2 Nofoaiga a Tupu 26:1-23
26 Ina ua sefulu ono tausaga o Usia,+ ona ave ai lea o ia e le nuu uma+ o Iuta, ma ua latou faia+ o ia ma tupu e sui i lona tamā o Amasia.+
2 O ia lea na toe fausiaina Elata+ ma toe faafoʻisia iā Iuta, ina ua taoto le tupu faatasi ma ona augātamā.+
3 E sefulu ono tausaga o Usia+ ina ua fai o ia ma tupu, ma e lima sefulu lua tausaga na pule ai o ia i Ierusalema. O le igoa o lona tinā o Iekalia+ mai i Ierusalema.
4 Na ia faia pea mea ua tonu i le silafaga a Ieova,+ e tusa ma mea uma na faia e lona tamā+ o Amasia.
5 Na saʻili+ pea o ia i le Atua i aso o Sakaria, o lē na aʻoaʻoina o ia e mataʻu i le Atua moni;+ ma i aso na saʻili ai o ia iā Ieova, na faamanuia+ ai o ia e le Atua moni.
6 Ua alu atu o ia ua tau ma Filisitia+ ma lepeti le pā o Kata,+ o le pā o Iapene,+ ma le pā o Asetota,+ ona ia faia lea o aai i laueleele o Asetota+ ma Filisitia.
7 Na faaauau foʻi ona fesoasoani+ le Atua moni iā te ia e tau ma Filisitia ma tagata Arapi,+ o ē na nonofo i Kuropaala ma Meunima.+
8 Ona aumai lea e tagata o Amoni+ o meaalofa+ iā Usia. Mulimuli ane, ua lauiloa+ o ia e oo atu lava i Aikupito auā na ia faaalia lona malosi tele.
9 Ua faia foʻi e Usia o ʻolo+ i Ierusalema i tafatafa o le Faitotoʻa o le Tulimanu,+ o le Faitotoʻa o le Vanu,+ ma le Tulimanu o le Pā, ma na ia faia ia malolosi.
10 Na ia faia foʻi ʻolo+ i le toafa, ma eli le tele o vaieli (auā na iai ana lafumanu e tele), atoa foʻi ma vaipanoa o le Sefila+ ma fanua laugatasi. Na iai foʻi le ʻaufaifaatoʻaga ma ē e galulue vine i mauga ma Karamelu, auā na fiafia o ia e faia faatoʻaga.
11 Na iai foʻi iā Usia ni fitafita o le taua, o ē na ō atu i le vaegaʻau,+ e tusa ma le aofaʻi o i latou na lesitalaina+ i le taʻitaʻiga a Ieielu le failautusi+ ma Maaseia le leoleo, i le pule+ a Hanania o se alii sili+ a le tupu.
12 O le aofaʻiga atoa o matai o aiga o tamā,+ o tagata totoa+ ma malolosi,+ e toʻalua afe ono selau.
13 Ua pule foʻi i latou i ʻautau o tagata e toʻatolu selau ma le fitu afe lima selau o loo iai i se ʻautau malosi e fesoasoani i le tupu e tau ma ona fili.+
14 Na saunia pea e Usia mo i latou o le ʻautau atoa o talipupuni,+ o tao,+ o pulou tau,+ o ofutau uʻamea,+ o ʻaufana,+ ma maatā.+
15 Ua ia faia foʻi i Ierusalema o masini tau, ia na faia e tagata inisinia, ina ia iai i luga o ʻolo+ ma luga o tulimanu ina ia fana ai aū ma maa tetele. Na iʻu ina lauiloa+ o ia i nofoaga mamao, auā na ia maua le tele o le fesoasoani seʻia oo ina malosi.
16 Ae peitaʻi, ina ua malosi o ia, ona faamaualuga+ lea o lona loto ua oo lava ina malaia+ ai o ia, ua ia gaoioi ai foʻi ma le lē faamaoni iā Ieova lona Atua, ua alu atu i le malumalu o Ieova ma faamū ai mea manogi i luga o le fata faitaulaga o mea manogi.+
17 Ona mulimuli atu loa lea iā te ia o Asaraia le ositaulaga atoa ai ma ositaulaga a Ieova na faatasi ma ia, o tagata totoa e toʻavalu sefulu.
18 Ona latou tetee atu lea i le tupu+ o Usia ma faapea atu iā te ia: “Usia e, e leai se feʻau+ e te faamū ai mea manogi iā Ieova, o le feʻau lenā a atalii o Arona,+ o ositaulaga, o ē ua faapaiaina e faamū mea manogi. Ia e alu i fafo mai i le malumalu, auā ua e gaoioi ma le lē faamaoni, ma e leai se mamalu+ e tuuina atu e Ieova lou Atua iā te oe.”
19 A ua matuā ita+ Usia a o i lona lima le ipu+ e faamū ai mea manogi, ma a o ita o ia i ositaulaga, ona sosolo+ lea o le lepela+ i lona muāulu i luma o ositaulaga i le fale o Ieova i tafatafa o le fata faitaulaga o mea manogi.
20 Ina ua liliu atu Asaraia le faitaulaga sili ma ositaulaga uma iā te ia, vaai, ua taia o ia i le lepela i lona muāulu!+ Ona latou aveese vave lea o ia mai i inā, ma ua faatopetope foʻi ona alu o ia i fafo, auā ua taia o ia e Ieova.+
21 Ua avea pea le tupu o Usia+ ma lepela e oo lava i le aso na oti ai, sa nofo pea o ia o se lepela+ i le fale, e na te leʻi toe faia ona tiute; auā ua faateʻaeseina o ia mai i le fale o Ieova, a o Iotama lona atalii na pule i le aiga o le tupu, ua ia faamasinoina tagata o le nuu.
22 A o le olaga uma o Usia,+ o mea muamua ma mea mulimuli, na tusia ia e Isaia+ le perofeta le atalii o Amota.+
23 Mulimuli ane, ona taoto lea o Usia faatasi ma ona augātamā; ma ua latou tanu o ia faatasi ma ona augātamā i le fanuatanu o tupu,+ auā ua latou faapea ane: “O ia o le lepela.” Ona pule lea o Iotama+ lona atalii e sui iā te ia.
