1 Tupu 13:1-34
13 Ua sau le tagata+ o le Atua mai i Iuta i Peteli ona o le afioga+ a Ieova, a o tū Ierepoamo i tafatafa o le fata faitaulaga+ e faamū ai le taulaga.+
2 Ona ia valaau atu lea i le fata faitaulaga ona o le afioga a Ieova, ua faapea atu: “Le fata faitaulaga e, le fata faitaulaga e, o le mea lenei ua fetalai mai ai Ieova, ‘Faauta! O le a fanau mai se tama tama e igoa iā Iosia+ i le aiga o Tavita! E na te faia taulaga i ou luga i ositaulaga o mea maualuluga, o ē e faamūina taulaga i ou luga, e na te susunuina foʻi i ou luga o ponaivi o tagata.’”+
3 Ua faia e ia le vavega+ i lenā aso, ua faapea atu: “O le vavega lenei na fetalai i ai Ieova: Faauta! E vaeluaina le fata faitaulaga, ona masaa mai ai lea i fafo o lefulefu gaʻoa o loo i ona luga.”
4 Ina ua faalogo le tupu i le upu a le tagata o le Atua moni na ia valaau atu ai i le fata faitaulaga i Peteli, ona aapa atu lea o le lima o Ierepoamo mai i le fata faitaulaga, ma faapea atu: “Ia outou puʻe iā te ia!”+ Ona gase ai lea o lona lima na aapa atu iā te ia, ua ia lē mafai ona toe faafoʻi ane iā te ia.+
5 Ona vaeluaina lea o le fata faitaulaga, ma ua masaa mai i fafo lefulefu gaʻoa mai i le fata faitaulaga, e tusa ma le vavega na faia e le tagata o le Atua moni e ala i le afioga a Ieova.+
6 Ua tali atu le tupu, ua faapea atu i le tagata o le Atua moni: “Faamolemole, ia e ʻaiʻoi atu iā Ieova lou Atua, ma tatalo mo aʻu ina ia toe lelei loʻu lima.”+ Ona ʻaiʻoi+ atu lea o le tagata o le Atua moni i luma o Ieova, ona toe lelei ai lea o le lima o le tupu e pei ona iai muamua.+
7 Ona fai atu lea o le tupu i le tagata o le Atua moni: “Sau ta ō i loʻu fale seʻi fai sina faamalositino,+ ma seʻi oʻu avatu se meaalofa+ iā te oe.”
8 A ua fai mai le tagata o le Atua moni i le tupu: “E tusa lava pe e te foaʻiina mai iā te aʻu le ʻafa o lou fale,+ e ta te lē ō faatasi lava ma oe+ e ʻai sina meaʻai ma inu se vai i lenei mea.
9 Auā o le mea lenā na ia poloaʻi mai ai iā te aʻu i le afioga a Ieova, e faapea, ‘Aua neʻi e ʻai sina meaʻai+ pe inu i se vai, aua foʻi e te toe foʻi mai i le auala na e alu atu ai.’”
10 Ona ia alu atu lea i le tasi auala, e leʻi foʻi mai o ia i le auala na ia alu atu ai i Peteli.
11 Sa iai le tasi perofeta+ ua toeaina, sa nofo i Peteli, ua ō atu ona atalii ma faamatala atu iā te ia mea uma na faia e le tagata o le Atua moni i lenā aso i Peteli, ma upu na ia tautala atu ai i le tupu, ma ua latou faamatala atu ia mea i lo latou tamā.
12 Ua fai mai lo latou tamā iā i latou: “O fea le auala na alu atu ai o ia?” Ona faasino atu lea e ona atalii iā te ia o le auala na alu atu ai le tagata o le Atua moni mai i Iuta.
13 Ona ia fai mai lea i ona atalii: “Ia faanofoa laʻu asini.” Ua latou faanofoa lana asini,+ ua tiʻetiʻe ai o ia ma alu.
14 Ua ia mulimuli atu i le tagata o le Atua moni, ua ia maua atu foʻi o ia o loo nofo i lalo o le laau telē.+ Ona ia fai atu lea iā te ia: “Po o oe ea o le tagata o le Atua moni o lē na sau mai i Iuta?”+ Ua tali mai o ia: “O aʻu lea.”
