2 Nofoaiga a Tupu 1:1-17
1 Ua maua pea e Solomona le atalii o Tavita le malosi i lona malo,+ ua faatasi foʻi Ieova ma ia+ ma faateleina pea lona mamalu.+
2 Ua fai atu Solomona iā Isaraelu uma, o taʻitaʻi o le taʻitoʻaafe+ ma le taʻitoʻaselau,+ o faamasino,+ o taʻitaʻi uma o Isaraelu+ uma, ma matai o aiga o o latou tamā.+
3 Ona ō atu lea o Solomona ma le faapotopotoga uma faatasi ma ia i le mea maualuga sa i Kipeona;+ auā o i inā sa iai le faleʻie o le feiloaʻiga+ a le Atua moni, lea na fausia e Mose le auauna+ a Ieova i le toafa.
4 Ae peitaʻi, o le atolaau+ a le Atua moni na ave aʻe e Tavita mai i Kiriata-iarima+ i le mea na saunia e Tavita e tuu ai,+ auā na ia faatūina se faleʻie i Ierusalema+ e tuu ai.
5 O le fata faitaulaga+ ʻapamemea na fausia e Pesaleli+ le atalii o Auri, le atalii o Huro,+ na tuu i luma o le faleʻie paia o Ieova; ma na ō atu i ai Solomona ma le faapotopotoga e fesili atu ai i le Atua e pei ona masani ai.
6 Na faia e Solomona taulaga i inā i luma o Ieova i luga o le fata faitaulaga ʻapamemea sa i le faleʻie o le feiloaʻiga, ma na ia ofoina atu ai taulaga mū+ e afe.
7 I le pō lenā, na faaali mai ai le Atua iā Solomona ma fetalai mai iā te ia: “Ia e fai mai! O le ā se mea ou te avatua iā te oe?”+
8 Ona faapea atu lea o Solomona i le Atua: “O oe lava na e matuā alofa faamaoni iā Tavita loʻu tamā,+ ma ua e fai foʻi aʻu ma tupu e sui iā te ia.+
9 O lenei, Ieova e, le Atua, ia faataunuuina+ lau folafolaga na fai mai iā Tavita loʻu tamā, auā o oe lava na e faia aʻu ma tupu+ i lenei nuu e matuā toʻatele, e pei o le efuefu o le eleele.+
10 Ia e foaʻi mai iā te aʻu le atamai ma le poto+ ina ia ou fealuaʻi+ i luma o lenei nuu, auā po o ai se tasi e mafai ona faamasinoina lou nuu ua matuā toʻatele?”+
11 Ona fetalai mai lea o le Atua iā Solomona: “Talu ai ua naunau lou loto+ i lenei mea ma ua e lē talosaga mai mo le tamaoaiga, o ʻoa, ma le mamalu, pe ia faaumatia i latou o ē e ita iā te oe, ua e lē talosaga mai foʻi mo ni aso se tele o lou ola,+ a ua e talosaga mai mo le atamai ma le poto e mafai ai ona e faamasinoina loʻu nuu ua ou faia ai oe ma tupu,+
12 ua ou foaʻiina atu ai le atamai ma le poto iā te oe;+ ou te foaʻiina atu foʻi iā te oe le tamaoaiga, o ʻoa, ma le mamalu, e leʻi faapea ona iai i tupu o ē na muamua atu iā te oe,+ e lē faapea foʻi i ē o le a mulimuli mai iā te oe.”+
13 Ona sau lea o Solomona i Ierusalema mai i le mea maualuga sa i Kipeona,+ mai i luma o le faleʻie o le feiloaʻiga,+ ma faaauau ona pule i Isaraelu.+
14 Ua faapotopoto mai pea e Solomona o kariota ma solofanua, ua iā te ia o kariota e afe fā selau ma solofanua+ e sefulu lua afe, ua ia tuu foʻi i aai o kariota+ e latalata ane i le tupu i Ierusalema.
15 Ua faia e le tupu o siliva ma auro i Ierusalema ia pei o maa;+ ua ia faia foʻi laupapa arasi ia pei o laau o le sukamoru+ i vaipanoa o le Sefila,+ ua matuā tele lava.
16 Na aumai e Solomona solofanua mai i Aikupito,+ ma na ave foʻi e le ʻaufaatauʻoa a le tupu o solofanua i se tau.+
17 Na masani ona latou ave aʻe ma aumai mai i Aikupito se kariota i tupe siliva e ono selau, ma se solofanua i tupe siliva e selau lima sefulu; na faapena foʻi ona faia e tupu uma o tagata Hetī ma tupu o Suria.+ O i latou na ala mai ai a latou fefaatauaʻiga.
