2 Samuelu 1:1-27
1 Ina ua mavae le oti o Saulo, ma ua toe foʻi atu Tavita mai i le fasiga o Amaleka,+ ona nofo ai pea lea o Tavita i Sekeleka+ i aso e lua.
2 Ua oo i le aso lona tolu, faauta! ua sau se tagata+ mai i le ʻautau a Saulo, ua masaesae ona ofu,+ ua iai foʻi palapala i lona ulu;+ ina ua oo atu o ia iā Tavita, ona faapaʻū faō lea i le eleele+ ma ifo iā te ia.
3 Ona fai atu lea o Tavita iā te ia: “O fea e te sau ai?” Ua fai mai o ia iā te ia: “Na ou sola mai i le ʻautau a Isaraelu.”
4 Ua fai atu Tavita iā te ia: “O le ā le iʻuga ua oo i ai? Seʻi taʻu mai iā te aʻu faamolemole.” Ona faapea mai lea o ia: “Ua sosola tagata mai i le taua, ma e toʻatele tagata ua paʻuʻū ma feoti ai,+ ua feoti foʻi Saulo+ ma Ionatana+ lona atalii.”
5 Ua fai atu Tavita i le tauleʻaleʻa na taʻuina mai iā te ia le tala: “E faapefea ona e iloa ua feoti Saulo ma Ionatana lona atalii?”+
6 Ona tali mai lea o le tauleʻaleʻa na taʻuina mai iā te ia le tala: “Na ou soona alu ane i luga o le Mauga o Kilepoa,+ na iai foʻi Saulo i inā ma o loo totoo i lona tao;+ faauta! na maua mai o ia e kariota ma tagata tiʻetiʻe solofanua.+
7 Ina ua ia fāliu i tua ma iloa mai aʻu, ona ia valaau mai lea iā te aʻu, na ou fai atu foʻi, ‘O aʻu lenei!’
8 Ua fai mai o ia iā te aʻu, ‘O ai ea oe?’ Ona ou fai atu lea iā te ia, ‘O aʻu o le Amaleka.’+
9 Na ia fai mai, ‘Faamolemole, inā sau ia ma fasioti iā te aʻu, auā ua ou matuā tigāina lava,+ ae ua ou ola pea.’
10 Na ou alu atu ma fasioti iā te ia,+ na ou iloa e lē toe ola o ia auā ua matuā manuʻa lava. Ona ou ave lea o le palealii+ sa i lona ao, ma le taulima sa i lona aao, ina ia ou aumaia i inei i loʻu alii.”
11 Ona tago lea o Tavita i ona ofu ma saeia,+ na faia foʻi faapea e tagata uma sa iā te ia.
12 Ua latou taufaitagituʻi, ua fetagisi,+ ma anapopogi+ seʻia oo i le afiafi ona o Saulo, o Ionatana lona atalii, o le nuu o Ieova, atoa foʻi ma le aiga o Isaraelu,+ auā ua feoti i latou i le pelu.
13 Ua fai atu Tavita i le tauleʻaleʻa na taʻuina mai iā te ia le tala: “O fea e te sau ai?” Ua fai mai o ia: “O aʻu o le atalii o le tagata ese, o le Amaleka.”+
14 Ona fai atu lea o Tavita iā te ia: “Pe na faapefea ona e lē fefe+ e faaoo lou lima e fasiotia ai lē ua faauuina+ a Ieova?”
15 Ua valaau atu Tavita i le tasi o ona tauleleʻa ma faapea atu: “Inā alu atu ia. Ia fasioti iā te ia.” Ona ia fasi lea o ia ma oti ai.+
16 Ua fai atu Tavita iā te ia: “Ua i luga o lou ulu lou lava toto,+ auā o lou lava gutu na taʻutino mai+ e faapea, ‘O aʻu lava na ou fasiotia lē ua faauuina a Ieova.’”+
17 Ua lagi e Tavita lenei pese faanoanoa+ ona o Saulo ma Ionatana lona atalii,+
18 ma ua faapea atu e tatau ona aʻo e le fanauga a Iuta+ lenei pese ua taʻua “O le ʻAufana.”+ Faauta! Ua tusia i le tusi a Iasera:+
19 “Isaraelu e, ua fasia ou tagata mamalu i ou nofoaga maualuluga.+
Auē! ua maliliu toa!
20 O outou le nuu e, aua neʻi o outou taʻu atu i Kata;+
Aua foʻi neʻi talaʻia atu i auala o Asekelona,+
Ina neʻi olioli ai afafine o Filisitia,
Ina neʻi fiafia ai afafine o tagata e lē peritomeina.+
21 Mauga o Kilepoa e,+ aua neʻi iai se sau, aua neʻi iai se timu i o outou luga, aua foʻi neʻi maua i fanua ni fua e avatu i le Atua;+
Auā ua faaleagaina i inā le talita a ē e malolosi,
Ua faaleagaina foʻi le talita a Saulo, ua lē toe iai se talita e faauuina i le suāuu.+
22 E leʻi foʻi mai le ʻaufana a Ionatana,+
Mai i toto o ē na fasia, mai i gaʻo o tagata totoa,
E leʻi foʻi fua mai lava le pelu a Saulo.+
23 Sa agaalofa ma tausaafia Saulo ma Ionatana+ i taimi a o la soifua mai,
E lē o tuueseesea foʻi i laʻua i lo la maliu.+
E sili atu lo la saosaoa nai lo o aeto,+
E sili atu foʻi lo la malolosi nai lo o leona.+
24 Afafine o Isaraelu e, ia outou fetagisi ona o Saulo,
O lē na faaofuina outou i ofu mūmū sesega ua teuteuina,
O lē na teuteua o outou ofu i auro.+
25 Auē! ua maliliu toa i le taua.+
Ua fasia Ionatana i ou nofoaga maualuluga!+
26 Ua ou mafatia ona o oe loʻu uso o Ionatana,
Sa ou matuā fiafia lava iā te oe.+
Maʻeu lou alofa iā te aʻu e sili atu i le alofa o fafine.+
27 Auē! ua maliliu toa+
Ua fano ai auupega o le taua!”
