2 Samuelu 15:1-37
15 Ua mavae ia mea, ona faia lea e Apisaloma o se kariota mo ia, atoa ma solofanua, ma tagata e toʻalima sefulu e taufetuli i ona luma.+
2 Ona usupō+ lea o Apisaloma ma tū i le tasi itu o le auala e agaʻi i le faitotoʻa.+ O so o se tagata e sau i le tupu e faia sana faamasinoga,+ e valaau atu Apisaloma iā te ia ma faapea atu: “O fea le aai e te sau ai?” Ona tali mai lea o ia: “E sau lau auauna mai i se tasi o ituaiga o Isaraelu.”
3 Ua fai atu Apisaloma iā te ia: “Vaai, e lelei ma tonu lau mataupu; ae e leʻi tofia e le tupu se tasi ina ia faalogologo i lau mataupu.”+
4 Ua faapea ane Apisaloma: “Maʻimau pe ana tofia aʻu e fai ma faamasino i le nuu,+ ina ia ō mai iā te aʻu o tagata uma e iai ni a latou mataupu po o ni faamasinoga! Ona ou faamasinotonu ai lea iā te ia.”+
5 Pe a faalatalata mai foʻi se tagata e ifo iā te ia, ona ia tuu atu lea o lona lima, ma tago atu+ ma sogi iā te ia.
6 Sa faia pea e Apisaloma o lenei mea i tagata uma o Isaraelu, o ē na ō ane i le tupu mo se faamasinoga; ua faaauau foʻi ona faaliliuina e Apisaloma iā te ia o loto o tagata Isaraelu.+
7 Ua mavae tausaga e fā sefulu,* ona fai mai lea o Apisaloma i le tupu: “Seʻi tuu mai aʻu ou te alu i Heperona+ e faataunuu laʻu tautoga, na ou tautō ai iā Ieova.+
8 Auā na faia e lau auauna se tautoga+ a o oʻu nofo i Kasuri+ i Suria, e faapea ‘Afai e toe faafoʻi aʻu e Ieova i Ierusalema, o le a ou ofoina atu se taulaga iā Ieova.’”+
9 Ua faapea atu le tupu iā te ia: “Inā alu ia ma le filemu.”+ Ona tulaʻi lea o ia ma alu atu i Heperona.
10 Ona aauina atu lea e Apisaloma o sipai+ i ituaiga uma o Isaraelu, ua faapea atu: “A outou faalogo loa i le leo o le pū, ia outou faapea ane, ‘Ua fai Apisaloma ma tupu+ i Heperona!’”+
11 Ua ō faatasi Apisaloma ma tagata e toʻalua selau mai i Ierusalema, na valaauina i latou, ua ō ma le faamaoni+ e aunoa ma le iloaina o se mea.
12 A o ia ofoina atu taulaga, na aami e Apisaloma o Aitofele+ le Kilo,+ o le faufautua a Tavita,+ mai i lona aai o Kilo.+ Ua tuputupu pea le fouvalega,+ ua faaauau foʻi ona toʻatele+ o ē ua ʻau iā Apisaloma.
13 Ona alu ane lea o se tagata ma taʻu atu iā Tavita, e faapea: “Ua liliu atu iā Apisaloma loto+ o tagata o Isaraelu.”
14 Ona fai atu lea o Tavita i ana auauna uma sa iā te ia i Ierusalema: “Inā tulaʻi ia ma tatou sosola ese;+ auā o le a leai se mea e tatou te ʻalo i ai ona o Apisaloma! Ia ō atu faavave, ina neʻi vave mai o ia ma maua mai i tatou, ma faaoo mai se mea leaga iā i tatou, ma fasia le aai i le pelu!”+
15 Ua fai mai auauna a le tupu i le tupu: “O mea uma lava e finagalo i ai lo matou alii le tupu, e faia lava e au auauna.”+
16 Ona ō lea o le tupu ma lona aiga uma o loo mulimuli atu iā te ia,+ a ua tuua e le tupu o fafine e toʻasefulu, o palake,+ e leoleoina le fale.
17 Ua ō atu le tupu i lona ala ma tagata uma o loo mulimuli atu iā te ia; ua latou mālōlō i Petemeaka.
18 Ua ui ane i ona tafatafa ana auauna uma; o tagata Kereti uma, o tagata Peleti+ uma, o tagata Kata+ uma, o tagata e toʻaono selau na mulimuli atu iā te ia mai i Kata,+ ua latou ui ane i luma o le tupu.
19 Ona fai atu lea o le tupu iā Itai+ le Kata: “Aiseā e te alu atu ai ma i matou? Toe foʻi+ ia ma nonofo ma le tupu; auā o oe o le tagata ese, na e sola ese mai i lou nuu.
