1 Tupu 20:1-43
20 Ua faapotopoto faatasi e Peniata+ le tupu o Suria o ana ʻautau uma, atoa ma tupu e toʻatolu sefulu lua faatasi ma ia,+ o solofanua,+ ma kariota,+ ua alu aʻe o ia e osofaʻia+ Samaria+ ma tau ai le taua.
2 Ona ia aauina mai lea o avefeʻau+ iā Aapo le tupu o Isaraelu i le aai. Ua ia faapea mai iā te ia: “O le mea lenei ua fai mai ai Peniata,
3 ‘O au siliva ma au auro o aʻu mea ia, o au avā ma ou atalii o ē e sili ona aulelei, e fai mo aʻu.’”+
4 Ona tali atu lea o le tupu o Isaraelu, ua faapea atu: “Loʻu alii e, le tupu, o aʻu ma mea uma ua iā te aʻu e fai ia mo oe, e pei ona e fetalai mai ai.”+
5 Mulimuli ane, ua toe foʻi mai avefeʻau ma faapea mai: “Ua faapea ona fai mai o Peniata, ‘Ua ou auina atu se feʻau iā te oe e faapea: “Ia e aumai iā te aʻu o au siliva, o au auro, o au avā, ma ou atalii.
6 O se taimi faapenei a taeao ou te aauina atu ai iā te oe aʻu auauna, latou te suʻe lelei i lou fale ma fale o au auauna; o mea uma foʻi e te fiafia+ i ai e latou te fetagofi i ai, ma latou aveina.”’”
7 Ona aami lea e le tupu o Isaraelu o toeaina uma o le nuu,+ ma faapea atu: “Faamolemole, seʻi outou mātau ma iloa lelei o loo saʻili+ lenei tagata ia fai se mea leaga iā i tatou; auā ua ia aauina mai nisi e ave aʻu avā, o oʻu atalii, o aʻu siliva, ma aʻu auro, ma ou te leʻi teena lona manaʻo.”
8 Ona fai mai lea o toeaina uma ma le nuu uma iā te ia: “Aua e te usitaʻi i ai, aua foʻi e te taliaina lona manaʻo.”
9 Ua fai atu o ia i avefeʻau a Peniata: “Ia fai atu i loʻu alii le tupu, ‘O mea uma na e fai mai ai muamua i lau auauna, ou te faia lava; a o le mea lenei, e lē mafai ona ou faia.’” Ona toe ō lea o avefeʻau ma avatu le tala iā te ia.
10 Ona aauina mai lea o nisi e Peniata, ua faapea mai: “Ia faia e atua+ iā te aʻu ma ia latou faaopoopo i ai,+ pe afai e lava le efuefu o Samaria ina ia tofu le nuu uma o loo mulimuli mai iā te aʻu ma luuga o efuefu!”+
11 Ua toe tali atu le tupu o Isaraelu, ua faapea atu: “Ia outou fai atu iā te ia, ‘Aua neʻi mitamita iā te ia lava lē o fusi+ le ofutau e pei o lē e na te tatalaina le ofutau.’”+
12 Ina ua faalogo o ia i lenā upu, a o inu+ o ia ma tupu i fale lauvao, ona ia fai atu loa lea i ana auauna: “Ia sauni!” Ona latou sauni lea e siitaua i le aai.
13 Faauta! ua faalatalata mai se tasi o perofeta iā Aapo le tupu o Isaraelu,+ ma faapea mai iā te ia: “O le mea lenei ua fetalai mai ai Ieova,+ ‘Ua e vaai atu ea i lenei motu o tagata e toʻatele? Ou te tuuina atu i latou i lou lima i le asō, ma e iloa ai o aʻu lava o Ieova.’”+
14 Ona fai atu lea o Aapo: “O ai ea e faia?” A ua fai mai o ia: “O le mea lenei ua fetalai mai ai Ieova, ‘E faia e tauleleʻa o alii sili o itumalo.’” Ua faapea atu o ia: “O ai ea e na te amataina le taua?” Ona ia fai mai lea: “O oe!”
