatu e fai ma meaalofa+ i le tagata o le Atua moni. O le ā se mea ua iā i taʻua?”
8 Ona toe tali mai lea o le auauna iā Saulo, ua faapea mai: “Faauta! Ua i loʻu lima le kuata o sekeli+ siliva, ou te avatua i le tagata o le Atua moni, ma e na te taʻuina mai ai iā i taʻua lo ta ala.”
9 (Auā o le auala lenā e tautala ai le tagata i aso anamua i Isaraelu e alu atu e saʻili i le Atua, e faapea: “Seʻi o tatou ō atu e vaai le tagata e iloa faaaliga.”+ Auā o le perofeta i aso nei, e masani ona taʻua i aso anamua o le tagata e iloa faaaliga.)
10 Ua fai atu Saulo i lana auauna: “E manaia lau tonu.+ Sau loa ta ō.” Ona la ō lea i le aai i le mea o iai le tagata o le Atua moni.
11 A o la ō aʻe i le aʻega i le aai, ua latou fetaui ai ma teine o loo ō atu e utu vai.+ Ua la fai atu iā i latou: “Po o iai le tagata e iloa faaaliga+ i lenei nuu?”
12 Ona latou tali mai lea iā i laʻua e faapea: “O la e iai. Faauta! O loo muamua atu iā te oulua. Inā vave ia, auā ua sau o ia i lenei aso i le aai, e fai le taulaga+ i le aso nei mo le nuu i le mea maualuga.+
13 E te lua oo loa i le aai, ona oulua maua ai lea o ia ae e leʻi alu aʻe i le mea maualuga e ʻai ai; auā e lē mafai ona aai o le nuu seʻia taunuu atu o ia, auā o ia e na te faamanuiaina le taulaga.+ A uma lea, ona aai lea o i latou na valaaulia. O lenei, ina ō aʻe ia, auā e te lua maua atu lava o ia.”
14 Ua ō aʻe i laʻua i le aai. A o la ō atu i le ogatotonu o le aai, vaai! o loo sau Samuelu e faafetaiaʻi i laʻua e ō aʻe i le mea maualuga.
15 A ua taʻu atu e Ieova i taliga+ o Samuelu i le aso na muamua atu a o leʻi alu atu Saulo, ua fetalai atu:
16 “O a taeao i le taimi faapenei, ou te auina atu ai iā te oe se tagata mai i le nuu o Peniamina,+ ia e faauu+ o ia e avea ma taʻitaʻi o loʻu nuu o Isaraelu; e faaola e ia loʻu nuu mai i lima o Filisitia,+ auā ua ou vaai atu i le puapuaga o loʻu nuu, ma ua oo mai foʻi la latou alaga iā te aʻu.”+
17 Ua vaai atu Samuelu iā Saulo, ma ua fetalai atu Ieova iā te ia: “O le tagata lenei na ou fai atu ai iā te oe, ‘O ia lenei e na te puleaina loʻu nuu.’”+
18 Ona alu atu lea o Saulo iā Samuelu i le ogatotonu o le faitotoʻa, ua fai atu: “Faamolemole, seʻi e taʻu mai iā te aʻu po o fea o iai le fale o le tagata e iloa faaaliga?”
19 Ua tali mai Samuelu iā Saulo, ua faapea mai: “O aʻu le tagata e iloa faaaliga. Inā muamua aʻe ia iā te aʻu i le mea maualuga, ina ia tatou aai faatasi i le asō,+ ona ou auina ese atu lea o oe i le taeao, ou te faailoa atu foʻi iā te oe mea uma o i lou loto.+
20 A o au asini na leiloloa i le tolu aso ua mavae,+ aua neʻi e manatu+ i ai auā ua maua. O ai foʻi e ana mea tāua uma ua i Isaraelu?+ Pe e lē o oe ea ma le aiga atoa o lou tamā?”
21 Ona tali atu lea o Saulo: “Pe e lē o aʻu ea e mai i le ituaiga o Peniamina, e aupito i itiiti+ o ituaiga o Isaraelu,+ o loʻu aiga foʻi e aupito i faatauvaa i aiga uma o le ituaiga o Peniamina?+ Aiseā ea ua e saunoa mai ai faapena iā te aʻu?”+
22 Ona ave lea e Samuelu o Saulo ma lana auauna i le fale e aai ai, ma faanonofo i laʻua i nofoaga sili+ o i latou na valaaulia; e tusa ma le toʻatolu sefulu tane.
23 Ona fai atu lea o Samuelu i le tagata kuka: “Ia aumai le tufaaga na ou avatu iā te oe, lea na ou fai atu ai iā te oe, ‘Ia tuu ese.’”
24 Ona ave aʻe lea e le tagata kuka o le alagavae, ma laulau atu i luma o Saulo. Ua faapea mai o ia: “O le mea lenei na tuu ese mo oe. Inā tuu ia i ou luma. Inā taumafa ia, auā ua latou teua mo oe mo lenei aso ina ia tou aai faatasi ai ma ē ua valaaulia.” Ona aai faatasi ai lea o Saulo ma Samuelu i lenā aso.
25 Mulimuli ane, ona latou ō ifo lea i lalo mai i le mea maualuga+ i le aai, a ua talanoa atu pea o ia iā Saulo i luga o le fale.+
26 Ua latou fealapō, ua oo i le tafa o ata, ona valaau atu lea o Samuelu iā Saulo i luga o le fale, e faapea: “Inā tulaʻi ia, ina ia ou auina ese atu oe.” Ona tulaʻi lea o Saulo, ua la ō i fafo ma Samuelu.
27 A o latou ō ifo i le pito o le aai, ona fai mai lea o Samuelu iā Saulo: “Ia e fai atu i le auauna+ e muamua atu iā i taʻua (ona muamua atu lea o ia). A o oe, ia e tū mai seʻi e faalogologo i le afioga a le Atua.”
