2 Samuelu 18:1-33
18 Ua faitauina e Tavita le aofaʻi o le nuu o loo faatasi ma ia, ma ua tofia e ia o alii o ʻau e taʻitoʻaafe, ma alii o ʻau e taʻitoʻaselau e pule iā i latou.+
2 Ona aauina atu lea e Tavita o le tasi vaetolu+ o tagata e taʻitaʻia e Ioapo,+ o le isi tasi vae tolu e taʻitaʻia e Apisai+ le tama a Seruia, o le uso o Ioapo,+ a o le isi tasi vae tolu e taʻitaʻia e Itai+ le Kata. Ona faapea atu lea o le tupu i tagata: “Ou te alu atu lava e tatou te ō faatasi ma outou.”
3 A ua fai mai tagata: “E lē tatau ona e alu atu,+ auā afai e matou te sosola, e latou te lē manatu mai lava iā i matou;+ afai foʻi e feoti le ʻafa o i matou, e latou te lē manatu mai lava, auā e tusa oe ma le toʻasefulu afe o i matou;+ a o lenei, e sili atu ona lelei pe a e fesoasoani+ mai iā i matou mai i le aai.”
4 Ona fai atu lea o le tupu iā i latou: “O le mea e lelei iā te outou, ou te faia lea.”+ Ua tū pea le tupu i le itu o le faitotoʻa,+ a ua ō atu tagata uma e taʻitoʻaselau ma le taʻitoʻaafe.+
5 Ua poloaʻi atu le tupu iā Ioapo, o Apisai, ma Itai, e faapea: “Ia outou agalelei+ i le tauleʻaleʻa o Apisaloma ona o aʻu.” Ua faalogo ai foʻi tagata uma ina ua poloaʻi atu le tupu i alii uma e faatatau iā Apisaloma.
6 Ua ō atu pea tagata i lo latou ala e faafetaiaʻi iā Isaraelu; ma ua faia ai le taua i le vaomatua o Efaraima.+
7 Mulimuli ane, ua faatoʻilaloina+ le nuu o Isaraelu+ i inā i luma o auauna a Tavita, ma e matuā toʻatele tagata na fasia ai i lenā aso, e toʻalua sefulu afe.
8 Ua salalau solo atu le taua i inā i le laueleele uma. I le ma lea, e toʻatele atu tagata na fasiotia i le vaomatua, i lo o tagata na fasiotia i le pelu i lenā aso.
9 Ua fetaiaʻi Apisaloma ma auauna a Tavita. O loo tiʻetiʻe Apisaloma i le asini,* ona alu atu lea o le asini i lalo o lālā felefele o le laau telē, ua lāvea ai lona ulu i le laau telē, ma ua tuua ai o ia i le va o le lagi ma le lalolagi+ a o alu ese atu le asini.
10 Ua iloa atu lea mea e le tasi tagata, ona taʻu atu lea e ia iā Ioapo,+ ua faapea atu: “Faauta! Na ou iloa Apisaloma o tautau i luga o se laau telē.”
11 Ona fai mai lea o Ioapo i le tagata na taʻu atu iā te ia: “O lenā na e vaai i ai, aiseā na e lē fasiotia ai o ia ina ia paʻū i le eleele? Ana e faia faapena, semanū ou te tuuina atu lava iā te oe o tupe siliva e sefulu, ma se fusipaʻu.”+
12 A ua fai atu le tagata iā Ioapo: “E tusa lava pe e fuaina mai i loʻu lima o tupe siliva e afe, ou te lē faaooina lava loʻu lima i le atalii o le tupu; auā na tatou faalogo uma lava o poloaʻi atu le tupu iā te oe, o Apisai, ma Itai, e faapea, ‘Ia outou faaeteete ina neʻi mao se tasi i le tauleʻaleʻa o Apisaloma.’+
13 Ana ou faia faapea, semanū ua ou ʻolegia o ia, auā e lē lilo foʻi lenei mea i le tupu,+ ona e ʻalo lea.”
14 A ua fai mai Ioapo: “Ta te lē tutū ai pea faapenei!” Ona ia ave lea o matatao e tolu i lona lima ma tutuʻi+ ai le fatu+ o Apisaloma, a o ola pea o ia i totonu o le laau telē.
15 Ona ō mai ai lea o auauna e toʻasefulu e aveina auupega a Ioapo, ma fasi iā Apisaloma ina ia oti ai.+
16 Ona ili lea e Ioapo o le pū+ ina ia toe foʻi mai tagata mai i le tuliloaina o Isaraelu; auā ua taofia e Ioapo le nuu.
17 Mulimuli ane, ua latou ave Apisaloma ma lafo i se lua telē i le vaomatua, ma faaputu ai i ona luga se faaputuga maa telē.+ A o Isaraelu uma, ua taʻitasi ma sola i lona lava fale.
18 A o ola Apisaloma, na ia ave ma faatū mo ia lava se poutū,+ lea o loo i le Fanua Laugatasi o le Tupu,+ auā sa ia faapea ane: “E leai soʻu atalii e manatua ai pea loʻu igoa.”+ Ona ia faaigoa lea o le poutū i lona igoa,+ ma ua taʻua pea o le Maa Faamanatu a Apisaloma, e oo mai lava i aso nei.
