2 Samuelu 12:1-31
12 Ua auina atu e Ieova o Natano+ iā Tavita. Ona alu atu lea o ia iā te ia,+ ma faapea atu iā te ia: “Sa iai ni tagata se toʻalua i le tasi aai, e mauʻoa le tasi, ae e mativa le isi.
2 Sa matuā tele mamoe ma povi a le tagata mauʻoa;+
3 ae e leai se mea a le tagata mativa, e na o le tasi lava le tamaʻi mamoe fafine na ia faatauina mai.+ Sa tausia e le tamāloa o ia, ma ola aʻe faatasi ma ia ma ona atalii. Sa ʻai o ia i fasi meaʻai a le tamāloa, sa inu foʻi mai i lana ipu, sa taoto o ia i lona fatafata, ma sa pei lava o se afafine o le tamāloa.
4 Mulimuli ane, ua alu ane se tagata e asiasi i le tamāloa mauʻoa, ae e na te leʻi avea sana mamoe po o sana povi, e sauni ai se meaʻai a le tagata malaga ua alu atu iā te ia. A ua ia ave le tamaʻi mamoe fafine a le tagata mativa, ma sauni ai se meaʻai a le tagata na alu atu iā te ia.”+
5 Ona matuā ita ai lea o Tavita i lea tagata,+ ma ua faapea mai iā Natano: “O loo soifua Ieova,+ e tatau ona oti le tagata ua faia lenei mea!+
6 E tatau foʻi ona ia taui+ atu le tamaʻi mamoe fafine i ni mamoe se fā,+ ona o lenei mea ua ia faia, auā e leʻi alofa mutimutivale o ia.”+
7 Ona fai atu lea o Natano iā Tavita: “O oe lava le tagata! O le mea lenei ua fetalai mai ai Ieova le Atua o Isaraelu, ‘O aʻu lava na ou faauuina+ oe e fai ma tupu iā Isaraelu, o aʻu foʻi na ou laveaʻia+ oe mai i le lima o Saulo.
8 Na ou nofosauni e avatu iā te oe le fale o lou alii,+ ma avā a lou alii+ i lou fatafata, ma avatu foʻi iā te oe o le aiga o Isaraelu ma Iuta.+ Afai foʻi e lē lava na mea, na ou nofosauni e faaopoopo atu iā te oe o mea faapenei, ma isi foʻi mea.+
9 Aiseā ua e ʻinoʻino ai i le afioga a Ieova i lou faia o lenei mea leaga+ i lana silafaga? Ua e fasia i le pelu Uria le sa Hetī,+ ua e ave lana avā e fai ma au avā,+ a ua e fasiotia o ia i le pelu a le fanauga a Amoni.
10 O lenei, e lē mavae le pelu+ mai i lou aiga i aso uma lava,+ ona ua e ʻinoʻino iā te aʻu ina ua e ave le avā a Uria le sa Hetī e fai ma au avā.’
11 O le mea lenei ua fetalai mai ai Ieova, ‘Ou te faatupuina mai i lou lava aiga o puapuaga e oo iā te oe;+ ou te ave foʻi au avā mai i ou luma ma avatu i se tasi tagata,+ e momoe foʻi o ia ma au avā i le mumū o lenā lā.+
12 O oe, na e faia faalilolilo+ lenā mea, a o aʻu, ou te faia lenei mea i luma o Isaraelu+ uma a o mumū le lā.’”+
13 Ua fai mai+ Tavita iā Natano: “Ua ou agasala iā Ieova.”+ Ona fai atu lea o Natano iā Tavita: “Ua faamagaloina e Ieova lau agasala.+ E te lē oti ai.+
14 Ae peitaʻi, ona ua e matuā lē faaaloalo+ iā Ieova i lenei mea, o le mea lea e oti ai lava le tama ua fanau mai iā te oe.”+
15 Ona alu ai lea o Natano i lona fale.
A ua taia+ e Ieova le tama na fanau mai e le avā a Uria iā Tavita, ma ua maʻi ai.
