1 Tupu 7:1-51
7 E sefulu tolu tausaga na faia ai e Solomona o lona lava fale,+ ma ua ia faamāeʻa ai ona faia o lona fale uma.+
2 Ua ia faia foʻi le Fale o le Vaomatua o Lepanona+ e selau kupita lona umi, e lima sefulu kupita lona lautele, e tolu sefulu kupita lona maualuga, i luga o atu poutū e fā o laupapa arasi; ua iai foʻi laau faalava+ o le arasi i luga o poutū.
3 Ua ufiufi foʻi i laupapa arasi+ luga aʻe o laau faalava o loo i luga o poutū e fā sefulu lima. E taʻisefulu lima i le atu e tasi.
4 E tolu atu faamalama e fai o latou faavaa, ua faafeagai foʻi lea faamalama+ ma lea faamalama i atu faamalama e tolu.
5 O faitotoʻa uma ma pou o faitotoʻa e iai faavaa faatafafā,+ atoa foʻi ma luma o faamalama ua faafeagai ma faamalama i atu faamalama e tolu.
6 Ua ia faia foʻi le Faapaologa o Poutū e lima sefulu kupita lona umi, ma e tolu sefulu kupita lona lautele; sa iai i o latou luma se faapaologa ma ona poutū, ma sa iai foʻi se isi faataumata i o latou luma.
7 Ua ia faia foʻi le Faapaologa o le Nofoālii+ e na te faia ai faamasinoga, ua ia faia ai le faapaologa o le faamasinoga;+ ma ua latou ufiufi totonu i laupapa arasi e amata mai i le fola e alu aʻe i iviivi.+
8 A o le fale e nofo ai o ia i le isi lotoā,+ e i tua o le fale o le Faapaologa. Sa faia foʻi faapena. Sa iai se fale e pei o lenei Faapaologa na ia faia mo le afafine o Farao,+ lea ua fai ma avā a Solomona.
9 O nei mea uma lava na faia i maa taugatā+ e tusa ma le fua, o maa ua tipiina i ʻili maa, i fafo ma totonu, e amata mai i le faavae e oo i maa pito i luga, ma fafo e oo atu i le lotoā tele.+
10 O maa taugatā na fai ai le faavae, o maa tetele, o maa e taʻisefulu kupita, ma maa e taʻivalu kupita.
11 A o luga na faia i maa taugatā e tusa ma le fua, o maa ua tipiina, faapea laupapa arasi.
12 A o le lotoā tele, na siʻo i atu maa e tolu+ na tipiina, ma le atu o laau faalava o arasi; e faapea foʻi le lotoā pito i totonu+ o le fale+ o Ieova, ma le faapaologa+ o le fale.
13 Ona alu atu lea o le feʻau a le Tupu o Solomona, ma aumai ai Hiramo+ mai i Turo.
14 O ia o le tama a le fafine ua oti lana tane e mai i le ituaiga o Nafatali, o lona tamā o le tagata Turo,+ o le tufuga fai mea ʻapamemea;+ na tumu o ia i le atamai ma le malamalama,+ ma le poto e faia ai so o se mea ʻapamemea. Ua sau o ia i le Tupu o Solomona, ma ua amata ona ia faia ana galuega uma.
15 Ua ia faia foʻi poutū ʻapamemea+ e lua, e sefulu valu kupita le maualuga o poutū taʻitasi, ma e faataamilo ai i poutū e lua taʻitasi se manoa e sefulu lua kupita le umi.+
16 Na ia faia foʻi ulupou e lua ma tuu i le tumutumu o poutū, ua faia i ʻapamemea.+ E lima kupita le maualuga o le tasi ulupou, e lima foʻi kupita le maualuga o le isi ulupou.
17 E iai teuteu e pei o ni mea valavala ua milo faatasi e pei o se filifili,+ mo ulupou o loo i tumutumu o poutū;+ e fitu mo le tasi ulupou, e fitu foʻi mo le isi ulupou.
