2 Nofoaiga a Tupu 7:1-22
7 Ua uma le tatalo a Solomona,+ ona alu ifo lea o le afi mai i le lagi+ ma faaumatia ai le taulaga mū+ ma taulaga, ona tumu ai lea o le fale i le mamalu+ o Ieova.
2 Ua lē mafai ona ulufale atu ositaulaga i le fale o Ieova,+ auā ua tumu le fale o Ieova i le mamalu o Ieova.
3 Na vaavaai atu le fanauga uma a Isaraelu ina ua alu ifo le afi, ma ua iai le mamalu o Ieova i le fale, ona latou faapaʻuʻū faō+ lea ma ifo toʻele+ i le paepae, ua ifo atu ma faafetai atu iā Ieova, “auā e lelei o ia,+ auā e alofa faamaoni+ o ia e oo i le faavavau.”
4 Ua ofo atu e le tupu ma le nuu uma le taulaga i luma o Ieova.+
5 Ua ofo atu e le Tupu o Solomona taulaga e lua sefulu lua afe povi, ma mamoe e selau lua sefulu afe.+ Ona faapaia+ lea e le tupu ma le nuu uma le fale o le Atua moni.
6 Ua tutū ositaulaga+ i tulaga o o latou tiute, ua iai foʻi i le ʻau sa Levī+ meafaifaaili e fai ai pesega+ iā Ieova ia na faia e le tupu o Tavita+ e faafetai ai iā Ieova, “auā e alofa faamaoni o ia i aso uma lava,” pe a vivii atu Tavita i le Atua e ala iā i latou; ua ili leotele foʻi e ositaulaga o pū+ i o latou luma, a o laulaututū Isaraelu uma.
7 Ona faapaia+ lea e Solomona o le ogatotonu o le lotoā sa i luma o le fale o Ieova, auā o i inā na ia ofoina ai taulaga mū+ ma gaʻo o taulaga faifaatasi, auā na lē ofi le taulaga mū, o le taulaga i meaʻai,+ ma gaʻo,+ i le fata faitaulaga ʻapamemea+ na faia e Solomona.
8 Ona faia lea e Solomona ma Isaraelu uma sa faatasi ma ia,+ o se tausamiga+ i lenā taimi mo aso e fitu, o se faapotopotoga+ na matuā toʻatele lava e amata mai i le mea e ui atu ai i Amato,+ e alu ifo i le ālia o Aikupito.+
9 Ae na latou faia se fonotaga paia i le aso lona valu,+ auā na latou faapaiaina le fata faitaulaga mo aso e fitu, ma faia le tausamiga mo aso e fitu.
10 I le aso lona lua sefulu tolu o le masina e fitu, na ia tuu atu ai le nuu e ō atu i o latou fale, ua olioli+ ma fiafia o latou loto i mea lelei+ na faia e Ieova iā Tavita, o Solomona, ma lona nuu o Isaraelu.+
11 Ua uma ona faia e Solomona le fale o Ieova+ ma le fale o le tupu;+ ma na taulau mea uma na loto i ai Solomona e fai e faatatau i le fale o Ieova, ma lona lava fale.
12 Ona faaali mai lea o Ieova+ iā Solomona i le pō, ma fetalai mai iā te ia: “Ua ou faalogo i lau tatalo,+ ma ua ou filifilia+ lenei mea mo aʻu e fai ma fale e fai ai taulaga.+
13 Pe a ou pupuni le lagi ina ia lē iai se timu,+ pe a ou poloaʻi atu i sē ina ia ʻaina laau o le fanua,+ pe a ou auina atu le faamaʻi i loʻu nuu,+
14 ma pe a faamaulalo+ loʻu nuu+ o ē ua taʻua ai loʻu igoa,+ ma tatalo,+ ma saʻili mai iā te aʻu,+ ma liliuese mai i o latou ala leaga,+ ona ou faalogo atu ai lea mai i le lagi+ ma faamagalo a latou agasala,+ ou te faamālōlōina foʻi lo latou laueleele.+
15 O lenei, o le a vaavaai oʻu mata+ ma faalogo oʻu taliga+ i le tatalo e faia i lenei mea.
16 O lenei, ua ou filifilia+ ma faapaiaina lenei fale ina ia tuu ai loʻu igoa+ i aso uma lava,+ e faasaga atu ai foʻi oʻu mata ma loʻu loto i inā i aso uma lava.+
17 “Afai foʻi e te savali i oʻu luma e pei ona savali o Tavita+ lou tamā, ma faia e tusa ma mea uma na ou poloaʻi atu ai iā te oe,+ ma e tausia aʻu tulafono+ ma iʻuga o aʻu faamasinoga,+
18 ou te faatumauina foʻi le nofoālii o lou malo,+ e pei ona ou osia ai le feagaiga ma Tavita lou tamā,+ e faapea, ‘E lē motu lou gafa i le nofoālii o Isaraelu.’+
19 Ae afai e tou te liliuese+ ma tuua aʻu tulafono+ ma aʻu poloaʻiga+ na ou tuu atu i o outou luma, ma outou ō atu ma auauna i isi atua+ ma ifo atu i ai,+
20 ou te liaʻieseina i latou mai i loʻu laueleele na ou foaʻiina atu iā i latou;+ o le fale foʻi lenei na ou faapaiaina+ mo loʻu igoa, ou te lafoaʻia mai i oʻu luma,+ e avea foʻi ma upu faatusa+ ma tauemuga i nuu uma.+
21 E avea foʻi lenei fale ma faaputuga o mea ua faatafunaina,+ o i latou uma e ui ane ai o le a taufaiofo+ ma faapea ane, ‘Pe aiseā ua faia ai faapea e Ieova i lenei laueleele ma lenei fale?’+
22 E latou te faapea ane foʻi, ‘Auā ua latou tuua Ieova+ le Atua o o latou augātamā, o lē na aumaia i latou mai i le nuu o Aikupito,+ ma ua latou pipii atu i isi atua,+ ua ifo atu i ai ma auauna i ai.+ O le mea lea ua ia aumaia ai lenei mala+ uma iā i latou.’”
