2 Korinito 1:1-24
1 O aʻu o Paulo o le aposetolo+ a Keriso Iesu i le finagalo o le Atua, ma Timoteo+ lo tatou uso, o le tusi lenei i le faapotopotoga a le Atua i Korinito, atoa ma le ʻaupaia+ o ē o i Akaia+ uma:
2 Ia iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso.+
3 Ia viia le Atua o le Tamā+ o lo tatou Alii o Iesu Keriso, le Tamā o le alofa mutimutivale,+ ma le Atua o faamāfanafanaga uma,+
4 o lē na te faamāfanafanaina i tatou i o tatou puapuaga uma,+ ina ia mafai foʻi ona tatou faamāfanafana+ atu i ē ua oo i ai so o se puapuaga, i le faamāfanafanaga ua faamāfanafanaina ai i tatou e le Atua.+
5 Auā e pei ona tele o o tatou mafatiaga ona o Keriso,+ ua faapena foʻi ona tele faamāfanafanaga ua oo mai iā i tatou ona o Keriso.+
6 E tusa lava pe e oo mai puapuaga mai iā i matou, ae e faamāfanafanaina ai foʻi ma faaolaina+ ai outou; pe a faamāfanafanaina i matou, e faamāfanafanaina ai outou, ma mafai ai ona outou tumau i mafatiaga na mafatia ai foʻi i matou.+
7 O le mea lea, e tumau ai lo matou faamoemoe iā te outou i le iloa e faapea, e pei ona oo o mafatiaga iā te outou, e faapea foʻi ona maua e outou o faamāfanafanaga.+
8 Le ʻauuso e, matou te mananaʻo e faailoa atu puapuaga na oo iā i matou i le itumalo o Asia,+ na matuā mafatia i matou e sili atu i lo o le mea na matou lavātia, na oo foʻi ina matou popole neʻi o matou feoti.+
9 O le mea moni, na matou manatu ua faasalaina i matou i le oti. Na tupu lenā mea ina ia matou faatuatuaina ai,+ e lē o i matou lava, a o le Atua o lē na te faatūina o ē ua feoti.+
10 Na ia laveaʻi mai foʻi iā i matou ai le mataʻutia o le oti; o le a ia laveaʻi lava i matou,+ ma ua matou faamoemoe iā te ia e na te toe laveaʻia i matou.+
11 E mafai foʻi ona outou fesoasoani mai e ala i a outou tatalo faatauanau mo i matou,+ ina ia tuuina atu le faafetai+ e tagata e toʻatele mo i matou, mo mea ua foaʻi mai ma le agalelei ona o tatalo a le toʻatele.+
12 Auā o le mea lenei ua matou mitamita ai, lea ua molimau i ai o matou lotofuatiaifo,+ o le paia ma le faamaoni i le Atua, e lē tusa ma le atamai faaletagata,+ a o le agalelei faifua o le Atua, sa matou amioaʻi ai i le lalolagi, aemaise lava iā te outou.
13 Auā e matou te lē o tusi atu iā te outou nisi mea, a o mea ua outou iloa lelei ma malamalama i ai; o mea foʻi ia ou te faamoemoe o le a faaauau pea ona outou malamalama i ai e oo i le iʻuga,+
14 e pei ona iloa e nisi o outou, ua fai i matou ma mea e tou te mitamita+ ai, e pei foʻi o le a matou mitamita ona o outou i le aso o lo tatou Alii o Iesu.+
15 Na ou mautinoa foʻi i lenei mea, o lea na ou fuafua muamua ai ou te alu atu iā te outou,+ ina ia maua se mea e tou te olioli faalua ai,+
16 pe a uma ona ou afe atu iā te outou i laʻu malaga i Maketonia,+ ma toe foʻi mai Maketonia iā te outou,+ ona outou momoli*+ lea o aʻu i Iutaia.
17 Ae ina ua ou faia lea fuafuaga, pe na ou manatu māmā+ ea i ai? O mea na ou fuafua e fai, pe na ou fuafua ea e tusa ma manatu faaletagata,+ ma ou fai atu “Ioe, o lea lava” ona ou toe fai atu lea e “Leai, e leai lava”?+
18 Ae e faamaoni le Atua, na matou lē fai atu iā te outou, Ioe, ona toe fai atu lea e Leai.
19 Auā o Keriso Iesu le Alo o le Atua,+ lea na matou talaʻiina atu iā te outou, o aʻu, ma Siluano,* ma Timoteo,+ e leʻi avea o ia ma Ioe ma toe Leai, ae na o le Ioe lava.+
20 Auā po o le ā lava le tele o folafolaga+ a le Atua, a ua Ioe uma ona o ia.+ E ala iā te ia, ua tatou faapea atu ai “Amene”+ i le Atua ina ia tatou faamamaluina o ia.
21 A o lē ua faamaonia o outou ma i matou o tagata o Keriso, ma o lē na faauuina+ i tatou, o le Atua lea.
22 Ua ia faamaufaailogaina+ i tatou, ma tuuina mai iā i tatou le faamaoniga+ o le mea o le a oo mai, o le agaga lea,+ i o tatou loto.
23 Ou te manaʻo e fai le Atua ma molimau+ i loʻu nei ola, ou te leʻi alu atu i Korinito ina neʻi atili ai ona outou mafatia.+
24 Matou te lē fia pule+ i lo outou faatuatua, ae o i matou o le ʻaufaigaluega+ faatasi ma outou mo lo outou olioli, auā o lo outou faatuatua+ ua outou tutumau ai.+
