2 Samuelu 14:1-33
14 Ua iloa e Ioapo+ le tama a Seruia,+ ua naunau le loto o le tupu iā Apisaloma.+
2 Ona auina atu lea e Ioapo o le feʻau i Tikoa,+ ua ia aami se fafine atamai+ ma ua fai atu iā te ia: “Ia e faavauvau faamolemole ma ia e ofu i ofu faavauvau, aua e te uu iā te oe i le suāuu;+ ia pei foʻi oe o se fafine i inei ua faavauvau mo aso e tele, ona o lē ua oti.+
3 Ia e alu atu i le tupu ma fai atu i ai nei upu.” Ona taʻu atu lea e Ioapo iā te ia o upu e fai atu ai.+
4 Ona alu atu lea o le fafine Tikoa i le tupu, ua faapaʻū faō i le eleele,+ ua ifo ma faapea atu: “Le tupu e, seʻi e fesoasoani+ mai!”
5 Ona fai mai lea o le tupu iā te ia: “O le ā le mea ua tupu iā te oe?” A ua faapea atu le fafine: “O aʻu o le fafine nofofua,+ auā ua oti laʻu tane.
6 Sa i lau auauna fafine o le fanau tama e toʻalua, ua femisaaʻi foʻi i laʻua i le fanua,+ a ua leai se tasi e laveaʻi+ iā i laʻua. Mulimuli ane, ua fasia e le tasi le isi ma oti ai.
7 Ua tutū mai le aiga uma i lau auauna fafine ma faapea mai, ‘Tuu mai lē na fasiotia lona uso ina ia o matou fasiotia o ia, ona o lona uso+ lea na ia fasiotia,+ ma ia matou faaumatia foʻi le suli!’ Ona latou tineia ai lea o le mumū o aʻu malala ola ua totoe, ma ua latou lē tuuina atu i laʻu tane se igoa, po o sē ua totoe i le fogāeleele.”+
8 Ona fai mai lea o le tupu i le fafine: “Inā alu ia i lou fale, ou te tuuina atu le poloaʻiga e faatatau iā te oe.”+
9 Ua fai atu le fafine Tikoa i le tupu: “Loʻu alii e, le tupu, ia i luga o aʻu ma le aiga o loʻu tamā+ le sesē na faia e laʻu tama, a ia mamā le tupu ma lona nofoālii.”
10 Ona toe fai mai lea o le tupu: “Afai e iai se tasi na fai atu iā te oe, ia e aumai foʻi o ia iā te aʻu, ona lē toe faatigā lea o ia iā te oe.”
11 A ua fai atu le fafine: “Faamolemole, ia manatua e le tupu Ieova lou Atua,+ ina ia lē faaauau ona faia o se mea leaga e lē na te tauimasui i le toto,+ ma ia latou lē fasiotia laʻu tama.” Ona fai mai lea o le tupu: “O loo soifua Ieova,+ e lē paʻū lava i le eleele se lauulu+ o lau tama.”
12 Ua fai atu le fafine: “Faamolemole, seʻi fai atu se upu+ a lau auauna fafine+ i loʻu alii le tupu.” Ona fai mai lea o ia: “Inā fai mai ia!”+
13 Ua toe faapea atu le fafine: “Aiseā ua e manatu ai faapea+ i le nuu o le Atua?+ Auā a o fetalai mai le tupu i nei upu, e pei ua nofosala o ia,+ ina ua lē toe faafoʻi mai e le tupu lona atalii na ia tuliesea.+
14 Auā e oti lava i matou,+ ma e pei i matou o vai ua sasaa i le eleele, e lē mafai ona toe maua mai. E lē aveesea e le Atua se tasi,+ ae e mafaufau o ia i māfuaaga e lē tatau ai ona tuliesea mai iā te ia lē ua tuliesea.
15 O lenei, ua ou sau e taʻu atu nei upu i loʻu alii le tupu, auā ua faafefe aʻu e le nuu. Ona fai atu lea o lau auauna fafine, ‘Seʻi oʻu talanoa atu lava i le tupu faamolemole. Atonu o le a faia e le tupu e tusa ma upu a lana teine pologa.
16 Auā ua faafofoga mai le tupu ina ia laveaʻiina lana teine pologa, mai i lima o tagata o loo saʻili e fasioti iā te aʻu ma laʻu tama e toʻatasi, mai i le mauaina o le tofi ua tuuina mai e le Atua,’+
17 ona faapea atu lea o lau auauna fafine, ‘Ia maua le mapusaga ona o fetalaiga a loʻu alii le tupu.’ Auā ua pei loʻu alii le tupu o se agelu+ a le Atua moni, ina ia iloa le lelei mai i le leaga,+ ia faatasi foʻi Ieova lou Atua iā te oe.”