18 Ua ia faia foʻi rimoni, ma atu rimoni e lua e faataamilo i mea valavala ina ia ufiufi ai ulupou i tumutumu o poutū; ua faapena foʻi ona ia faia le isi ulupou.+
19 O ulupou sa i tumutumu o poutū o le faapaologa, sa faia e foliga i le fugālaau o le lili,+ e taʻifā kupita le maualuga.
20 O ulupou sa i luga o poutū e lua, ua iai e latalata i le mea lautele o loo fesootaʻi ai i mea valavala; e lua selau foʻi rimoni+ i atu rimoni e faataamilo i ulupou taʻitasi.
21 Ua ia faatutū foʻi poutū+ o le faapaologa+ o le malumalu. Ua ia faatū le poutū i le itu taumatau ma faaigoa iā Iakinu, ua ia faatū foʻi le poutū i le itu tauagavale ma faaigoa iā Poasa.
22 Na faia foʻi tumutumu o poutū e pei o fugālaau o le lili. Na faasolo ina uma le faia o poutū.
23 Ua ia faia foʻi le vai ʻapamemea,+ e sefulu kupita e amata mai i le tasi augutu i le isi augutu e faataaliʻoliʻo ai; e lima kupita lona maualuga, ma e tolu sefulu kupita le umi o le manoa e fua faataaliʻoliʻo ai.+
24 Sa iai foʻi teuteu+ e pei o vine vao+ sa faataamilo i lalo ifo o lona augutu e siʻo ai, e sefulu kupita, o loo faataaliʻoliʻoina ai le vai,+ e taʻilua atu vine vao na teuteu ai ina o faia.
25 Ua faatū le vai i luga o povi poʻa+ e sefulu lua, e tolu e faasasaga i le itu i mātū, e tolu e faasasaga i le itu i sisifo, e tolu e faasasaga i le itu i saute, ma e tolu e faasasaga i le itu i sasaʻe; ua tuu i o latou luga le vai, o loo ū o latou tua i le ogatotonu.+
26 O lona mafiafia e tusa lea ma le alofilima;+ o lona augutu e faia e pei o le augutu o le ipu tī, ua faia i fugālaau o le lili.+ O le fua o le vai+ e lua afe paita* lea.+
27 Ua ia faia foʻi taavale toso+ ʻapamemea e sefulu, e fā kupita le umi o le taavale toso e tasi, e fā foʻi kupita lona lautele, ae e tolu kupita lona maualuga.
28 Ua faapenei ona faia o taavale toso: na iai o latou puipui i autafa, na iai foʻi puipui i va o laau faalava.
29 O luga o puipui i autafa ia e i le va o laau faalava, e iai leona,+ o povi poʻa,+ ma kerupi,+ e faapena foʻi i luga o laau faalava. Na faatautau ifo i luga aʻe ma lalo ifo o leona ma povi poʻa, o fatu+ e fili i fugālaau.
30 E fā uili ʻapamemea o le taavale toso e tasi, e iai uʻamea i le va o uili; e iai foʻi i ona tulimanu e fā o lagolago mo taavale toso. I lalo ifo o le faatanoa, e iai lagolago ua teuteuina i fatu e fili i fugālaau, e mai i le isi itu i le isi itu.
31 O lona gutu e amata mai i totonu e agaʻi i lagolago ma luga e [?] kupita; e lapotopoto foʻi lona gutu, o le faiga o le tulaga e tasi ma le ʻafa kupita, e iai teuteu i luga i lona gutu. E faatafafā o latou puipui i autafa, e lē lapotopoto.
32 O uili e fā e i lalo ifo o puipui i autafa, o lagolago o uili i autafa o le taavale toso; o le maualuga o le uili e tasi, e tasi ma le ʻafa kupita.
33 O le faiga o uili e pei o le faiga o le uili o le kariota.+ Na faia uma i ʻapamemea o latou lagolago, o o latou paʻu, o uʻamea i totonu o uili, ma ogatotonu o uili.
