2 Nofoaiga a Tupu 30:1-27
30 Ona alu atu lea o le feʻau a Esekia iā Isaraelu+ uma ma Iuta, ua ia tusia foʻi ni tusi iā Efaraima+ ma Manase+ ina ia ō mai i le fale o Ieova+ i Ierusalema, e faia ai le paseka+ iā Ieova le Atua o Isaraelu.
2 Ae peitaʻi, ua manatu le tupu, o ona alii sili,+ ma le faapotopotoga+ uma i Ierusalema e faia le paseka i le masina lona lua;+
3 auā e leʻi mafai ona latou faia le paseka i lenā taimi,+ ona e leʻi lava ositaulaga+ na faapaiaina i latou ma le nuu, ma e leʻi faapotopotoina foʻi i latou i Ierusalema.
4 Ua tonu lea mea i le manatu o le tupu ma manatu o le faapotopotoga+ uma.
5 Ona latou filifili lea e faaoo atu le valaau+ i Isaraelu uma, e amata mai i Peresepa+ e oo atu i Tanu,+ ina ia ō mai i Ierusalema e fai le paseka iā Ieova le Atua o Isaraelu; auā e lē toʻatele na faia faapea+ e tusa ai ma mea ua tusia.+
6 Ona ō atu lea o avefeʻau+ ma tusi mai i le lima o le tupu ma ona alii sili,+ ua latou ō i Isaraelu uma ma Iuta, e tusa ai ma le poloaʻiga a le tupu e faapea: “O outou le fanauga a Isaraelu e, inā toe foʻi+ mai ia iā Ieova le Atua+ o Aperaamo, o Isaako, ma Isaraelu, ina ia toe foʻi mai o ia iā te outou o totoe, o ē ua sao mai+ i lima o tupu o Asuria.+
7 Aua neʻi pei o o outou augātamā,+ aua foʻi neʻi pei o o outou uso na lē faamaoni iā Ieova le Atua o o latou augātamā, na ia faia ai i latou ma mea e ofo ai,+ e pei ona outou vāai i ai.
8 O lenei, aua tou te faauamaaa+ e pei ona faia e o outou augātamā. Ia outou gauaʻi iā Ieova,+ ma ia ō mai i lona malumalu+ lea na ia faapaiaina+ i aso uma lava, ma ia auauna+ iā Ieova lo outou Atua, ina ia liliuese ai lona toʻasā+ tele mai iā te outou.
9 Afai tou te toe foʻi mai+ iā Ieova, ona alolofa mutimutivale+ lea o ē na puʻea o outou uso ma o outou atalii iā i latou, ma faataga i latou e toe foʻi mai i lenei nuu;+ auā e alofa fua+ ma e alofa mutimutivale+ Ieova lo outou Atua, ma e lē liliuese ona fofoga mai iā te outou, pe afai tou te toe foʻi mai iā te ia.”+
10 Ua faaauau pea ona ō atu avefeʻau+ i lea aai ma lea aai i le nuu atoa o Efaraima,+ ma Manase e oo lava iā Sepulona; a ua latou tautatala faaʻamuʻamu pea iā i latou, ma faifai iā i latou.+
11 E na o tagata+ mai i Asera, o Manase, ma Sepulona, na faamaulalo+ i latou ma ō mai i Ierusalema.
12 Na iai foʻi le aao o le Atua moni iā Iuta e foaʻi mai iā i latou le lotogatasi+ e fai ai le poloaʻiga+ a le tupu ma alii sili e tusa ai ma le tapuaʻiga iā Ieova.+
13 Ua latou faapotopoto faatasi i latou i Ierusalema,+ o le nuu e matuā toʻatele lava, e faia le tausamiga+ o falaoa e lē faafefeteina i le masina lona lua,+ o se faapotopotoga e matuā toʻatele lava.
14 Ona latou tutū lea i luga ma aveeseina fata faitaulaga+ sa i Ierusalema, ua latou aveesea foʻi fata faitaulaga+ uma o mea manogi, ma lafo i le ālia o Ketarono.+
15 Mulimuli ane, ua latou fasia manu mo le paseka+ i le aso lona sefulu fā o le masina lona lua; ua māsiasi foʻi le ʻauositaulaga ma sa Levī, o lea ua latou faapaiaina+ ai i latou ma aumai taulaga mū i le fale o Ieova.
16 Ua latou tutū pea+ i o latou tulaga e tusa ai ma la latou tulafono, e tusa ai foʻi ma le tulafono a Mose le tagata o le Atua moni, ma ua sausau foʻi e ositaulaga+ le toto na talia mai i lima o sa Levī.
17 Auā e toʻatele i latou i le faapotopotoga e leʻi faapaiaina; na vaaia foʻi e sa Levī+ le fasiga o manu+ o le paseka mo ē uma ua lē mamā, ina ia faapaiaina i latou iā Ieova.
18 Auā e toʻatele le faitau aofaʻi o le nuu, e toʻatele mai i Efaraima,+ o Manase,+ o Isakara, ma Sepulona,+ e leʻi faamamāina+ i latou, auā latou te leʻi aai i le paseka e tusa ma le mea ua tusia;+ ae na tatalo Esekia mo i latou,+ ua faapea atu: “Tau ina ia faamagalo e Ieova o lē e lelei,+
19 i latou uma ua saunia o latou loto+ e saʻili ai i le Atua moni o Ieova, o le Atua o ona augātamā, e ui e leʻi faamamāina e tusa ma le mea paia.”+
20 Ona faafofoga mai lea o Ieova iā Esekia, ma faamālōlōina le nuu.+
21 Ua faia foʻi ma le olioli+ tele e le fanauga a Isaraelu o ē na maua i Ierusalema, le tausamiga+ o falaoa e lē faafefeteina mo aso e fitu; na ofo atu ai e sa Levī+ ma ositaulaga+ o viiga iā Ieova i lea aso ma lea aso i meafaifaaili leotetele, e vivii atu ai iā Ieova.+
22 Ua tautala atu foʻi ma le agalelei+ Esekia i sa Levī uma o ē na auauna ma le matuā faautauta iā Ieova.+ Ua latou aai foʻi i le tausamiga ua tofia mo aso e fitu,+ ma faia ai taulaga faifaatasi,+ ma taʻutino ai a latou agasala+ iā Ieova le Atua o o latou augātamā.
23 Ona filifili+ lea o le faapotopotoga uma e fai le tausamiga mo isi aso e fitu,+ ona latou faia lea ma le olioli mo isi aso e fitu.
24 A ua foaʻi+ atu e Esekia le tupu o Iuta mo le faapotopotoga o povi poʻa e afe ma mamoe e fitu afe, a o alii sili+ ua latou foaʻi atu mo le faapotopotoga o povi poʻa e afe ma mamoe e sefulu afe; ua faapaiaina foʻi e ositaulaga+ i latou lava e matuā toʻatele.
25 Ua olioli+ pea le faapotopotoga uma o Iuta,+ o ositaulaga, o sa Levī,+ o le faapotopotoga uma na ō mai mai i Isaraelu,+ o tagata ese+ na ō mai mai i le nuu o Isaraelu,+ ma i latou na nonofo i Iuta.
26 Na iai foʻi le olioli tele i Ierusalema,+ auā e leʻi tupu se mea faapea i Ierusalema talu mai aso o Solomona+ le atalii o Tavita le tupu o Isaraelu.
27 Mulimuli ane, ona tutū lea i luga o ositaulaga ma sa Levī, ua faamanuia+ i le nuu; ona faafofogaina lea o o latou leo, ma ua oo atu a latou tatalo i lona afioaga paia i le lagi.+
