1 Tupu 8:1-66
8 Ua faapotopoto+ mai e Solomona+ o toeaina+ o Isaraelu, o ulu uma o ituaiga,+ o taʻitaʻi o tamā+ o le fanauga a Isaraelu, i le Tupu o Solomona i Ierusalema, ina ia ave aʻe le atolaau o le feagaiga+ a Ieova mai i le Aai a Tavita,+ o Siona+ lea.
2 Ona faapotopoto lea o tagata uma o Isaraelu i le Tupu o Solomona, i le masina o Etanima i le tausamiga,+ o le masina lona fitu lea.+
3 Ua ō mai toeaina uma o Isaraelu, ma ua ave aʻe+ e ositaulaga le Atolaau.+
4 Ona latou ō aʻe lea ma ave aʻe le atolaau a Ieova, ma le faleʻie+ o le feiloaʻiga,+ ma ipu paia uma sa i le faleʻie; ua ō aʻe le ʻauositaulaga ma sa Levī+ ma ave aʻe na mea uma.+
5 Ua iai i luma o le atolaau le Tupu o Solomona ma le faapotopotoga uma o Isaraelu, o i latou na fuafua e faapotopoto faatasi ma ia, ua fai taulaga+ i mamoe ma povi e lē mafaitaulia ona o le tele.+
6 Ua ave aʻe e ositaulaga le atolaau+ o le feagaiga a Ieova i le mea e tuu ai,+ i le potu pito i totonu o le fale, o le Mea e Sili Ona Paia, i lalo ifo o apaʻau o kerupi.+
7 Auā ua faaloloa atu e kerupi o la apaʻau i luga o le mea o iai le Atolaau; ua faamalumalu foʻi kerupi i luga o le Atolaau ma ona amo.+
8 A ua uumi amo,+ ua iloa atu tumutumu o amo mai i le Mea Paia i luma o le potu pito i totonu, a ua lē iloa atu i fafo. Ua iai pea i inā seʻia oo mai i aso nei.+
9 E leai se mea sa i totonu o le Atolaau, seʻi vaganā ai papamaa+ e lua na tuuina+ ai e Mose i Horepa, ina ua osia e Ieova le feagaiga+ ma le fanauga a Isaraelu, a o latou ō ese mai i le nuu o Aikupito.+
10 Ae ina ua ō mai i fafo ositaulaga mai i le mea paia, ona faatumuina ai lea o le fale o Ieova i le ao.+
11 Ua lē mafai ona tutū ai i inā ositaulaga+ e auauna+ ona o le ao, auā ua tumu le fale o Ieova+ i le mamalu+ o Ieova.
12 Ona faapea atu lea o Solomona: “Na fetalai mai Ieova, e afio o ia i le pogisa tele.+
13 Ua uma ona ou faia se fale, o se afioaga maualuga mo oe,+ o se nofoaga tumau+ mo oe, e te afio ai i aso uma lava.”+
14 Ona liliu atu lea o le tupu, ma faamanuia+ i le faapotopotoga uma o Isaraelu, a o laulaututū mai le faapotopotoga uma o Isaraelu.
15 Ua faapea atu o ia: “Ia viia Ieova+ le Atua o Isaraelu, o lē na fetalai mai iā Tavita+ loʻu tamā, ma ua faataunuu+ e lona lava aao, e faapea,
16 ‘E mai lava i le aso na ou aumaia ai loʻu nuu o Isaraelu mai i Aikupito, ou te leʻi filifilia+ se aai mai i ituaiga uma o Isaraelu, e faia ai se fale+ mo loʻu igoa+ ina ia iai pea i inā; ae ua ou filifilia Tavita ina ia pule i loʻu nuu o Isaraelu.’+
17 Sa naunau le loto o Tavita loʻu tamā e fausia se fale mo le suafa o Ieova le Atua o Isaraelu.+
18 A ua fetalai mai Ieova i loʻu tamā o Tavita, ‘Auā ua naunau lou loto e fausia se fale mo loʻu igoa, ua lelei lea auā ua naunau i ai lou loto.+
19 Ae peitaʻi, e te lē faia le fale, a o lou atalii o lē e fanau* mai iā te oe, o ia e na te faia le fale mo loʻu igoa.’+
20 Ua faataunuu e Ieova lana afioga+ na ia fetalai mai ai ina ia ou tulaʻi e sui i loʻu tamā o Tavita, ma nofo i le nofoālii o Isaraelu+ e pei ona fetalai mai ai Ieova, ma ia ou faia se fale mo le suafa o Ieova le Atua o Isaraelu,+
21 ma ou saunia ai foʻi se mea e tuu ai le Atolaau, o loo iai le feagaiga+ a Ieova, lea na ia osia ma o tatou augātamā ina ua ia aumaia i latou mai i le nuu o Aikupito.”