15 Ua ia faitauina tauleleʻa o alii sili o itumalo, ma e tusa ma le toʻalua selau tolu sefulu lua;+ ona ia faitauina lea o le nuu uma, o le fanauga uma a Isaraelu, e toʻafitu afe.
16 Ua latou ō atu i le aoauli a o inu Peniata i le fale lauvao ma ua oo ina onā,+ o i latou faatasi ma tupu, o tupu e toʻatolu sefulu lua o loo fesoasoani iā te ia.
17 Ina ua ō atu muamua tauleleʻa+ o alii sili o itumalo, ona aauina atu lea e Peniata o nisi; ua latou ō mai ma taʻu mai iā te ia: “Ua ō mai tagata mai i Samaria.”
18 Ua fai atu o ia: “Pe afai ua latou ō mai ma le filemu, ia outou pupuʻe ola i latou; pe afai ua latou ō mai e tau, ia outou pupuʻe ola pea i latou.”+
19 O i latou nei na ō mai mai i le aai, o tauleleʻa o alii sili o itumalo, ma o loo mulimuli mai iā i latou le ʻautau.
20 Ua taʻitasi ma fasioti i lana tagata; ona sosola+ lea o Suria,+ ma ua tuliloa i latou e Isaraelu, a ua sola Peniata le tupu o Suria i le solofanua, faatasi ai ma tagata tiʻetiʻe solofanua.
21 A ua alu atu le tupu o Isaraelu ma faaumatia solofanua ma kariota,+ ua ia fasiotia foʻi tagata Suria i le fasi tele lava.
22 Mulimuli ane, ua sau le perofeta+ i le tupu o Isaraelu ma faapea mai iā te ia: “Inā alu ia, ia e faamalosi oe lava,+ ia e mafaufau, ma vaai po o le ā le mea e te faia;+ auā o le a sau le tupu o Suria e lua te tau pe a aulia le isi tausaga.”+
23 A ua fai atu auauna a le tupu o Suria iā te ia: “O lo latou Atua, o le Atua o mauga.+ O le mea lenā ua sili atu ai ona malolosi i latou nai lo o i tatou. O lea, seʻi o tatou tau ma i latou i le mea laugatasi, ma iloa ai pe e lē sili atu ona malolosi i tatou nai lo o i latou.
24 Ia faia lenei mea: Ia aveese tupu+ e taʻitasi mai i lona tulaga, ma ia tofia kovana e sui iā i latou.+
25 A o oe, ia e faitauina mo oe se ʻautau e tutusa ma le ʻautau na faaumatia sa iā te oe, o le solofanua e sui ai le solofanua, ma le kariota e sui ai le kariota; seʻi o tatou tau ma i latou i le mea laugatasi, ma iloa ai pe e lē sili atu ona malolosi i tatou nai lo o i latou.”+ Ua faalogo foʻi o ia i a latou upu, ma faia faapea.
26 Ina ua aulia le isi tausaga, ona faapotopoto lea e Peniata o Suria,+ ma ō aʻe i Afeka+ e tau ma Isaraelu.
27 A ua faapotopoto foʻi le fanauga a Isaraelu ma ua sauni meaʻai,+ ona latou ō lea e faafetaiaʻi i latou; ua tolauapi foʻi le fanauga a Isaraelu i o latou luma e pei o lafu ʻoti itiiti e lua, a o Suria, ua tumu le laueleele iā i latou.+
28 Ona faalatalata mai lea o le tagata o le Atua moni,+ ma faapea mai i le tupu o Isaraelu, ua ia fai mai: “O le mea lenei na fetalai mai ai Ieova, ‘Auā ua faapea mai Suria: “O Ieova o le Atua o mauga, ae lē o se Atua o fanua laugatasi,” ou te tuuina atu ai foʻi lenei motu o tagata e toʻatele i lou lima,+ ma iloa ai e outou, o aʻu lava o Ieova.’”+
29 E fitu aso o tolauapi i latou nei i o latou luma.+ Ae i le aso lona fitu, na amata ai le taua; na fasiotia e le fanauga a Isaraelu i le aso e tasi o ʻautau e savavali a Suria e toʻaselau afe.
