1 Tupu 12:1-33
12 Ua alu atu Reopoamo+ i Sekema, auā na ō mai tagata Isaraelu uma i Sekema+ e fai o ia ma tupu.
2 Ina ua faalogo i ai Ierepoamo+ le atalii o Nepata i lea mea a o iai o ia i Aikupito, (auā na sola ese o ia ona o le Tupu o Solomona, na nofo foʻi Ierepoamo i Aikupito),+
3 ona latou aauina atu lea o nisi e aami iā te ia. Mulimuli ane, ona ō mai lea o Ierepoamo ma le faapotopotoga uma o Isaraelu, ua fai mai iā Reopoamo e faapea:+
4 “Na faamamafa e lou tamā a matou amo, a o lenei, ia e faamāmā+ le galuega faigatā a lou tamā ma lana amo mamafa+ na ia faaee mai iā i matou, ona matou auauna atu ai lea iā te oe.”+
5 Ona ia fai atu lea iā i latou: “Inā ō ia, ma ia outou toe foʻi mai iā te aʻu pe a mavae aso e tolu.”+ Ona ō ai lea o le nuu.
6 Ona talatalanoa lea o le Tupu o Reopoamo faatasi ma toeaina,+ o ē na avea ma faufautua iā Solomona lona tamā a o ola o ia, ua faapea atu: “O le ā sa outou fautuaga e tali atu ai i lenei nuu?”+
7 Ona latou fai mai lea iā te ia, e faapea: “O le aso nei, afai e fai oe ma auauna i lenei nuu, ma e auauna lava iā i latou,+ ia e tali atu foʻi iā i latou ma tautala atu i upu lelei;+ ona latou auauna ai pea lea iā te oe.”+
8 Ae peitaʻi, ua ia tuua le fautuaga a toeaina o ē na fautua iā te ia, a ua ia talatalanoa ma tauleleʻa na ola aʻe faatasi ma ia,+ o ē na avea ma ana faufautua.+
9 Ona ia fai atu lea iā i latou: “O le ā sa outou fautuaga+ e tatou te tali atu ai i lenei nuu, o ē na faapea mai iā te aʻu, ‘Ia faamāmā le avega a lou tamā na faaee mai iā i matou’?”+
10 Ona fai mai lea o tauleleʻa na ola aʻe faatasi ma ia, e faapea: “Ia faapea ona e fai atu+ i lenei nuu o ē na fai mai iā te oe, e faapea, ‘Na faamamafa e lou tamā a matou avega, a o lenei, ia faamāmā iā i matou’; ia faapea foʻi ona e fetalai atu iā i latou, ‘O le a sili atu ona mamafa le avega ou te tuu atu iā te outou nai lo o loʻu tamā.*+
11 O lenei, na faaee atu e loʻu tamā iā te outou se avega mamafa; a o aʻu, ou te faaopoopo atu la outou avega iā te outou.+ Na aʻoaʻi outou e loʻu tamā i sasa, a o aʻu, ou te aʻoaʻi outou i sasa matuitui.’”+
12 Ona ō mai lea o Ierepoamo ma le nuu uma iā Reopoamo i le aso lona tolu, e pei ona fai mai ai le tupu, e faapea: “Ia outou toe foʻi mai iā te aʻu i le aso lona tolu.”+
13 Ona tali atu lea o le tupu i le nuu ma le sauā,+ ma ua ia tuua le fautuaga a toeaina o ē na faufautua atu iā te ia.+
14 Ua ia tautala atu iā i latou e tusa ai ma fautuaga a tauleleʻa,+ ua faapea atu: “Na faamamafa e loʻu tamā a outou avega, a o lenei, ou te faaopoopo atu i la outou avega. Na aʻoaʻi outou e loʻu tamā i sasa, a o aʻu, ou te aʻoaʻi outou i sasa matuitui.”+
15 E leʻi faalogo le tupu i le nuu,+ auā o lenei mea e mai iā Ieova,+ ina ia faataunuu ai e ia o lana afioga+ na fetalai mai ai Ieova e ala iā Akia+ le tagata Sailo, e fai atu iā Ierepoamo le atalii o Nepata.
16 Ina ua iloa e Isaraelu uma e leʻi faalogo le tupu iā i latou, ona tali atu lea o le nuu i le tupu, ua faapea atu: “Pe e iai ea so matou tofi mai iā Tavita?+ E leai so matou tofi mai i le atalii o Iese. Isaraelu e, inā foʻi atu ia i ou atua.+ Tavita e,+ faitalia oe ma lou aiga!” Ona ō ai lea o Isaraelu i o latou faleʻie.