22 Ona tū lea o Solomona i luma o le fata faitaulaga+ a Ieova, i luma o le faapotopotoga uma o Isaraelu, ma ua faaloaloa aʻe ona lima i le lagi;+
23 ua ia faapea atu: “Ieova e, le Atua o Isaraelu,+ e leai se Atua e pei o oe+ i le lagi i lugā po o le lalolagi i lalo nei, ua e tausia le feagaiga, ma ua e alofa faamaoni+ i au auauna+ o ē e savavali i ou luma ma o latou lotoatoa,+
24 o oe lava ua e tausia le mea na e folafola mai i lau auauna o Tavita loʻu tamā, ina ua e folafola mai i lou fofoga, o lou aao foʻi na e faataunuuina ai, e pei ona faia i le aso nei.+
25 O lenei, Ieova e, le Atua o Isaraelu, ia e tausia le mea na e folafola mai i lau auauna o Tavita loʻu tamā, e faapea, ‘E lē motu lou gafa mai i le nofoālii o Isaraelu,+ tau lava ina ia tausia e lau fanau o latou ala, i lo latou savavali i oʻu luma e pei ona e savali i oʻu luma.’
26 O lenei, le Atua e, o Isaraelu, faamolemole ia taunuu lau folafolaga+ na e folafola ai i lau auauna o Tavita loʻu tamā.
27 “Ae pe e afio moni ea le Atua i le lalolagi?+ Faauta! O le lagi,+ ioe, o le lagi o lagi+ e te lē ofi ai;+ e lē atili ai ea ona e lē ofi i lenei fale+ ua ou faia!
28 Ieova e, loʻu Atua, ia e liuliualo mai i le tatalo+ a lau auauna ma lana talosaga atu mo lou finagalo malie,+ ia e faafofoga mai i le ʻaiʻoi atu, ma le tatalo ua tatalo atu ai lau auauna i ou luma i le aso nei;+
29 ina ia silasila+ mai ou fofoga i lenei fale i le ao ma le pō, i le mea na e fetalai mai ai ‘E iai loʻu igoa i inā,’+ ina ia e faafofoga i le tatalo e tatalo atu ai lau auauna i lenei mea.+
30 Ia e faafofoga mai i le talosaga atu mo lou finagalo malie+ a lau auauna ma lou nuu o Isaraelu, lea ua latou tatalo atu ai mai i lenei nofoaga; ia e faafofoga mai foʻi i le mea o e afio ai, o le lagi+ lea, ia e faafofoga mai ma ia faamagalo+ mai.
31 “Pe a agasala se tagata i lona uso a tagata,+ ma ua ia fetuu ai iā te ia, ma ua faasalaina o ia ona o le fetuu,+ pe a sau o ia i luma o lou fata faitaulaga i lenei fale ina ua fetuuina o ia,
32 ia e faafofoga mai mai i le lagi, ia e faamasino i au auauna i le taʻusalaina o lē e amioleaga i le taui atu e tusa ma le mea na ia faia,+ ma ia e taʻuamiotonuina lē ua amiotonu+ i le taui atu iā te ia e tusa ai o lana amiotonu.+
33 “Pe a faatoʻilaloina lou nuu o Isaraelu i luma o o latou fili,+ ona o lo latou agasala pea iā te oe,+ ma latou toe foʻi mai iā te oe,+ ma vivii i lou suafa,+ ma tatalo,+ ma talosaga atu mo lou finagalo malie i lenei fale,+
34 ia e faafofoga mai mai i le lagi, ma e faamagalo le agasala a lou nuu o Isaraelu,+ ia e toe faafoʻi+ mai i latou i le laueleele na e foaʻi mai i o latou augātamā.+
35 “Pe a punitia le lagi ina ia leai se timu,+ auā ua latou agasala+ pea iā te oe, e latou te tatalo atu foʻi i lenei mea,+ ma vivii atu i lou suafa, e latou te liliuese foʻi mai i a latou agasala auā ua e faapuapuagatia i latou,+
36 ia e faafofoga mai mai i le lagi, ma e faamagaloina le agasala a au auauna, o lou nuu o Isaraelu, auā ua e aʻoaʻoina+ i latou i le ala lelei latou te savavali ai;+ ia e foaʻi mai foʻi le timu+ i lou laueleele na e foaʻi mai i lou nuu e fai ma o latou tofi.