34 E fā lagolago i tulimanu e fā o le taavale toso e tasi; o ona lagolago e tasi lava ma le taavale toso.
35 Sa i le tumutumu o le taavale toso le tulaga e ʻafa kupita le maualuga, e faataaliʻoliʻo ai; o luga foʻi o le taavale toso, o ona itu, ma ona puipui i autafa, sa tasi lava foʻi ma le taavale toso.
36 Ua ia vaneina+ foʻi i luga o mea mafolafola i ona itu ma puipui i autafa, o kerupi, o leona, ma laau o pama, e tusa ma avanoa mo mea taʻitasi, ma fatu e fili i fugālaau ua faataamilo ai.+
37 E faapena ona ia faia taavale toso e sefulu;+ e tutusa lo latou fausaga,+ lo latou fua, ma lo latou tino mai.
38 Ua ia faia faatanoa+ ʻapamemea e sefulu. E fā sefulu paita le fua o vai i faatanoa taʻitasi. E fā kupita le faatanoa e tasi. Sa tofu taavale toso e sefulu ma le faatanoa e tasi i luga.
39 Ona ia tuu lea o taavale toso e lima i le itu taumatau o le fale, ma le lima i le itu tauagavale o le fale;+ a ua ia tuu le vai i le itu taumatau i sasaʻe o le fale, e faasaga i le itu i saute.+
40 Ona faasolosolo lea ona faia e Hiramo+ o faatanoa,+ o suō,+ ma ipu faaofuofu.+ Mulimuli ane, ua faauma+ e Hiramo ona faia o galuega uma i le fale o Ieova, lea na ia faia mo le Tupu o Solomona:
41 O poutū+ e lua ma ulupou faaofuofu+ i luga o tumutumu o poutū e lua, ma mea valavala+ e lua e ufiufi ai ulupou lapotopoto e lua, i luga o tumutumu o poutū,
42 o rimoni+ e fā selau mo mea valavala e lua, e lua atu rimoni i le mea valavala e tasi, e ufiufi ai ulupou faaofuofu e lua i luga o poutū e lua;
43 o taavale toso+ e sefulu, o faatanoa+ e sefulu i luga o taavale toso,
44 o le vai e tasi,+ o povi poʻa e sefulu lua i lalo ifo o le vai;+
45 o ʻapa, o suō, ma ipu faaofuofu, o ipu+ uma nei na faia e Hiramo i le ʻapamemea iila, mo le Tupu o Solomona mo le fale o Ieova.
46 Na faia e le tupu o nei mea mai i le eleele omea i le Itumalo o Ioritana,+ i le va o Sukota+ ma Saretana.+
47 E leʻi fuaina e Solomona o ipu uma,+ ona o le matuā tele lava.+ E leʻi iloa foʻi le mamafa o le ʻapamemea.+
48 Na faasolosolo ona faia e Solomona o ipu uma mo le fale o Ieova, o le fata faitaulaga+ auro, o le laulau+ auro e tuu ai le falaoa e laulauina,
49 o tuugāmolī+ o auro māoʻi,+ e lima i le itu taumatau, ma le lima i le itu tauagavale i luma o le potu pito i totonu, o fugālaau,+ o molī,+ o iofi,+ o auro ia,
50 o faatanoa, o seleulu,+ o ipu faaofuofu,+ o ipu tī,+ o salefu,*+ o auro māoʻi ia, o faamau o faitotoʻa+ o le fale i totonu, o le Mea e Sili Ona Paia lea, o faitotoʻa+ foʻi o le fale o le malumalu,+ o auro ia.
51 Mulimuli ane, ua māeʻa le galuega+ uma na faia e le Tupu o Solomona mo le fale o Ieova; ona aumaia lea e Solomona o mea na faapaiaina e lona tamā o Tavita;+ o siliva, o auro, ma ipu, ua ia tuufaatasi ma oloa i le fale o Ieova.+
Faamatalaga Pito i Lalo
^ O le fua o le “paita” e tusa ma le 44,000 lita (11,620 kalone).
^ O se mea e pei o se tamaʻi suō e aveese ai malala mai i le afi.