16 Ona talosaga lea o Tavita i le Atua e faatatau i le tama, ua anapogi Tavita,+ ma ua alu le pō atoa o taoto i le eleele.+
17 Ua tutū atu toeaina o lona aiga e faatulaʻi iā te ia mai i le eleele, a ua lē mafai o ia, e leʻi ʻai+ foʻi o ia faatasi ma i latou.
18 Ona iʻu ai lea ina oti o le tama i le aso lona fitu. A ua fefefe auauna a Tavita e taʻu atu iā te ia ua oti le tama; auā ua latou faapea ane: “Faauta! Na tatou talanoa atu iā te ia a o ola le tamaitiiti, ae e leʻi faalogo mai i a tatou upu; e faapefea la ona tatou faapea atu iā te ia ‘Ua oti le tama’? E mautinoa lava e na te faia se mea leaga.”
19 Ua vaai atu Tavita o femusuaʻi ana auauna, ona iloa lea e Tavita ua oti le tama. Ona fai atu lea o Tavita i ana auauna: “Po ua oti le tama?” Ona latou fai mai lea: “Ua oti o ia.”
20 Ua tulaʻi Tavita mai i le eleele, ua tāʻele ma uu+ lona tino i le suāuu ma sui ona ofu; ua alu atu i le fale+ o Ieova ma ifo+ ai; mulimuli ane ua sau i lona fale ma fesili atu iā i latou, ona latou laulauina loa lea o meaʻai i ona luma, ma ua ʻai o ia.
21 Ona fesili mai lea o ana auauna iā te ia: “O le ā le uiga o lenei mea ua e faia? Auā a o ola le tama, sa e anapogi ma tagi pea; o lenei ua oti le tama, a ua e tū i luga ma ua e taumafa.”
22 Ua fai atu o ia: “Na ou anapogi+ ma tagi pea+ a o ola le tama, auā na ou faapea ifo iā te aʻu, ‘O ai e iloa pe e manatu mai Ieova iā te aʻu, ia ola le tama?’+
23 A o lenei ua oti o ia, aiseā ou te saga anapogi ai? Pe e mafai ea ona ou toe faafoʻi mai o ia?+ E iai se aso ou te oti ai foʻi aʻu,+ ae e lē toe foʻi mai o ia iā te aʻu.”+
24 Ona faamāfanafana lea e Tavita o Patesepa lana avā.+ Ua alu atu foʻi o ia ma momoe ma Patesepa. Mulimuli ane, ua fanaua e Patesepa se tama tama,+ ma ua faaigoa o ia iā Solomona.+ Ua alofa foʻi Ieova iā te ia.+
25 Ona ia auina atu lea o le perofeta o Natano+ ma faaigoa iā te ia o Ietitaia, ona o le alofa o Ieova iā te ia.
26 Ua tau pea Ioapo+ ma Rapa+ le aai o le fanauga a Amoni, ua ia faoa foʻi le aai o le malo.
27 Ona aauina atu lea e Ioapo o avefeʻau iā Tavita, ua faapea atu: “Na ou siitaua iā Rapa.+ Na ou faoa foʻi le aai o vai.
28 O lenei, ia faapotopoto le nuu o totoe, ia siitaua ma faoa le aai; ia lē avea aʻu ma lē e faoa le aai, ina neʻi faapea o aʻu na ou faoa le aai.”
29 Ona faapotopoto lea e Tavita o le nuu uma, ma ō atu e tau ma Rapa ma faoa ai le aai.
30 Ua ia aveesea le pale mai i le ulu o Malekama,+ o le mamafa o le pale o le taleni o auro ma maa tāua; ma ua faaee i le ulu o Tavita. Na ia ave foʻi le tele o le vete+ mai i le aai.
31 Ua ia aumaia foʻi tagata sa iai i le aai, ma tuuina atu i latou e faigaluega i ʻili maa, ma meafaigaluega maamaʻai e faia i le uʻamea,+ ma toʻi uʻamea, na ia faafaigaluega foʻi i latou i le faia o piliki. O le mea foʻi lenā na ia faia i aai uma o le fanauga a Amoni. Mulimuli ane, ona foʻi atu lea o Tavita ma le nuu uma i Ierusalema.
