2 Nofoaiga a Tupu 4:1-22
4 Ona ia faia lea o le fata faitaulaga ʻapamemea+ e lua sefulu kupita le umi, e lua sefulu kupita lona lautele, ae e sefulu kupita lona maualuga.+
2 Ua ia faia foʻi le vai ʻapamemea,+ e sefulu kupita e amata mai i le tasi augutu i le isi augutu e faataaliʻoliʻo ai, e lima kupita lona maualuga, ma e tolu sefulu kupita le umi o le manoa e fua faataaliʻoliʻo ai.+
3 Sa iai foʻi teuteu e pei o vine vao+ sa faataamilo i lalo ifo e siʻo ai, e sefulu i le kupita e tasi, ua faataaliʻoliʻo ai le vai.+ E taʻilua atu vine vao na teuteu ai ina o faia.
4 Ua faatū le vai i luga o povi poʻa+ e sefulu lua, e tolu e faasasaga i le itu i mātū, e tolu e faasasaga i le itu i sisifo, e tolu e faasasaga i le itu i saute, ma e tolu e faasasaga i le itu i sasaʻe; ua tuu i o latou luga le vai, o loo ū uma o latou tua i totonu.+
5 O lona mafiafia e tusa lea ma le alofilima; o lona augutu ua faia e pei o le augutu o le ipu tī, ua faia i fugālaau o le lili.+ E tolu afe paita* o vai+ e mafai ona tumu ai.+
6 Ua ia faia foʻi pesini e sefulu, ma tuu le lima i le itu taumatau ma le lima i le itu tauagavale+ e fulufulu ai.+ E latou te fufulu ai mea e fai ai taulaga mū.+ A o le vai e mo le ʻauositaulaga e fulufulu ai.+
7 Ona ia faia lea o tuugāmolī+ auro, e tutusa uma le fausaga+ o tuugāmolī e sefulu, ma ua tuu i totonu o le malumalu, e lima i le itu taumatau ma le isi lima i le itu tauagavale.+
8 Ua ia faia foʻi laulau e sefulu ma faatutū i le malumalu, e lima i le itu taumatau ma le lima i le itu tauagavale,+ ua ia faia foʻi ipu auro faaofuofu e selau.
9 Ona ia faia lea o le lotoā+ o ositaulaga,+ ma le lotoā tele+ ma ona faitotoʻa, ua ia ufiufi foʻi faitotoʻa i le ʻapamemea.
10 A ua ia tuu le vai i le itu taumatau i sasaʻe, e faasaga i le itu i saute.+
11 Mulimuli ane, ona faia lea e Hiramo o ʻapa,+ o suō,+ ma ipu faaofuofu.+
Ua faauma e Hiramo ona faia o le galuega i le fale o le Atua moni, lea na ia faia mo le Tupu o Solomona.
12 O poutū+ e lua ma ulupou lapotopoto+ i luga o tumutumu o poutū e lua, ma mea valavala+ e lua e ufiufi ai ulupou lapotopoto e lua, i luga o tumutumu o poutū,
13 o rimoni*+ e fā selau mo mea valavala e lua, e lua atu rimoni i le mea valavala e tasi, e ufiufi ai ulupou lapotopoto e lua sa i luga o poutū,+
14 o taavale toso+ e sefulu, o faatanoa+ e sefulu i luga o taavale toso;
15 o le vai e tasi,+ o povi poʻa e sefulu lua i lalo ifo o le vai,+
16 o ʻapa, o suō,+ o tui,+ atoa ma isi ipu+ uma na faia e Hiramo-apiu+ i le ʻapamemea iila, mo le Tupu o Solomona mo le fale o Ieova.
17 Na faia e le tupu o nei mea mai i le eleele omea i le Itumalo o Ioritana, i le va o Sukota+ ma Seleta.+
18 Na faia e Solomona nei ipu uma e matuā tele lava, e leʻi iloa foʻi le mamafa o ʻapamemea.+
19 Na faia e Solomona o ipu+ uma sa i le fale o le Atua moni, o le fata faitaulaga auro,+ o laulau+ e tuu ai le falaoa e laulauina,
20 o tuugāmolī+ ma o latou molī+ auro māoʻi e mumū ai i luma o le potu pito i totonu,+ e tusa ai ma le tulafono;
21 o fugālaau, o molī, o iofi,+ o auro ia (o auro e sili ona lelei)
22 o seleulu, o ipu faaofuofu, o ipu tī, o salefu,* o auro māoʻi ia,+ o le mea e ulufale atu ai i le fale,+ o faitotoʻa pito i totonu o le Mea e Sili Ona Paia, ma faitotoʻa+ foʻi o le fale o le malumalu, o auro ia.
Faamatalaga Pito i Lalo
^ O le fua o le “paita” pe tusa ma le 22 lita.
^ O se fualaau ʻaina e lanu mūmū pauli e pei o se apu.
^ O se mea e pei o se tamaʻi suō e aveese ai malala mai i le afi.
