1 Tesalonia 4:1-18
4 O le toe upu lenei le ʻauuso e, matou te talosaga ma apoapoaʻi atu iā te outou e ala i le Alii o Iesu, e pei ona outou maua le faatonuga mai iā i matou i le auala e ao ona outou savavali+ ai ma faafiafia ai le Atua, ma o loo outou savavali faapena, ae ia saga savavali ai pea i lenā auala.+
2 Auā ua outou iloa poloaʻiga+ na matou tuuina atu iā te outou e ala i le pule a le Alii o Iesu.
3 Auā o le finagalo lenei o le Atua ina ia faapaiaina outou,+ ia faamamao mai i le faia o le faitaaga,*+
4 ma ia taʻitasi outou ona iloa pulea o lona lava tino*+ ina ia paia+ ma mamalu,
5 ae e lē o le tuʻinanau o le manaʻo tele i feusuaʻiga+ e pei ona masani ai nuu+ o ē e lē iloa le Atua;+
6 ina neʻi iʻu ina faaleagaina ma solia ai e se tasi ia aiā tatau a lona uso e tusa ma lenei mea,+ auā o Ieova o lē na te tuuina atu le faasalaga o nei mea uma,+ e pei ona matou muaʻi taʻu atu ma faamatala māeʻaeʻa atu iā te outou.+
7 Auā ua valaauina i tatou e le Atua, e lē ina ia faia amioga lē mamā, ae ina ia paia.+
8 O lea, o le tagata e manatu māmā+ i lenei mea, e lē o tagata o loo manatu māmā i ai a o le Atua,+ o lē na te foaʻi mai lona agaga paia+ iā te outou.
9 Ae peitaʻi, e lē tatau ona matou tusi atu iā te outou e faatatau i le alofa faaleuso,+ auā ua aʻoaʻoina outou e le Atua+ ina ia alofa o le tasi i le isi;+
10 ma o le mea moni, o loo outou faia lenei mea i uso uma i Maketonia atoa. Ae peitaʻi, e matou te apoapoaʻi atu iā te outou le ʻauuso e, ina ia atoatoa ona faia o lea mea,
11 ma ia fai ma o outou sini le ola i se olaga toʻafimālie,+ ma aua le isuisu fua i mea a isi,+ a ia galulue i o outou lava lima,+ e pei ona matou poloaʻi atu ai iā te outou;
12 ina ia outou savavali ma le amiolelei+ i luma o ē o i tua*+ ma ia lē matitiva i se mea e tasi.+
13 E lē gata i lea, le ʻauuso e, e matou te mananaʻo foʻi ina ia outou malamalama e uiga i ē ua momoe i le oti,+ ina neʻi faavauvau outou e pei o isi o ē e leai so latou faamoemoe.+
14 Auā afai tatou te talitonu na maliu Iesu ma toetū mai,+ e faapena foʻi i latou o ē ua momoe i le oti a o autasi ma Iesu, e toe faaolaina i latou faatasi ma ia e le Atua.+
15 O le mea lenei matou te fai atu iā te outou mai i le afioga a Ieova,+ o i tatou o loo ola ma sao atu i le faatasi mai o le Alii,+ e lē muamua i tatou iā i latou o ē ua momoe i le oti;
16 auā e afio ifo le Alii lava ia mai i le lagi+ ma le alaga ma le leo o le agelu sili,+ ma le pū+ a le Atua, e muamua foʻi ona toe tutū mai i latou ua feoti o ē e autasi ma Keriso.+
17 Mulimuli ane, ona aveina aʻe+ lea o i tatou o loo ola ma totoe, faatasi ma i latou+ i ao+ ina ia feiloaʻi+ ma le Alii i le ʻea; ma o le a tatou nonofo pea faatasi ma le Alii.+
18 O lea la, ia outou fefaamāfanafanaaʻi i nei upu.
Faamatalaga Pito i Lalo
^ Tagaʻi i le Faaopoopoga e 8.
^ Po o le “ipu.”
^ Po o “i latou e lē o i totonu o le faapotopotoga Kerisiano.”