18 Ua tali mai le tupu, ua faapea mai i le fafine: “Faamolemole, aua neʻi e natia mai iā te aʻu se mea o le a ou fesili atu ai iā te oe.”+ Ona fai atu lea o le fafine: “Faamolemole, inā fetalai mai ia loʻu alii e, le tupu.”
19 Ona fetalai mai lea o le tupu: “Po o ʻau Ioapo+ ma oe i nei mea uma?”+ Ona tali atu lea o le fafine: “O loo soifua+ oe loʻu alii e, le tupu, e leai se tagata e mafai ona ʻalo i le itu taumatau po o le itu tauagavale mai i mea uma ua fetalai mai ai loʻu alii le tupu; auā o lau auauna o Ioapo na poloaʻi mai iā te aʻu, o ia foʻi na tuuina mai i le gutu o lau auauna fafine o nei upu uma.+
20 Ua faia e lau auauna o Ioapo lenei mea, ina ia suia ai le mataupu, ae e atamai loʻu alii e pei o le atamai o le agelu+ a le Atua moni, ua ia silafia mea uma lava i le lalolagi.”
21 Ona fai atu lea o le tupu iā Ioapo: “O lenei, o le a ou faia lenei mea.+ Inā alu ia ma toe aumai le tauleʻaleʻa o Apisaloma.”+
22 Ona faapaʻū faō lea o Ioapo i le eleele ma ifo, ma faafetai i le tupu;+ ua faapea mai Ioapo: “Loʻu alii e, le tupu, o le aso lenei ua iloa ai e lau auauna ua e manatu mai iā te aʻu,+ auā ua faia e le tupu e tusa ma le upu a lana auauna.”
23 Ona tulaʻi lea o Ioapo ma alu atu i Kasuri,+ ua ia aumaia Apisaloma i Ierusalema.+
24 Peitaʻi, ua fetalai atu le tupu: “Ia alu ane o ia i lona fale, ae aua neʻi o ma feiloaʻi.”+ Ona alu lea o Apisaloma i lona fale, e leʻi feiloaʻi ma le tupu.
25 Sa leai se tasi i Isaraelu uma na tutusa ma Apisaloma i lona aulelei,+ sa viiviia lava o ia. E amata mai lava i ona alofivae e oo i lona tumuaʻi, e leai lava se pona iā te ia.
26 Pe a sele lona lauulu, (e na te seleina lona lauulu i faaiʻuga o tausaga taʻitasi; auā ua mamafa+ tele) ua ia fuatia le lauulu o lona ulu, e lua selau sekeli i le fua a le tupu.
27 Na fanau mai iā Apisaloma o atalii+ e toʻatolu ma le afafine e toʻatasi, o Tamara lona igoa. O ia o se fafine e sili lona lalelei.+
28 Na nofo pea Apisaloma i Ierusalema i tausaga e lua, ae e leʻi feiloaʻi lava ma le tupu.+
29 Ona feʻau atu lea e Apisaloma o Ioapo ina ia auina atu o ia i le tupu, ae e leʻi sau o ia. Ona toe feʻau faalua atu lea iā te ia, ae e leʻi sau lava o ia.
30 Mulimuli ane, ua fai atu o ia i ana auauna: “Ia outou vāai atu i le fanua o Ioapo lea e latalata mai iā te aʻu, o loo iai ana karite. Inā ō atu ia ma susunu i le afi.”+ Ona susunu lea e auauna a Apisaloma o le fanua i le afi.+
31 Ona tulaʻi lea o Ioapo ma alu atu iā Apisaloma i lona fale, ua faapea mai iā te ia: “O le ā le mea ua susunu ai e au auauna loʻu fanua i le afi?”
32 Ona fai atu lea o Apisaloma iā Ioapo: “Faauta! na ou feʻau atu iā te oe e faapea, ‘Sau ia, ou te auina atu oe i le tupu e faapea atu: “Aiseā ua ou sau ai mai i Kasuri?+ Na sili ai pe ana ou nofo ai pea i inā. O lenei, seʻi oʻu alu atu ma te feiloaʻi ma le tupu, afai foʻi e iai se mea sesē ua ou faia,+ ona ia fasiotia lea o aʻu.”’”
33 Ona alu atu lea o Ioapo i le tupu ma taʻu atu iā te ia. Ua ia aami foʻi iā Apisaloma, ona alu atu lea o ia i le tupu ua ifo iā te ia, ma faapaʻū faō i le eleele i luma o le tupu; ona sogi atu lea o le tupu iā Apisaloma.+
