2 Nofoaiga a Tupu 28:1-27
28 E lua sefulu tausaga o Aasa+ ina ua fai o ia ma tupu, ma e sefulu ono tausaga na ia pule ai i Ierusalema,+ e na te leʻi faia foʻi le mea ua tonu i le silafaga a Ieova, e pei o Tavita lona augātamā.+
2 Na savali o ia i ala o tupu o Isaraelu,+ ma na ia faia foʻi tupua uʻamea+ o Paala.+
3 Na ia faamū taulaga+ i le vanu o le atalii o Hinoma,+ ma ia susunu ona atalii+ i le afi, e tusa ai ma mea inosia+ a nuu ese o ē na tuliesea e Ieova mai i luma o le fanauga a Isaraelu.+
4 Na ia faia pea taulaga+ ma faamū taulaga i mea maualuluga,+ ma luga o aʻega,+ ma lalo ifo o laau lauolaola uma.+
5 Ona tuuina atu lea o ia e Ieova lona Atua i lima+ o le tupu o Suria,+ ma ua latou fasia o ia ma ave faapagota le toʻatele o tagata, ma avatu i latou i Tamaseko.+ Na tuuina atu o ia i lima o le tupu o Isaraelu,+ ma ua ia fasia foʻi o ia i le fasi tele.
6 Ua fasiotia e Peka+ le atalii o Remalia+ i Iuta o tagata totoa uma e toʻaselau lua sefulu afe i le aso e tasi, auā ua latou tuua Ieova+ le Atua o o latou augātamā.
7 Ua fasiotia foʻi e Sekari le tagata malosi mai i Efaraima,+ o Maaseia le atalii o le tupu, o Aserikama le taʻitaʻi o le aiga, ma Elekana o lē na pito atu i le tupu.
8 Ua ave faapagota foʻi e le fanauga a Isaraelu o latou uso e toʻalua selau afe, o fafine, o atalii, ma afafine; ma ua latou faoa mai iā i latou le tele o le vete, ma avatu na mea na vetea i Samaria.+
9 Sa iai i inā le perofeta a Ieova, o lona igoa o Oteta. Ua alu atu o ia i luma o le ʻautau lea na ō mai i Samaria, ma faapea atu iā i latou: “Faauta! Talu ai ua toʻasā+ Ieova le Atua o o outou augātamā iā Iuta, ua ia tuuina mai ai i latou i o outou lima, ma ua outou fasiotia i latou i lo outou ita tele,+ ua paʻi atu lava i le lagi.+
10 O lenei, ua outou manatu e faapologaina le fanauga a Iuta ma Ierusalema, e fai ma auauna tane+ ma auauna fafine mo outou. Pe tou te lē o nofosala ai ea iā Ieova lo outou Atua?
11 O lenei, ia outou faalogo mai iā te aʻu ma ia toe faafoʻi atu o ē na outou aveina faapagota mai i outou uso,+ auā ua matuā toʻasā Ieova iā te outou.”+
12 O lea, na tulaʻi ai nisi tagata o matai+ o le fanauga a Efaraima,+ o Asaraia le atalii o Iokana, o Perekia le atalii o Meselemota, o Iesekia le atalii o Saluma, ma Amase le atalii o Atalai, ma siitaua atu iā i latou na ō mai mai i le vaegaʻau,
13 ua latou faapea atu iā i latou: “Aua neʻi outou aumaia i inei o pagota, auā o le a iʻu ina matou nofosala ai iā Ieova. Ua outou manatu e faaopoopo i a matou agasala ma lo matou nofosala, auā ua matuā nofosala i matou,+ ua matuā toʻasā+ ai foʻi iā Isaraelu.”
14 Ona tuua lea e tagata ua faaauupegaina+ o pagota+ ma mea na faoa, i luma o alii sili+ ma le faapotopotoga uma.
15 Ona tutulaʻi lea o tagata na tofia o latou igoa+ ma ave pagota, ua latou faaofuina o latou tagata ua lē lavalavā mai i mea o le vete. Ua latou faaofu+ ma faaseevaeina i latou, ua fafaga,+ faainu,+ ma uu i latou i le suāuu. O so o se tasi foʻi na vaivai ua latou faatiʻetiʻe+ i asini, ma avatu i latou i Ieriko+ le aai o laau pama,+ i tala ane o o latou uso. Ona latou toe foʻi atu lea i Samaria.+
16 O le taimi lenā, na auina atu ai e le Tupu o Aasa+ le feʻau i tupu o Asuria+ ina ia o latou fesoasoani mai iā te ia.
17 Ona toe ō mai foʻi lea o tagata Etoma,+ ua latou fasia Iuta ma ave faapagota i latou.
18 Ua osofaʻia foʻi e Filisitia+ aai o vaipanoa o le Sefila,+ ma vaipanoa o le Nekepi+ i Iuta, ua latou faoa ai Petesemesa,+ o Ailona,+ o Kiterota,+ o Suka+ ma ona tamaʻi aai, o Timenata+ ma ona tamaʻi aai, ma Kimeso ma ona tamaʻi aai; ona latou nonofo ai lea i inā.
19 A ua faamaulalo+ e Ieova Iuta ona o Aasa le tupu o Isaraelu, auā ua ia faataga amioga leaga e faia i Iuta,+ ma ua ia gaoioi foʻi ma le lē faamaoni tele lava iā Ieova.
20 Mulimuli ane, ona siitaua mai lea o Tilika-pilesa+ le tupu o Asuria iā te ia, ua faatigā+ iā te ia ma e leʻi fesoasoani iā te ia.
21 Auā ua ave e Aasa mea mai i le fale o Ieova,+ o le fale o le tupu,+ ma fale o alii sili,+ ua ia faia ai le meaalofa mo le tupu o Asuria;+ ae e leʻi fesoasoani iā te ia.
22 Ae peitaʻi, a o ia faatigā iā te ia i lenā taimi, ua atili ai ona ia gaoioi pea ma le lē faamaoni iā Ieova, o le mea lea na faia e le Tupu o Aasa.+
23 Ua ia fai taulaga foʻi i atua+ o Tamaseko+ na fasia o ia, ma ua ia faapea ane: “Talu ai o loo fesoasoani atua o tupu o Suria iā i latou,+ o lea la, ou te fai taulaga ai iā i latou, ina ia latou fesoasoani+ mai iā te aʻu.” Ua avea foʻi i latou ma mea e tausuai+ ai o ia faapea ma Isaraelu uma.
24 Ua aoaoina foʻi e Aasa o ipu+ o le fale o le Atua moni, ma taʻei ipu o le fale o le Atua moni,+ ua ia tapunia foʻi faitotoʻa+ o le fale o Ieova, ma faia mo ia lava o fata faitaulaga i itu uma o Ierusalema.+
25 Ua ia faia foʻi i aai uma, e oo lava i aai o Iuta, o mea maualuluga+ e faamū ai taulaga i isi atua,+ ma ua ia faatigā+ ai iā Ieova le Atua o ona augātamā.
26 A o lona olaga uma,+ o ona ala uma, o mea muamua ma mea mulimuli, ua tusia ia i le Tusi+ o Tupu o Iuta ma Isaraelu.
27 Mulimuli ane, ua taoto Aasa faatasi ma ona augātamā, ma ua latou tanu o ia i le aai i Ierusalema, ae latou te leʻi aumaia o ia i fanuatanu o tupu o Isaraelu.+ Ona pule lea o Esekia lona atalii e sui iā te ia.
