1 Tupu 16:1-34
16 Ua oo mai le afioga a Ieova iā Ieu+ le atalii o Hanani,+ e faatatau iā Paasa e faapea:
2 “Na ou faaeaina oe mai i le eleele+ ina ia ou tofia oe e fai ma taʻitaʻi o loʻu nuu o Isaraelu,+ a ua e savali i le ala o Ierepoamo,+ ma faapogaia ai loʻu nuu o Isaraelu e agasala i le faatigā mai iā te aʻu i a latou agasala,+
3 o le mea lea ou te matuā tafiesea ai Paasa ma lona aiga, ma ou te faia foʻi lona aiga ia pei lava o le aiga o Ierepoamo le atalii o Nepata.+
4 O se tasi o le aiga o Paasa e oti i le aai e ʻaina e taʻifau; a o se tasi o lona aiga e oti i le fanua, e ʻaina e manufelelei o le lagi.”+
5 A o le olaga uma o Paasa, o mea na ia faia, ma lona malosi, po ua lē o tusia ea i le tusi+ e faatatau i olaga o tupu o Isaraelu?
6 Mulimuli ane, ua taoto Paasa faatasi ma ona augātamā ma ua tanu o ia i Tiresa;+ ua pule foʻi Ele lona atalii e sui iā te ia.
7 O Ieu foʻi le perofeta, o le atalii o Hanani, na oo mai ai le afioga a Ieova e faatatau iā Paasa ma lona aiga,+ ona o mea leaga uma na ia faia i le silafaga a Ieova, ua faatigā+ ai iā te ia i galuega a ona lima,+ ina ia pei o le aiga o Ierepoamo, ma na ia fasiotia foʻi o ia.+
8 O le tausaga lona lua sefulu ono o le nofoaiga a Asa le tupu o Iuta, na fai ai Ele le atalii o Paasa ma tupu o Isaraelu i Tiresa mo tausaga e lua.
9 Ua taupulepule foʻi lana auauna o Semeri+ le pule o le ʻafa o kariota e foua o ia, a o iai o ia i Tiresa o loo inu+ ma ua onā i le fale o Arasa, o lē na vaaia le aiga+ i Tiresa.
10 Ona alu atu ai lea o Semeri, ua fasi iā te ia+ ma ua oti ai i le tausaga lona lua sefulu fitu o le nofoaiga a Asa le tupu o Iuta, ma ua pule foʻi o ia e sui iā te ia.
11 Ina ua pule o ia ma ua nofo i lona nofoālii, ona ia fasiotia lea o le aiga uma o Paasa. E na te leʻi faatotoe foʻi se tasi o lona aiga o sē e tulaʻi e fai sana feʻaulata i le pā,+ po o ē e tauimasui i lona toto,+ po o ana uō.
12 Ua faaumatia e Semeri le aiga uma o Paasa,+ e tusa ai ma le afioga a Ieova+ na ia fetalai mai ai e ala i le perofeta o Ieu, e faatatau iā Paasa,+
13 ona o agasala uma a Paasa ma agasala a Ele+ lona atalii, na la agasala ai ma la faapogaia ai ona agasala o Isaraelu, i le faatigā iā Ieova le Atua o Isaraelu i a latou tupua e lē aogā.+
14 A o le olaga uma o Ele ma mea uma na ia faia, po ua lē o tusia ea i le tusi+ e faatatau i olaga o tupu o Isaraelu?
15 O le tausaga lona lua sefulu fitu o le nofoaiga a Asa le tupu o Iuta, na fai ai Semeri ma tupu i Tiresa mo aso e fitu,+ a o tolauapi le nuu e siitaua iā Kipetonu,+ o le aai o Filisitia.
16 Mulimuli ane, ua faalogo le nuu o loo tolauapi i le tala e faapea: “Ua fouvale Semeri, ma ua ia fasiotia foʻi le tupu.” Ona tofia lea e Isaraelu uma o Omeri+ le taʻitaʻiʻau, e fai ma tupu o Isaraelu i lea aso i le togālauapi.