17 A ua pule pea Reopoamo i le fanauga a Isaraelu, o ē o loo nonofo i aai o Iuta.+
18 Mulimuli ane, ua auina atu e le Tupu o Reopoamo o Aturamo,+ o lē na vaavaaia o ē na aumai e faia galuega mamafa,+ a ua fetogia o ia i maa+ e Isaraelu uma, ona oti ai lea o ia. Ona tulaʻi lea o le Tupu o Reopoamo ua alu i lana kariota, ua sola atu i Ierusalema.
19 Ua faaauau pea ona fouvale+ tagata Isaraelu i le aiga o Tavita e oo mai i aso nei.+
20 Ina ua faalogo Isaraelu uma ua toe foʻi mai Ierepoamo, ona latou aauina atu lea o nisi e aami iā te ia i le faapotopotoga, ma fai o ia ma tupu iā Isaraelu uma.+ E leai foʻi se tasi na mulimuli i le aiga o Tavita, e na o le ituaiga o Iuta.+
21 Ina ua taunuu Reopoamo i Ierusalema,+ ona ia faapotopoto loa lea o le aiga uma o Iuta ma le ituaiga o Peniamina,+ e toʻaselau valu sefulu afe tagata filifilia o ē e faia taua, ina ia tau ma le aiga o Isaraelu, ina ia toe faafoʻi mai le tofi o le tupu iā Reopoamo le atalii o Solomona.
22 Ua tulei mai le afioga a le Atua moni iā Semaia+ le tagata o le Atua moni,+ ua faapea mai:
23 “Ia fai atu iā Reopoamo le atalii o Solomona le tupu o Iuta, ma le aiga uma o Iuta ma Peniamina, faapea le nuu uma,
24 ‘O le mea lenei na fetalai mai ai Ieova: “Aua tou te ō aʻe e tau ma o outou uso, o le fanauga a Isaraelu.+ Ia taʻitasi ma foʻi atu i lona fale, auā e mai iā te aʻu lenei mea.”’”+ Ona latou usiusitaʻi ai lea i le afioga a Ieova,+ ua toe foʻi atu i o latou fale e tusa ma le afioga a Ieova.+
25 Ona fausia lea e Ierepoamo o Sekema+ i le vaega maugā o Efaraima ma nofo ai. Ua alu atu foʻi o ia mai i inā ma fausia Penueli.+
26 Ua faapea ifo Ierepoamo i lona loto:+ “A nei e toe foʻi atu le malo i le aiga o Tavita.+
27 Afai e faaauau pea ona ō aʻe lenei nuu e fai taulaga i le fale o Ieova i Ierusalema,+ ona liliu lea o loto o lenei nuu e toe foʻi atu i lo latou alii o Reopoamo le tupu o Iuta; ona latou fasiotia lea o aʻu,+ ae toe foʻi atu iā Reopoamo le tupu o Iuta.”
28 Mulimuli ane, ona filifili+ lea o le tupu ma faia ni tamaʻi povi poʻa auro se lua,+ ua faapea atu i le nuu: “E faigatā tele mo outou ona ō aʻe i Ierusalema. Isaraelu e, o lo outou Atua+ lenei na aveina aʻe outou mai i le nuu o Aikupito.”+
29 Ona ia tuu lea o le tasi i Peteli,+ ae tuu le isi i Tanu.+
30 Na avea lenei mea ma agasala,+ ma ua ō atu foʻi le nuu e tutū i luma o le tamaʻi povi i Tanu.
31 Ua ia faia se fale mo mea maualuluga,+ ma faia foʻi tagata lautele o ē e lē o le fanauga a Levi, e avea ma ositaulaga.+
32 Ua faia e Ierepoamo o le tausamiga i le masina lona valu i le aso lona sefulu lima o le masina, e pei o le tausamiga sa faia i Iuta,+ ua ia faia ai o taulaga i luga o le fata faitaulaga na ia faia i Peteli,+ e fai ai taulaga i tamaʻi povi poʻa na ia faia; ua ia tofia foʻi ositaulaga o mea maualuluga na ia faia i Peteli.
33 Ua ia faia foʻi taulaga i luga o le fata faitaulaga na ia faia i Peteli, i le aso sefulu lima o le masina lona valu, i le masina na ia filifilia i lona loto;+ na ia faia foʻi se tausamiga mo le fanauga a Isaraelu, ma faia taulaga i luga o le fata faitaulaga e faamū ai taulaga.+
Faamatalaga Pito i Lalo
^ I le gagana Eperu, “e sili atu ona mafiafia loʻu tamatamaʻilima, nai lo o suilapalapa o loʻu tamā.”
