2 Nofoaiga a Tupu 10:1-19
10 Ua alu atu Reopoamo+ i Sekema,+ auā na ō mai tagata Isaraelu uma i Sekema e fai o ia ma tupu.
2 Ina ua faalogo i ai Ierepoamo+ le atalii o Nepata i lea mea a o iai o ia i Aikupito,+ (auā na sola ese o ia ona o le tupu o Solomona), ona toe foʻi mai ai lea o Ierepoamo mai i Aikupito.+
3 Ua latou aauina atu nisi e aami iā te ia, ona ō mai lea o Ierepoamo ma Isaraelu uma ua fai mai iā Reopoamo, e faapea:+
4 “Na faamamafa e lou tamā a matou amo;+ a o lenei, ia e faamāmā le galuega faigatā a lou tamā ma lana amo mamafa+ na ia faaee mai iā i matou, ona matou auauna atu ai lea iā te oe.”+
5 Ona ia fai atu lea iā i latou: “Tuu mai ni aso se tolu. Ona outou toe foʻi mai lea iā te aʻu.” Ona ō ai lea o le nuu.
6 Ona talatalanoa+ lea o le Tupu o Reopoamo faatasi ma toeaina, o ē na avea ma faufautua iā Solomona lona tamā a o ola o ia, ua faapea atu: “O le ā sa outou fautuaga e tali atu ai i lenei nuu?”+
7 Ona latou fai mai lea iā te ia, e faapea: “Afai e te agalelei i lenei nuu ma e faafiafia i latou, ma tautala atu i upu lelei iā i latou,+ ona latou auauna ai pea lea iā te oe.”+
8 Ae peitaʻi, ua ia tuua le fautuaga+ a toeaina o ē na fautua iā te ia, a ua ia talatalanoa ma tauleleʻa na ola aʻe faatasi ma ia,+ o ē na avea ma ana faufautua.+
9 Ona ia fai atu lea iā i latou: “O le ā sa outou fautuaga+ e tatou te tali atu ai i lenei nuu, o ē na faapea mai iā te aʻu, ‘Ia faamāmā le avega a lou tamā na faaee mai iā i matou’?”+
10 Ona fai mai lea o tauleleʻa na ola aʻe faatasi ma ia, e faapea: “Ia faapea ona e fai atu i lenei nuu o ē na fai mai iā te oe, e faapea, ‘Na faamamafa e lou tamā a matou avega, a o lenei, ia faamāmā iā i matou’; ia faapea foʻi ona e fetalai atu iā i latou,+ ‘O le a sili atu ona mamafa le avega ou te tuu atu iā te outou nai lo o loʻu tamā.*+
11 O lenei, na faaee atu e loʻu tamā iā te outou se avega mamafa, a o aʻu, ou te faaopoopo atu la outou avega iā te outou.+ Na aʻoaʻi outou e loʻu tamā i sasa, a o aʻu, ou te aʻoaʻi outou i sasa matuitui.’”+
12 Ona ō mai lea o Ierepoamo ma le nuu uma iā Reopoamo i le aso lona tolu, e pei ona fai mai ai le tupu, e faapea: “Ia outou toe foʻi mai iā te aʻu i le aso lona tolu.”+
13 Ona tali atu lea o le tupu iā i latou ma le sauā.+ Ua tuua e le Tupu o Reopoamo fautuaga+ a toeaina,+
14 a ua ia tautala atu iā i latou e tusa ai ma fautuaga a tauleleʻa,+ ua faapea atu: “Ou te faamamafa atili a outou avega ma faaopoopo i ai. Na aʻoaʻi outou e loʻu tamā i sasa, a o aʻu, ou te aʻoaʻi outou i sasa matuitui.”+
15 Ae e leʻi faalogo le tupu i le nuu; auā o lenei mea e mai i le Atua moni,+ ina ia faataunuu ai e Ieova lana afioga+ na fetalai mai ai e ala iā Akia+ le Sailo,+ e fai atu iā Ierepoamo le atalii o Nepata.+
16 Talu ai e leʻi faalogo le tupu iā Isaraelu uma, ona tali atu lea o le nuu i le tupu, ua faapea atu: “Pe e iai ea so matou tofi mai iā Tavita?+ E leai so matou tofi mai i le atalii o Iese.+ Isaraelu e! Inā foʻi atu ia i ou atua.+ Tavita e, faitalia oe ma lou aiga.”+ Ona ō ai lea o Isaraelu uma i o latou faleʻie.
17 A ua pule pea Reopoamo i le fanauga a Isaraelu, o ē o loo nonofo i aai o Iuta.+
18 Mulimuli ane, ua auina atu e le Tupu o Reopoamo o Aturamo,+ o lē na tofia e vaavaaia galuega mamafa, a ua fetogia o ia i maa+ e le fanauga a Isaraelu, ma ua oti ai o ia. Ona tulaʻi lea o le Tupu o Reopoamo ua alu i lana kariota, ua sola atu i Ierusalema.+
19 Ua faaauau pea ona fouvale+ tagata Isaraelu i le aiga o Tavita e oo mai i le aso nei.
Faamatalaga Pito i Lalo
^ I le gagana Eperu, “e sili atu ona mafiafia loʻu tamatamaʻilima, nai lo o suilapalapa o loʻu tamā.”