17 Ona ō aʻe lea o Omeri ma Isaraelu uma na faatasi ma ia mai i Kipetonu ma latou siʻomia+ Tiresa.
18 Ina ua iloa e Semeri ua faatoʻilaloina le aai, ona ia alu lea i le ʻolo o le fale o le tupu, ma susunu le fale o le tupu a o iai o ia i totonu, ma oti ai+
19 ona o ana agasala na ia agasala ai i lona faia o mea leaga i le silafaga a Ieova,+ i lona savali i le ala o Ierepoamo, ma lana agasala lea na ia faapogaia ai ona agasala o Isaraelu.+
20 A o le olaga uma o Semeri ma lana fouvalega na ia fouvale ai, po ua lē o tusia ea i le tusi+ e faatatau i olaga o tupu o Isaraelu?
21 O le taimi lea na vaeluaina ai e le nuu o Isaraelu i latou.+ O le tasi vaega o le nuu na mulimuli atu iā Tipeni le atalii o Kinati, ina ia fai o ia ma tupu, a o le isi vaega na mulimuli atu iā Omeri.
22 Mulimuli ane, ua faatoʻilaloina e le nuu na mulimuli iā Omeri le nuu na mulimuli iā Tipeni le atalii o Kinati; ua oti ai Tipeni, ona pule ai lea o Omeri.
23 O le tausaga lona tolu sefulu tasi o le nofoaiga a Asa le tupu o Iuta, na fai ai Omeri ma tupu o Isaraelu i tausaga e sefulu lua. E ono tausaga na pule ai o ia i Tiresa.
24 Ua ia faatau le mauga o Samaria mai iā Semeri i taleni siliva e lua, ua ia faia foʻi le aai i luga o le mauga ma faaigoa i le igoa o Semeri le pule o le mauga, o Samaria.+
25 Ua faia pea e Omeri mea leaga i luma o Ieova, ma ua sili atu foʻi lona leaga i ē uma na muamua iā te ia.+
26 Ua savali pea o ia i ala uma o Ierepoamo le atalii o Nepata,+ ma lana agasala na ia faapogaia ai ona agasala o Isaraelu, i le faatigā iā Ieova le Atua o Isaraelu i a latou tupua e lē aogā.+
27 A o le olaga uma o Omeri, o mea na ia faia, ma lona malosi na ia faia ai mea, po ua lē o tusia ea i le tusi+ e faatatau i olaga o tupu o Isaraelu?
28 Mulimuli ane, ua taoto Omeri faatasi ma ona augātamā ma ua tanu o ia i Samaria; ua pule foʻi Aapo+ lona atalii e sui iā te ia.
29 Na fai Aapo le atalii o Omeri ma tupu o Isaraelu i le tausaga lona tolu sefulu valu o le nofoaiga a Asa le tupu o Iuta; ma na faaauau pea ona pule Aapo le atalii o Omeri iā Isaraelu i Samaria,+ mo le lua sefulu lua tausaga.
30 Ua faia e Aapo le atalii o Omeri o mea leaga i luma o Ieova, ma ua sili atu foʻi lona leaga i ē uma na muamua iā te ia.+
31 E peiseaʻī o se mea faatauvaa+ iā te ia lona savali i agasala a Ierepoamo+ le atalii o Nepata, ua ia faiavā+ ai iā Iesepela+ le afafine o Etepaala le tupu o Saitonu,+ ua alu foʻi o ia ma auauna iā Paala+ ma ifo iā te ia.
32 E lē gata i lea, ua ia faatū le fata faitaulaga o Paala i le fale+ o Paala lea na ia faia i Samaria.
33 Ua faia e Aapo le pou paia;+ ua faia foʻi e Aapo mea e sili atu e faatigā+ ai iā Ieova le Atua o Isaraelu, nai lo o tupu uma o Isaraelu na muamua atu iā te ia.
34 O ona aso na faia ai Ieriko e Ieli le Peteli. Na oti lana ulumatua o Apiramo a o ia toe faatūina le faavae, na oti foʻi lana uii o Sekupo a o ia toe faia ona faitotoʻa, e tusa ai ma le afioga a Ieova na ia fetalai mai ai e ala iā Iosua le atalii o Nuno.+