37 “Pe afai e oo mai le oge+ i le nuu, pe oo mai le faamaʻi,+ afai foʻi e oo mai le lāmala, o polopologā,+ o sē akerise,+ ma mogamoga;+ ma afai e siʻosiʻomia i latou e o latou fili i o latou aai, o so o se mala po o so o se faamaʻi,
38 o tatalo uma,+ o talosaga uma mo lou finagalo malie+ e faia e so o se tagata po o lou nuu uma o Isaraelu,+ auā ua taʻitasi i latou ma iloa le tigā o lona loto,+ e latou te faaloaloa atu foʻi o latou lima i lenei fale,+
39 ia e faafofoga mai mai i le lagi+ i lou afioaga tumau,+ ia e faamagalo+ mai, ma e faia,+ ma foaʻi mai i tagata taʻitoʻatasi e tusa ma ona ala+ uma, auā ua e silafia lona loto+ (auā ua na o oe e silafia lelei loto o le fanau a tagata);+
40 ina ia latou matataʻu+ ai iā te oe i aso uma latou te ola ai i le fogāeleele na e foaʻi mai i o matou augātamā.+
41 “O le tagata ese+ foʻi, e lē o se tagata o lou nuu o Isaraelu, a ua sau mai i se nuu mamao ona o lou suafa+
42 (auā ua latou faalogo i lou suafa mamalu,+ ma lou aao malosi,+ ma lou aao faaloaloa), ua sau ai o ia e tatalo atu i lenei fale,+
43 ia e faafofoga mai mai i le lagi i lou afioaga tumau,+ ia e faia mea uma lava ua talosaga atu ai le tagata ese iā te oe;+ ina ia iloa ai e tagata uma o le lalolagi lou suafa,+ ina ia matataʻu iā te oe e pei foʻi ona faia e lou nuu o Isaraelu, ma latou iloa ai ua taʻua lou suafa i lenei fale ua ou fausia.+
44 “Pe afai e ō atu lou nuu e tau+ ma o latou fili e tusa ma le auala ua e aauina atu ai i latou,+ ma afai latou te tatalo+ atu iā Ieova e faasaga atu i le aai na e filifilia,+ ma le fale na ou faia mo lou suafa,+
45 ia e faafofoga mai mai i le lagi i a latou tatalo ma a latou talosaga mo lou finagalo malie, ia e faia foʻi le faamasinoga mo i latou.+
46 “Afai latou te agasala iā te oe+ (auā e leai lava se tagata e lē agasala),+ ma ua e toʻatamaʻi ai iā i latou ma tuulafoaʻi i latou i le fili, e ave faapagota foʻi i latou e ē na puʻea i latou i le nuu o le fili, pe mamao pe latalata;+
47 ma afai e toe atamamai i latou i le nuu na ave faapagota+ i ai, ma toe foʻi+ mai lava ma talosaga+ atu mo lou finagalo malie i le nuu o ē na puʻea+ i latou e faapea, ‘Ua matou agasala,+ ua matou sesē,+ ua matou faia amioleaga’;+
48 afai foʻi latou te toe foʻi mai iā te oe ma o latou lotoatoa,+ ma o latou malosi atoa i le nuu o o latou fili o ē na aveina faapagota i latou, ma afai latou te tatalo atu iā te oe i le ala o lo latou nuu na e foaʻi mai i o latou augātamā, o le aai na e filifilia, ma le fale na ou faia mo lou suafa;+
49 ia e faafofoga mai mai i le lagi i lou afioaga tumau+ i la latou tatalo, ma a latou talosaga mo lou finagalo malie, ia e faia foʻi le faamasinoga mo i latou,+
50 ia e faamagalo+ lou nuu ua agasala+ atu iā te oe, atoa ma a latou solitulafono+ uma na latou solia ai au tulafono;+ ia e faia foʻi i latou ina ia alolofa mutimutivale+ i ai o ē na puʻea i latou, e latou te alolofa mutimutivale foʻi iā i latou
51 (auā o lou nuu ma lou tofi i latou,+ o ē na e aumaia mai i Aikupito+ mai i totonu o le ogaumu uʻamea),+
52 ina ia silasila mai ou fofoga i le talosaga atu a lau auauna mo lou finagalo malie,+ e faapena foʻi lou nuu o Isaraelu, i lou faafofoga mai i mea uma ua latou valaau atu ai iā te oe.+
53 Ieova e, le Alii Pule Silisili Ese, o oe lava na e vavaeese i latou mai i nuu uma o le lalolagi+ e fai ma ou tofi, e pei lava ona e fetalai mai ai i lau auauna o Mose,+ ina o e aumaia o matou augātamā mai i Aikupito.”
