2 Samuelu 16:1-23
16 Ina ua sopo teisi atu Tavita i tala atu o le tumutumu o le mauga,+ ona sau ai lea o Sipa+ le auauna a Mefiposeta+ e faafeiloaʻi iā te ia, o loo aumai asini+ e lua ua uma ona faanofoa, ma i luga o asini o loo iai falaoa+ e lua selau ma keke vine+ e selau, ma avega o fualaau ʻaina o le tau māfanafana,+ atoa ma se fagu uaina lapoʻa.+
2 Ona faapea atu lea o le tupu iā Sipa: “O ā ea nei mea ua e aumaia?”+ A ua tali mai Sipa: “O asini e tiʻetiʻe ai le aiga o le tupu, o falaoa ma fualaau ʻaina o le tau māfanafana e aai ai tauleleʻa,+ a o le uaina e feinu ai o ē ua lē lavavā+ i le toafa.”+
3 Ua fai atu le tupu: “O fea o iai le atalii o lou matai?”+ Ona fai mai lea o Sipa i le tupu: “O loo nofo o ia i Ierusalema; auā ua ia faapea mai, ‘O le asō e toe faafoʻisia mai ai iā te aʻu e le aiga o Isaraelu le pulega o le malo o loʻu tamā.’”+
4 Ona fai atu lea o le tupu iā Sipa: “Faauta! Ua iā te oe mea uma a Mefiposeta.”+ Ona fai mai lea o Sipa: “Ou te ifo+ lava iā te oe. Ia e manatu mai iā te aʻu loʻu alii e, le tupu.”
5 Ua oo atu le Tupu o Tavita i Pauri,+ faauta! ua alu ane mai i inā se tagata o le aiga o Saulo, o Semi+ lona igoa, o le atalii o Kera, ua alu ane o ia ma fetuu iā te ia.+
6 Ua ia fetogi Tavita i maa ma auauna uma a le Tupu o Tavita; o le nuu uma ma tagata totoa uma sa i lona itu taumatau ma lona itu tauagavale.
7 O upu nei a Semi na fai atu ai a o ia fetuu: “Alu ese ia, alu ese ia, o oe le tagata ua nofosala i le toto,+ ma o oe o le tagata e leai se aogā!+
8 Ua taui atu e Ieova iā te oe le toto uma ua e nofosala ai o le aiga o Saulo ina o fai oe ma tupu; ma ua tuuina atu foʻi e Ieova le tofi o le tupu i lima o lou atalii o Apisaloma. O lenei ua e puapuagatia, ona o oe o le tagata ua nofosala i le toto!”+
9 Ona fai mai lea o Apisai le tama a Seruia+ i le tupu: “Aiseā ua fetuu mai ai e lenā taʻifau mate+ loʻu alii le tupu?+ Faamolemole, tuu mai aʻu seʻi oʻu alu atu e vavaeese lona ulu.”+
10 A ua fai atu le tupu: “O le ā ea laʻu mea e fai iā te oulua+ le fanau a Seruia?+ Tuu ai pea o ia e fetuu+ mai, auā ua fetalai atu Ieova iā te ia,+ ‘Inā fetuu ia iā Tavita!’ O ai ea la e fai atu, ‘Aiseā ua e faia ai lenā mea?’”+
11 Ua fai atu Tavita iā Apisai ma ana auauna uma: “O lenei, o loʻu lava atalii o lē na fanau mai i loʻu manava, o loo saʻili e fasioti iā te aʻu;+ ma ua sili atu nei la ona saʻili le tagata Peniamina e fasioti iā te aʻu!+ Tuu ai pea o ia e fetuu mai, auā ua fetalai atu Ieova iā te ia e faia faapea!
12 Atonu e silasila+ mai fofoga o Ieova, ma toe faafoʻisia mai e Ieova iā te aʻu le lelei, nai lo o lana fetuu i lenei aso.”+
13 Ona ō atu pea lea o Tavita ma ona tagata i le ala, a o savali atu Semi i le itu o le mauga, ua la savavali faatasi ina ia fetuu iā te ia;+ ua ia fetogi pea o ia i maa a o savavali faatasi, ma asu atu foʻi le tele o le pefu.+
14 Ua taunuu le tupu ma le nuu uma sa iā te ia, ua lē lavavā. Ona latou mālōlō ai lea i inā.+
15 A ua ō atu Apisaloma ma le nuu uma, o tagata o Isaraelu i Ierusalema;+ ua faatasi foʻi Aitofele+ ma ia.
16 Ina ua oo atu Usai+ le Araki+ o le uō a Tavita+ iā Apisaloma, ona fai atu loa lea o Usai iā Apisaloma: “Ia soifua le tupu!+ Ia soifua le tupu!”
17 Ua fai mai Apisaloma iā Usai: “Po o lou alofa faamaoni ea lea i lau uō? Aiseā na e lē alu atu ai faatasi ma lau uō?”+
18 A ua fai atu Usai iā Apisaloma: “E leai; a o lē ua filifilia e Ieova ma lenei nuu ma tagata uma o Isaraelu, ou te iai faatasi ma ia, ou te nofo faatasi foʻi ma ia.
19 Ou te toe faapea atu, O ai ea ou te auauna i ai? Pe e lē o lona alo ea? E pei ona ou auauna i luma o lou tamā, e faapea foʻi ona ou auauna i ou luma.”+
20 Mulimuli ane, ua faapea mai Apisaloma iā Aitofele: “Inā fai mai ia sa outou fautuaga.+ O le ā se mea e tatou te faia?”
21 Ona fai atu lea o Aitofele iā Apisaloma: “Inā alu ane ia ma momoe ma palake a lou tamā,+ o ē na ia tuua e leoleo i le fale.+ E faalogo foʻi i ai Isaraelu uma ua e faia lenei mea, e ʻinoʻino+ ai lou tamā+ iā te oe, ona faamalolosi ai lea o lima+ o i latou uma o loo faatasi ma oe.”
22 Ua latou faatūina se faleʻie mo Apisaloma i luga o le fale,+ ona alu ane lea o Apisaloma ua momoe ma palake a lona tamā+ i luma o Isaraelu uma.+
23 O fautuaga a Aitofele ia na ia fautua ai i na aso, sa peiseaʻī ua fesili atu se tagata i le afioga a le Atua moni. Sa faapena foʻi fautuaga+ uma a Aitofele+ iā Tavita ma Apisaloma.
