1 Tupu 6:1-38
6 I le fā selau valu sefulu tausaga talu ona tuua e le fanauga a Isaraelu le nuu o Aikupito,+ o le tausaga lona fā+ i le masina lona lua+ o Sefa,+ ina ua faia Solomona ma tupu o Isaraelu, na amata ai ona ia faia le fale mo Ieova.+
2 E ono sefulu kupita*+ le umi o le fale na faia+ e le Tupu o Solomona mo Ieova, e lua sefulu lona lautele, ae tolu sefulu kupita lona maualuga.+
3 O le faapaologa+ sa i luma o le potu tele* o le fale e lua sefulu kupita lona umi, e tusa ma le lautele o le fale. E sefulu kupita lona lautele i luma o le fale.
4 Ua ia faia foʻi faamalama o le fale e lauiti faavaa.+
5 Ua ia faia i fafo o le puipui o le fale o potu i itu e siʻo ai, o fafo o le puipui o le potu tele o le malumalu atoa ma le potu pito i totonu,+ ua ia faia potu i autafa+ e soo ai.
6 O potu aupito i lalo e lima kupita le lautele, o potu ogatotonu e ono kupita le lautele, o potu i le fogāfale lona tolu e fitu kupita le lautele; auā na ia tuuina ai lagolago+ i le fale i fafo e soo ai, ina ia aua neʻi pipii se mea i puipui o le fale.+
7 A o faia le fale, na faia i maa ua tipiina+ ua uma ona teuteuina lelei; ua lē lagona foʻi le paʻō o se samala, o se toʻi, po o se tasi lava meafaigaluega uʻamea, a o faia le fale.+
8 O le faitotoʻa+ o potu aupito i lalo sa tū i le itu taumatau o le fale, ae e ui aʻe i se faasitepu faataamilo e oo ai i potu ogatotonu, e ui aʻe foʻi mai i potu ogatotonu e oo atu i potu i le fogāfale lona tolu.
9 Ua faaauau ona ia fauina le fale ina ia faauma ai,+ ma faʻalo totonu o le fale i laau faalava ma laupapa arasi.+
10 Ua ia faia foʻi isi potu i autafa+ o le fale atoa, e lima kupita le maualuga o le potu e tasi, ma ua faamau i le fale i laupapa+ arasi.
11 Ua tulei mai le afioga a Ieova iā Solomona,+ e faapea:+
12 “A o le fale ua e faia, afai e te savali i aʻu faatonuga+ ma faia aʻu faamasinoga,+ ma tausia aʻu poloaʻiga uma i lou savali ai,+ ou te faataunuuina lava iā te oe laʻu upu na ou fai atu ai iā Tavita lou tamā;+
13 ou te nofo foʻi faatasi ma le fanauga a Isaraelu,+ ou te lē tuua lava loʻu nuu o Isaraelu.”+
14 Ua faaauau ona faia e Solomona le fale ina ia faaumaina.+
15 Ua ia faia puipui o le fale i totonu i laupapa arasi. E amata mai i le fola o le fale, e oo atu i laau faalava o le faʻalo, ua ia ufitia totonu i laupapa; ua ia ufitia foʻi le fola o le fale i laupapa perosi.+
16 Ua ia faia foʻi se vaega e lua sefulu kupita i pito i tua o le fale i laupapa arasi, e amata mai i le fola e alu aʻe i iviivi, ma faia ai i totonu o le fale le potu pito i totonu,+ le Mea e Sili Ona Paia.+
17 E fā sefulu kupita le telē o le fale, o le malumalu+ lea o loo i luma.+
18 O laupapa arasi i totonu o le fale, na vaneina ai ata o le vine vao+ ma fugālaau.+ Ua faia nei mea uma i laupapa arasi, ma e leʻi vaaia ai se maa.