54 Ina ua uma ona tatalo Solomona iā Ieova i lenei tatalo ma lana talosaga atu mo lona finagalo malie, ona ia tulaʻi lea mai i luma o le fata faitaulaga o Ieova, sa tootuli ai i ona tulivae+ ma faaloaloa aʻe ona lima i le lagi;+
55 ua tū+ o ia ma faamanuia+ atu i le faapotopotoga uma o Isaraelu, ua faapea atu ma le leotele:
56 “Ia viia Ieova,+ o lē na tuuina mai le mapusaga mo lona nuu o Isaraelu e tusa ma mea uma na ia folafola mai.+ E leai se upu+ e tasi e leʻi taunuu o ana folafolaga lelei uma, na ia folafola mai e ala i lana auauna o Mose.+
57 Ia faatasi Ieova lo tatou Atua ma i tatou,+ e pei ona ia faatasi ma o tatou augātamā.+ Aua neʻi tuua e ia i tatou, aua foʻi neʻi lafoaʻiina e ia i tatou,+
58 ina ia faaliliuina e ia o tatou loto+ iā te ia e savavali i ona ala uma,+ ma tausi i ana poloaʻiga,+ o tulafono,+ ma iʻuga o ana faamasinoga+ na ia poloaʻi mai ai i o tatou augātamā.
59 O aʻu upu nei ua ou talosaga atu ai i luma o Ieova mo lona finagalo malie, tau ina ia manatua+ e Ieova lo tatou Atua i le ao ma le pō, ina ia faia e ia le faamasinoga mo ana auauna, ma ia faamasinoina e ia lona nuu o Isaraelu, e pei ona manaʻomia i lea aso+ ma lea aso;
60 ina ia iloa+ ai e nuu uma o le lalolagi o Ieova o le Atua moni.+ E leai se isi Atua.+
61 Ia atoatoa+ foʻi o outou loto iā Ieova lo outou Atua i le savavali i ana tulafono, ma ia tausi i ana poloaʻiga e pei ona faia i lenei aso.”
62 Ua faia e le tupu ma Isaraelu uma o loo faatasi ma ia se taulaga tele i luma o Ieova.+
63 Ua ofoina atu e Solomona taulaga faifaatasi+ iā Ieova, e lua sefulu lua afe povi ma mamoe e selau lua sefulu afe,+ na faapaia+ ai e le tupu ma le fanauga uma o Isaraelu le fale o Ieova.
64 O le aso lenā na faapaia ai e le tupu le ogatotonu o le lotoā o loo i luma o le fale o Ieova,+ auā o i inā na ia ofoina ai taulaga mū, o taulaga i meaʻai, ma gaʻo o taulaga faifaatasi; auā ua laʻitiiti tele le fata faitaulaga ʻapamemea+ o loo i luma o Ieova, na lē ofi ai taulaga mū, o taulaga i meaʻai, ma gaʻo+ o taulaga faifaatasi.
65 Ona faia lea e Solomona ma Isaraelu uma sa faatasi ma ia, o se tausamiga+ i luma o Ieova lo tatou Atua i lenā taimi, o se faapotopotoga+ na matuā toʻatele lava e amata mai i le mea e ui atu ai i Amato,+ e alu ifo i le ālia o Aikupito,+ e fitu aso ma le isi fitu aso,+ e sefulu fā ia aso.
66 Ona ia tuu atu lea o le nuu e ō i le aso lona valu;+ ua latou faamanuia foʻi i le tupu ma ō atu i o latou fale, ua olioli+ ma fiafia o latou loto+ i mea lelei+ uma na faia e Ieova mo Tavita lana auauna, ma lona nuu o Isaraelu.
Faamatalaga Pito i Lalo
^ Po o “lē e tupuga mai i lou puimanava.”