20 Na e sau ananafi, ae po o le a e fealuaʻi solo+ ea faatasi ma i matou, e alu atu i le mea ou te alu i ai i le asō? Inā toe foʻi ia ma ave ou uso faatasi ma oe, ia alofa faamaoni+ ma maufaatuatuaina+ oe e Ieova!”
21 A ua tali mai Itai i le tupu e faapea: “O loo soifua Ieova, o loo soifua foʻi loʻu alii le tupu,+ o le mea e iai loʻu alii le tupu, po o le oti po o le ola, o i inā lava e iai lau auauna!”+
22 Ona fai atu lea o Tavita iā Itai:+ “Inā alu ia ma sopoʻia.” Ona sopo atu lea e Itai le Kata, o ona tagata uma foʻi, ma tamaiti uma na faatasi ma ia.
23 Ua fetagisi leotetele le nuu uma,+ a o sopoʻia atu tagata uma, ua tū foʻi le tupu i tafatafa o le ālia o Ketarono,+ ma ua sopoʻia atu e le nuu uma le auala e agaʻi atu i le toafa.
24 Na iai foʻi Satoka+ ma sa Levī+ uma faatasi ma ia, o loo ave+ le atolaau+ o le feagaiga a le Atua moni; ua latou tuu foʻi i lalo le atolaau a le Atua moni i tafatafa o Aviata,+ seʻia uma ona sopo atu le nuu atoa mai i le aai.
25 A ua fai mai le tupu iā Satoka: “Inā toe ave ia le atolaau+ a le Atua moni i le aai.+ Afai e finagalo malie Ieova iā te aʻu, e na te toe aumaia lava aʻu, ma ou vaai i ai, atoa ma le mea e tuu ai.+
26 Ae afai e faapea mai o ia, ‘Ou te lē fiafia iā te oe,’ o aʻu lenei, ia faia e ia iā te aʻu e faapei ona finagalo i ai o ia.”+
27 Ua faapea mai le tupu iā Satoka le ositaulaga: “Pe e lē o oe ea o le tagata e iloa faaaliga?+ Inā toe foʻi atu ia ma le filemu i le aai, atoa foʻi ma Aimaasu lou atalii, ma Ionatana+ le atalii o Aviata, o o oulua atalii e toʻalua.
28 Vaai, ou te nofo faatali pea i talaane o asaga i le toafa, seʻia oo mai se upu mai iā te outou e faailoa mai ai iā te aʻu.”+
29 Ona toe ave lea e Satoka ma Aviata le atolaau a le Atua moni i Ierusalema, ma la nonofo ai pea i inā.
30 Ua alu aʻe Tavita i le aʻega o Olive,+ o loo alu aʻe ma tagi, ma ufiufi lona ulu;+ ua savali e leai ni ona seevae, o le nuu uma foʻi na iā te ia, ua taʻitasi ma ufiufi i lona ulu, ua latou ō aʻe ma fetagisi.+
31 Ua oo mai le tala iā Tavita e faapea: “Ua aufaatasi Aitofele ma i latou ua fouvale+ ma Apisaloma.”+ Ona faapea atu lea o Tavita:+ “Faamolemole Ieova e,+ ia faalēaogāina le fautuaga a Aitofele!”+
32 Ina ua alu atu Tavita i le tumutumu o le mauga i le mea na masani ona ifo ai tagata i le Atua, ona fetaiaʻi ai lea o ia ma Usai+ le Araki,+ ua saeia lona ofu talaloa, ma o loo iai foʻi eleele i lona ulu.+
33 A ua fai atu Tavita iā te ia: “Afai e ta te ō faatasi, o le a fai oe ma avega mamafa iā te aʻu.+
34 Ae afai e te foʻi atu i le aai, ma fai atu iā Apisaloma, ‘Le tupu e, o aʻu lenei o lau auauna. Sa ou auauna i lou tamā i aso ua mavae, a o lenei, ou te auauna iā te oe.’+ Ona e faalēaogāina+ ai lea o le fautuaga a Aitofele mo aʻu.
35 Pe e lē o iā te oe ea ositaulaga o Satoka ma Aviata?+ O mea uma e te faalogo i ai mai i le aiga o le tupu, ia e taʻu atu i ositaulaga o Satoka ma Aviata.+
36 Faauta! O loo iā i laʻua o la atalii e toʻalua, o Aimaasu+ le atalii o Satoka, ma Ionatana+ le atalii o Aviata; ia outou aauina mai iā te aʻu e ala iā i laʻua, o tala uma tou te faalogo i ai.”
37 Ona alu lea o Usai le uō+ a Tavita i le aai. A ua sau Apisaloma+ i Ierusalema.