15 Ona fai atu lea o ia iā te ia: “Sau ta ō i loʻu fale seʻi ʻai sina meaʻai.”
16 A ua fai mai o ia: “E lē mafai ona ta toe foʻi pe ō atu foʻi i lou fale, e lē mafai foʻi ona ou ʻai i sina meaʻai pe inu i se vai i lenei mea.+
17 Auā na fetalai mai iā te aʻu le afioga a Ieova,+ ‘Aua neʻi e ʻai i sina meaʻai pe inu i se vai i inā. Aua foʻi e te toe foʻi mai i le auala na e alu atu ai.’”+
18 Ona fai atu lea o ia iā te ia: “O aʻu foʻi o le isi perofeta e pei o oe, na fai mai le agelu+ iā te aʻu i le afioga a Ieova, ua faapea mai, ‘Inā e toe faafoʻi mai ia o ia i lou fale, ina ia ʻai sina meaʻai ma inu se vai.’” (Na ia ʻolegia o ia.)+
19 Ona la toe foʻi lea ma ia i lona fale, ua ʻai ai o ia ma inu.+
20 A o nonofo i laʻua i le laulau, ona oo mai ai lea o le afioga+ a Ieova i le perofeta na toe faafoʻi atu iā te ia;
21 ua ia valaau atu i le tagata o le Atua moni lea na sau mai i Iuta, ua faapea atu: “O le mea lenei ua fetalai mai ai Ieova, ‘Talu ai ua e fouvale+ i le afioga a Ieova, ma ua e lē tausi i le poloaʻiga na poloaʻi mai ai Ieova lou Atua iā te oe,+
22 a ua e toe foʻi ina ia ʻai sina meaʻai ma inu se vai i le mea na ia fetalai mai ai iā te oe: “Aua e te ʻai sina meaʻai pe inu se vai,” o le a lē tuuina ai lou tino oti i le tuugamau o ou augātamā.’”+
23 Ae ina ua uma ona ʻai o ia ma inu, ona faanofoa lea o le asini e le perofeta lea na toe faafoʻi maia o ia.
24 Ua alu o ia i lona ala. Mulimuli ane, ua maua atu o ia e se leona+ i le auala, ua osofaʻia ma ua oti+ ai o ia, ua taatia foʻi lona tino oti i le auala. Ua tū le asini i ona tafatafa, ua tū foʻi le leona i tafatafa o le tino oti.
25 Na iai tagata na ui ane ai i inā, ua latou vaaia le tino oti ua lafo i le auala, ma le leona o loo tū i tafatafa o le tino oti. Ona latou ō ai lea i le aai lea e nofo ai le perofeta ua toeaina, ma faamatala atu i ai lea mea.
26 Ina ua faalogo i ai le perofeta lea na toe faafoʻi atu iā te ia, ona ia faapea ane lea: “O le tagata o le Atua moni o lē na fouvale i le faatonuga a Ieova;+ o lea ua tuuina atu ai e Ieova iā te ia le leona, ia osofaʻia o ia ma oti ai, e tusa ai ma le afioga a Ieova na ia fetalai mai ai iā te ia.”+
27 Ona alu atu lea o ia ma fai atu i ona atalii: “Ia faanofoa laʻu asini.” Ona latou faanofoa lea o le asini.+
28 Ua alu o ia i lona ala ma maua atu lona tino oti ua taatia i le auala, faatasi ma le asini ma le leona o loo tutū ai i tafatafa o le tino oti. E leʻi ʻaina e le leona le tino oti, e na te leʻi faaumatia foʻi le asini.+
29 Ona tago lea o le perofeta ua sii aʻe le tino oti o le tagata o le Atua moni, ma tuu i luga o le asini, ma toe aumai o ia. Ua oo atu o ia i le aai o le perofeta ua toeaina, ua tagituʻi ma tanu iā te ia.
30 Ua ia tuu lona tino oti i lona tuugamau; ua latou taufaitagituʻi foʻi iā te ia:+ “Loʻu uso e, taʻi leaga!”
31 Ina ua uma ona ia tanu iā te ia, ona ia fai atu lea i ona atalii: “Pe a ou oti, ia outou tanu aʻu i le mea o loo tanu ai le tagata o le Atua moni. Ia tuu foʻi oʻu ivi i tafatafa o ona ivi.+
32 Auā e taunuu+ lava le upu na ia valaau atu ai i le afioga a Ieova i le fata faitaulaga+ lea sa i Peteli, ma fale uma o mea maualuluga+ o loo i aai o Samaria.”+
33 Ua mavae lenei mea, ae e leʻi liliuese ai Ierepoamo mai i lona ala leaga, a ua alu atu o ia ma toe faia tagata lautele e avea ma ositaulaga o mea maualuluga.+ A o lē e fiafia i ai, ua ia tofia+ o ia i le faapea ane: “Ia avea o ia o se tasi o ositaulaga i mea maualuluga.”
34 Ua avea lenei mea ma agasala i le aiga o Ierepoamo,+ ma ua fano ma faaumatia ai i latou mai i le fogāeleele.+