30 A o i latou ua totoe, ua latou sosola i Afeka+ i le aai; ma ua solo i lalo le pā i luga o tagata e toʻalua sefulu fitu afe na totoe.+ Ua sola+ foʻi Peniata i le aai ma lafi ai i le potu pito i totonu.+
31 Ona fai atu lea o ana auauna iā te ia: “Ua matou faalogo e ese le alolofa faamaoni+ o tupu o le aiga o Isaraelu. Seʻi fusi o matou sulugātiti+ i ʻie talatala+ ma maea i luga o o matou ulu, ma ō atu i le tupu o Isaraelu. Atonu o le a ia faasaoina lou ola.”+
32 Ona fusi lea o o latou sulugātiti i ʻie talatala ma maea i luga o o latou ulu, ma ō atu i le tupu o Isaraelu, ua fai atu: “Ua faapea mai lau auauna o Peniata, ‘Faamolemole, ia e faaola mai iā te aʻu.’” Ona ia fai mai lea: “Po o ola pea o ia? O loʻu uso o ia.”
33 Ua manatu tagata+ o se faailoga lea, ma ua vave ona latou tali atu e peiseaʻī o lana filifiliga lava lea, ma ua latou faapea atu: “O Peniata, o lou uso lea.” Ona fai mai lea o ia: “Inā ō ia, ma aumai o ia.” Ona sau lea o Peniata iā te ia; ma ua ia ave aʻe o ia i lana kariota.+
34 Ua faapea mai Peniata iā te ia: “Ou te toe avatua aai+ na ave e loʻu tamā mai i lou tamā; e ave foʻi mo oe o auala i Tamaseko, e pei o auala na ave e loʻu tamā i Samaria.”
“A o aʻu, ou te auina ese atu oe ona o se feagaiga.”+
Ona ia osia lea o se feagaiga ma ia, ma auina ese atu o ia.
35 Ua fai atu le tasi tagata o atalii o le ʻauperofeta+ i lana uō, e tusa ma le afioga+ a Ieova: “Ia e tā mai iā te aʻu.” Ae ua musu le tagata e tā o ia.
36 Ona ia toe fai atu lea iā te ia: “Talu ai ua e lē faalogo i le siʻufofoga o Ieova, o le a e alu ese ai mai iā te aʻu, e faaumatia foʻi oe e se leona.” Ua mavae lenā, ona ia alu ese lea mai iā te ia, ua maua o ia e le leona+ ma ua faaumatia ai o ia.+
37 Ua maua foʻi e ia le tasi tagata, ma faapea atu: “Ia e tā mai iā te aʻu.” Ona tā lea o ia e le tagata, i le tā e manuʻa ai.
38 Ona alu lea o le perofeta ua tū atu i le tupu i le auala, e na te leʻi faailoa atu lava ona foliga,+ auā ua fusi ona mata.
39 A o alu ane le tupu, ua ia valaau atu i le tupu, ua faapea atu:+ “Na alu lau auauna i le lotolotoi o le taua; faauta! ua tuua e se tagata le taua, ua sau ma aumai se tagata iā te aʻu ma fai mai, ‘Ia e leoleo i lenei tagata. Afai e leiloa o ia, o le a sui lona ola+ i lou ola,+ a lē o lenā, e te totogi mai se taleni siliva.’+
40 Ae peitaʻi, a o uaʻi atu lau auauna i lea mea ma lea mea, vaai! ua leai o ia.” Ona fai atu lea o le tupu o Isaraelu iā te ia: “O lou faamasinoga lava lenā. Ua e filifilia lava e oe.”+
41 Ona ia aveesea faavave lea o le fusi mai i ona mata, ma ua iloa atu o ia e le tupu o Isaraelu, o ia o se tasi o le ʻauperofeta.+
42 Ua fai atu o ia iā te ia: “O le mea lenei na fetalai mai ai Ieova, ‘Talu ai ua e tuu atu e alu le tagata sa i lou lima na ou manatu e tatau ona faaumatia,+ o le mea lea e sui ai lona ola i lou ola,+ ma lona nuu e sui ai lou nuu.’”+
43 Ona alu ai lea o le tupu o Isaraelu i lona fale, ua tigā ma ua lē fiafia,+ ua oo atu o ia i Samaria.+