19 A o le potu pito i totonu+ o le fale, na ia saunia e tuu ai i inā le atolaau+ o le feagaiga+ a Ieova.
20 O le potu pito i totonu e lua sefulu kupita lona umi, e lua sefulu kupita lona lautele,+ ma e lua sefulu kupita lona maualuga; ua ia ufitia foʻi i le auro māoʻi,+ ma ua ia ufitia le fata faitaulaga+ i laupapa arasi.
21 Ua ufitia+ foʻi e Solomona totonu o le fale i le auro māoʻi,+ ma faalava se filifili+ auro i luma o le potu pito i totonu+ ma ufitia i le auro.
22 Ua ia ufitia le fale atoa i le auro,+ seʻia soo ai le fale atoa; ua ia ufitia foʻi i le auro+ le fata faitaulaga+ lea sa lata ane i le potu pito i totonu.
23 Ua ia faia foʻi i le potu pito i totonu o kerupi+ e lua i laupapa o le olive vao, e sefulu kupita le maualuga o le kerupi e tasi.+
24 E lima kupita le umi o le tasi apaʻau o le kerupi, e lima foʻi kupita le umi o le isi apaʻau o le kerupi. E sefulu kupita e amata mai i le tasi tumutumu o lona apaʻau, e oo atu i le isi tumutumu o lona apaʻau.+
25 O le kerupi lona lua e sefulu kupita. E tutusa lelei le fua ma foliga o kerupi uma e lua.
26 O le maualuga o le tasi kerupi e sefulu kupita, e faapena foʻi le isi kerupi.
27 Ona ia tuu lea o kerupi i le fale pito i totonu, ina ia faaloloa apaʻau o kerupi.+ Ina ia papaʻi le apaʻau o le tasi kerupi i le puipui, faapea foʻi ona papaʻi le apaʻau o le isi kerupi i le isi puipui; e faaloloa o la apaʻau i le ogatotonu o le fale, e fepaʻiaʻi o la apaʻau.+
28 Ua ia ufitia foʻi kerupi i auro.+
29 O puipui uma ua faataamilo i le fale, ua ia vaneina ai ata o kerupi+ ma ata o laau o le pama,+ ua vane ai foʻi fugālaau+ i totonu ma fafo;
30 ua ia ufitia foʻi le fola+ o le fale i auro i totonu ma fafo.
31 O faitotoʻa+ o le potu pito i totonu na ia faia i laupapa o le olive vao:+ o poutū i tafatafa, o pou o faitotoʻa, ma le vaega lona lima.
32 O faitotoʻa ua faia i laupapa o le olive vao, ma ua ia vane ai i luga o ata o kerupi, ma laau o pama, ma vane ai ma fugālaau, ua ia ufitia na mea i le auro; ona ia tuʻituʻi lea o auro i luga o kerupi ma ata o laau o pama.
33 Ua ia faia foʻi faapea le faitotoʻa o le malumalu, o pou o le faitotoʻa i laupapa o olive vao e faatafafā.
34 O pou e lua o le faitotoʻa e fai i laupapa perosi.+ O itu e lua o le tasi faitotoʻa e feliuaʻi, ma o itu e lua o le isi faitotoʻa e feliuaʻi foʻi.+
35 Ua ia vaneina ai foʻi o kerupi, o laau pama faapea ma fugālaau, ma ufiufi i le auro mea na vaneina.+
36 Ua ia faia le puipui o le lotoā pito i totonu+ i atu maa e tolu+ ua tipiina, ma le atu laau faalava o arasi.
37 O le tausaga lona fā na faataatia ai le faavae+ o le fale o Ieova, i le masina o Sefa;+
38 o le tausaga lona sefulu tasi i le masina o Pula, o le masina lona valu lea, na māeʻa+ ai ona fausia le fale e tusa ma faamatalaga uma ma lona ata atoa;+ o lea e fitu tausaga na ia fausia ai le fale.
Faamatalaga Pito i Lalo
^ E tusa le kupita e tasi ma le 44.5 senitimita (17.5 inisi).
^ Po o le “malumalu” o le fale.
