2 Samuelu 23:1-39
23 O toe upu nei a Tavita:+
“O upu a Tavita le atalii o Iese,+
O upu a le tagata ua faaeaina,+
O lē ua faauuina+ e le Atua o Iakopo,
O le fatupese mālie+ i Isaraelu.
2 O aʻu na fai mai ai le agaga o Ieova,+
O lana afioga foʻi sa i loʻu laulaufaiva.+
3 Na fetalai mai le Atua o Isaraelu,
Na fetalai mai iā te aʻu le Papa o Isaraelu,+
‘Pe a amiotonu lē e pule i tagata,+
E pule ona o le mataʻu i le Atua,+
4 Ona pei lea o le malamalama o le taeao ina ua susulu mai le lā,+
O le taeao maninoa.
Pe a mavae le timu, ona susulu mai lea o le lā ma tutupu ai vao i le eleele.’+
5 Pe e lē pei ea loʻu aiga e tusa ai ma le silasila a le Atua?+
Auā ua ia tofia iā te aʻu se feagaiga e tumau e faavavau,+
Ua saunia lelei i mea uma lava ma ua mausalī.+
Auā o loʻu faaolataga+ lea ma loʻu fiafiaga uma,
Pe e lē o le mea ea lea e faatupuina ai e ia?+
6 Auā ua tutuliesea+ tagata lē aogā+ uma lava, e pei o ni laau tuitui;+
Auā e lē mafai ona fetagofi i ai ni lima.
7 Pe a tago i ai se tagata
E ao ona iā te ia se auupega uʻamea ma le fuata o le tao,
E matuā susunuina lava i latou i le afi.”+
8 O igoa nei o toa+ sa iā Tavita: o Iosepi-pasete+ le tagata Hakemoni, o le taʻitaʻi o le toʻatolu. Na sii lona tao i tagata e toʻavalu selau, ma fasiotia ai i latou i le taimi e tasi.
9 E sosoo atu iā te ia o Eleasaro+ le atalii o Toto,+ o le atalii o Aokia, sa iai i toa e toʻatolu faatasi ma Tavita ina ua latou faifai iā Filisitia. Na latou faapotopoto faatasi i inā mo le taua, ona solomuli ai lea o tagata o Isaraelu.+
10 O ia lava na tulaʻi atu ma fasia Filisitia seʻia oo ina vaivai lona lima, ma ua mau pea le pelu i lona lima,+ ona faia ai lea e Ieova o le faaolataga tele i lenā aso;+ a o le nuu, ua toe foʻi atu i ona tua ma talai ofu o ē na fasiotia.+
11 Na sosoo atu iā te ia o Saama le atalii o Aka le Arari.+ Ua potopoto faatasi Filisitia i Leʻi, lea na iai se fasi fanua ua lilo i atasema;+ ua sosola foʻi le nuu ona o Filisitia.
12 A ua tū o ia i le ogatotonu o le fanua ma faasao le fanua ma fasia Filisitia, ona faia ai lea e Ieova o le faaolataga tele.+
13 Ua ō ifo toa e toʻatolu+ mai i taʻitaʻi e toʻatolu sefulu, ma ō atu i le seleselega iā Tavita i le ana o Atulame;+ a ua tolauapi Filisitia i faleʻie i le fanua laugatasi o Rafaimi.+
14 Sa iai Tavita i lenā taimi i le nofoaga e faigatā ona sao i ai se tasi;+ sa iai foʻi le leoleoga+ a Filisitia i Peteleema.
15 Mulimuli ane, ona faailoa lea e Tavita o lona manaʻo ma faapea ane: “Ta fia inu lava i le vai mai i le vaieli o Peteleema o loo i le faitotoʻa!”+
16 Ona ō atu faamalosi lea o nei toa e toʻatolu i le togālauapi a Filisitia, ma asu mai vai mai i le vaieli i Peteleema o loo i le faitotoʻa, ua ō mai ma aumai iā Tavita;+ ae e leʻi inu ai o ia, a ua ia sasaa+ atu iā Ieova.
17 Ua ia faapea ane: “Ieova e, ia mamao mai iā te aʻu+ ona faia o lenei mea! Po ou te inu ea i le toto+ o tagata na lamatia o latou ola?” E leʻi inu ai o ia.
O mea nei na faia e toa e toʻatolu.
18 A o Apisai+ le uso o Ioapo le tama a Seruia,+ o le taʻitaʻi o ia o le toʻatolu sefulu, na sii lona tao i ē na fasiotia e toʻatolu selau, na tutusa foʻi lona talaaga ma toa e toʻatolu.+
19 E ui lava na sili atu o ia i lo o le isi toʻatolu sefulu, na faia o ia ma o latou taʻitaʻi, ae e na te leʻi ausia le tulaga o uluaʻi toa e toʻatolu.+
20 A o Penaia+ le atalii o Ioiata,+ o le atalii o le toa o lē na faia le tele o mea i Kapeseelu,+ na ia fasia atalii e toʻalua o Arielu o Moapi; na ia alu ifo foʻi ma fasimate se leona+ i le lua, i le aso na toʻulu ai le kiona.+
21 O ia foʻi na fasia le tagata Aikupito e matuā tino ese.+ E ui sa iai se tao i le lima o le Aikupito, ae na alu ifo o ia ma le tootoo ma seʻi ese le tao mai i le lima o le Aikupito, ma fasiotia ai o ia i lona lava tao.+
22 O mea nei na faia e Penaia+ le atalii o Ioiata; na tutusa foʻi lona talaaga ma toa e toʻatolu.+
23 E ui lava ina sili atu o ia i lo o le isi toʻatolu sefulu, ae e na te leʻi ausia foʻi le tulaga o toa e toʻatolu; a ua tofia o ia e Tavita e avea ma tagata e puipuia lona saogalemu.+
24 O Asaelu+ le uso o Ioapo, sa aofia ai i toa e toʻatolu sefulu; o Eleana+ le atalii o Toto le Peteleema,
25 o Saama+ le Harota, o Elika le Harota,
26 o Helesa+ le Paleta, o Ira+ le atalii o Ikesa+ le Tikoa,
27 o Apieseru+ le Anatota,+ o Mepuna le Usa,+
28 o Salemone le Aokia,+ o Maarai+ le Netopa,
29 o Helepa+ le atalii o Panaa le Netopa, o Itai+ le atalii o Ripai le Kipea, o le fanauga a Peniamina,
30 o Penaia+ le Piratonu, o Hitai mai i ālia o Kaasa,+
31 o Api-elepona le Arapa, o Asemau+ le Paʻuma,
32 o Eliepa le Salapima, o le fanauga a Iasanu, o Ionatana,+
33 o Saama le Arari, o Aiamu+ le atalii o Saru le Arari,
34 o Elifaleta le atalii o Asepai, o le atalii o le Maakati, o Eliamu le atalii o Aitofele+ le Kilo,
35 o Heserai+ le Karamelu, o Pagarai le Arapi,
36 o Ikalo le atalii o Natano+ le Sopa, o Pani le Kato,
37 o Seleka+ le Amoni, o Naarai le Perota, o ē e aveina meatau a Ioapo le tama a Seruia,
38 o Ira le Ietero,+ o Karepa+ le Ietero,
39 ma Uria+ le Heti, e toʻatolu sefulu fitu i latou uma.