19 A ua fai atu Aimaasu+ le atalii o Satoka: “Faamolemole, tuu mai aʻu seʻi oʻu tamoʻe e taʻu atu le tala i le tupu, auā ua faasaʻoloto e Ieova o ia mai i lima o ona fili.”+
20 Peitaʻi, ua fai mai Ioapo iā te ia: “E te lē avea se tala i lenei aso, ae seʻia oo i se isi aso ona e alu lea e ave le tala; o le asō e te lē avea ai se tala, auā ua oti le atalii o le tupu.”+
21 Ona fai atu lea o Ioapo i le tagata Kuso:+ “Inā alu ia ma taʻu atu i le tupu le mea na e vaaia.” Ua ifo le tagata Kuso iā Ioapo ma tamoʻe loa.
22 Ona toe fai mai lea o Aimaasu le atalii o Satoka iā Ioapo: “Tuu mai ia o aʻu seʻi oʻu tamoʻe atu faamolemole e mulimuli i le tagata Kuso, e tusa lava po o le ā le mea e tupu.” A ua fai atu Ioapo: “Loʻu atalii e, o le ā le mea e te tamoʻe atu ai, ae e leai se tala ua maua mai mo oe?”
23 A ua fai mai pea o ia: “Tuu mai pea aʻu seʻi oʻu tamoʻe, e tusa lava po o le ā le mea e tupu.” Ona fai atu lea o ia iā te ia: “Inā tamoʻe ia!” Ua tamoʻe atu Aimaasu, ua ui atu i le Itumalo,+ ona ia tamoʻe atu lea ma pasia le tagata Kuso.
24 O loo nofo Tavita i le va o faitotoʻa e lua.+ Ua alu atu le tagata vāai+ i le taualuga o le faitotoʻa o le pā. Ona ia vaai atu lea ma iloa ai se tagata o loo tamoʻe mai na o ia.
25 Ua valaau mai le tagata vāai ma taʻu mai i le tupu, ona fai atu lea o le tupu: “Afai e na o ia, ua ia aumaia se tala.” Ua tamoʻe mai pea o ia ma ua latalata mai.
26 Ua iloa atu foʻi e le tagata vāai se isi tagata o loo tamoʻe mai. Ona valaau atu lea o le tagata vāai i le leoleo faitotoʻa, ma faapea atu: “Faauta! Ua tamoʻe mai foʻi le isi tagata na o ia!” A ua fai atu le tupu: “Ua ia aumaia foʻi se tala.”
27 Ua fai mai le tagata vāai: “Ua ou vaai atu i le tamoʻe mai a lē o muamua, e pei o le tamoʻe+ a Aimaasu+ le atalii o Satoka.” Ona fai atu lea o le tupu: “O ia o se tagata lelei,+ o loo ia aumaia se tala lelei.”+
28 Mulimuli ane, ua valaau mai Aimaasu ma faapea mai i le tupu: “O loo saogalemu mea uma!” Ona ia ifo lea i le tupu ma faō i le eleele. Ua ia faapea atu: “Ia viia+ Ieova lou Atua, o lē na tuuina+ mai tagata na sii atu o latou lima i loʻu alii le tupu!”
29 Peitaʻi, ua fai atu le tupu: “Po o saogalemu le tauleʻaleʻa o Apisaloma?” Ua fai mai Aimaasu: “Na ou iloa le vevesi tele i le taimi na auina atu ai e Ioapo auauna a le tupu ma lau auauna, ae ou te leʻi iloa le mea na tupu.”+
30 Ua fai atu le tupu: “Sōsō ese ma tū ane i inā.” Ona ia sōsō ese lea ma tū ai pea.
31 Ona sau ai lea o le tagata Kuso,+ ua faapea mai le tagata Kuso: “Seʻi faafofoga mai loʻu alii le tupu i lenei tala, auā o le aso nei ua faasaʻoloto ai oe e Ieova mai i lima o ē uma na faasagatau iā te oe.”+
32 A ua faapea atu le tupu i le tagata Kuso: “Po o saogalemu ea le tauleʻaleʻa o Apisaloma?” Ua faapea mai le tagata Kuso: “Ia pei o le tauleʻaleʻa o fili uma o loʻu alii le tupu, ma i latou uma na agaleaga ma faasagatau mai iā te oe.”+
33 Ona tigā ai lea o le tupu ma alu aʻe i le potu i luga+ o le faitotoʻa, ua tagi ai, o upu foʻi nei na ia fai a o ia savali: “Loʻu atalii e, Apisaloma, loʻu atalii e, loʻu atalii e,+ Apisaloma! Ta fia oti e sui ai oe, loʻu atalii e, Apisaloma, loʻu atalii e!”+
Faamatalaga Pito i Lalo
^ Po o le “miula,” lea e maua mai i le upu Eperu e faasino atu i le tama a le asini poʻa ma le solofanua fafine.
