2 Samuelu 5:1-25
5 Ona ō mai ai lea o ituaiga uma o Isaraelu iā Tavita+ i Heperona,+ ua faapea mai: “Faauta! O i matou nei o ou ivi ma ou aano.+
2 A o fai Saulo ma o matou tupu i aso ua mavae,+ o oe lava na fetaʻitaʻiina Isaraelu i mea na ō i ai.+ Na fetalai mai foʻi Ieova iā te oe, ‘O oe lava e te leoleoina+ loʻu nuu o Isaraelu, e avea foʻi oe ma taʻitaʻi+ iā Isaraelu.’”
3 Ona ō mai lea o toeaina+ uma o Isaraelu i le tupu i Heperona, ma ua osia ai e le Tupu o Tavita se feagaiga+ ma i latou i luma o Ieova i Heperona; ona latou faauuina+ lea o Tavita e fai ma tupu iā Isaraelu.+
4 E tolu sefulu tausaga o Tavita ina ua fai o ia ma tupu. Ae e fā sefulu tausaga+ na ia pule ai o se tupu.
5 Sa pule o ia o se tupu i Heperona iā Iuta mo tausaga e fitu ma masina e ono;+ ae i Ierusalema+ sa pule ai o ia o se tupu iā Isaraelu uma ma Iuta mo tausaga e tolu sefulu tolu.
6 Ona ō atu lea o le tupu ma ona tagata i Ierusalema e siitaua i tagata o Iepusē+ o ē sa nonofo i le nuu, a ua latou fai mai iā Tavita: “E te lē sao mai i inei, auā e tuliesea oe e tagata tauaso ma pipili,”+ auā ua latou manatu: “E lē sao mai lava Tavita i inei.”
7 Ua faapea foʻi ona faoa e Tavita le aai malosi o Siona,+ o le Aai lea a Tavita.+
8 Ona faapea ane lea o Tavita i lenā aso: “O se tasi e na te fasia tagata Iepusē+ ma oo atu i le alāvai,+ ia fasia foʻi e ia o tagata pipili ma tauaso o ē ua inosia e Tavita!” O le mea lea ua latou faapea ane ai: “E lē sau lava le pipili ma le tauaso i lenei fale.”
9 Ua nofo foʻi Tavita i le aai malupuipuia, lea ua faaigoa o le Aai a Tavita; ona ati faataamilo lea e Tavita e amata mai i le Mea Maupuʻepuʻe+ e oo i totonu.
10 Ua faateleina pea le mamalu o Tavita,+ ma sa faatasi Ieova le Atua o ʻau+ ma ia.+
11 Ua aauina mai e Hiramo+ le tupu o Turo o avefeʻau+ iā Tavita, na avatu foʻi laau o le arasi,+ o le ʻaukamuta, ma ē e atiina pā maa, ua latou fausia foʻi se fale mo Tavita.+
12 Ona iloa ai lea e Tavita ua matuā faatumauina e Ieova o ia e fai ma tupu iā Isaraelu,+ ma ua ia faaeaina+ foʻi lona malo ona o lona nuu o Isaraelu.+
13 Ua faia foʻi e Tavita o nisi palake+ ma nisi avā+ i Ierusalema ina ua alu ese o ia mai i Heperona; ua toe fanau ai foʻi e Tavita nisi o atalii ma nisi o afafine.
14 O igoa nei o i latou na fananau mai iā te ia i Ierusalema: O Samua,+ o Sopapa,+ o Natano,+ o Solomona,+
15 o Ivara, o Elisua,+ o Nefeku,+ o Iafia,+
16 o Elisama,+ o Eliata, ma Elifaleta.+
17 Ua faalogo Filisitia ua latou faauuina Tavita e fai ma tupu iā Isaraelu.+ Ona ō aʻe ai lea o Filisitia uma e saʻili iā Tavita. Ina ua faalogo i ai Tavita, ona alu ifo lea o ia i le nofoaga e faigatā ona sao i ai se tasi.+
18 Ona ō atu lea o Filisitia ma feoaʻi solo i le fanua laugatasi o Rafaimi.+
19 Ua fesili+ atu Tavita iā Ieova e faapea: “Po ou te alu aʻe ea e tau ma Filisitia? Pe e te tuuina mai i latou i oʻu lima?” Ona fetalai mai lea o Ieova iā Tavita: “Inā alu aʻe ia, auā ou te tuuina atu lava Filisitia i ou lima.”+
20 Ua alu atu Tavita i Paala-faresa,+ ma ua fasia ai e Tavita i latou i inā. Ona faapea ane lea o ia: “Ua osofaʻia e Ieova oʻu fili,+ e pei o le oso mai o le vai.” O le mea lenā ua ia faaigoa ai lenā nofoaga o Paala-faresa.+
21 Ua latou tuua o latou tupua+ i inā, ona aveese ai lea e Tavita ma ona tagata.+
22 Mulimuli ane, ua toe ō aʻe Filisitia+ ma feoaʻi solo i le fanua laugatasi o Rafaimi.+
23 Ona fesili+ atu lea o Tavita iā Ieova, a ua fetalai mai o ia: “Aua e te alu aʻe. Ae ia e faataamilo i o latou tua, ma ia e alu atu e faafetaui i latou i luma mai o vao peka.+
24 Ia faapenei ona fai, pe a e faalogo i le paʻō o le savavali i tumutumu o vao peka, ona e gaoioi vave lea,+ auā o le taimi lenā ua muamua atu ai Ieova i ou luma e fasia le ʻautau a Filisitia.”+
25 Ona faia lea e Tavita e pei ona poloaʻi mai ai o Ieova iā te ia,+ ua ia fasia+ Filisitia e amata mai i Kepa+ e oo atu i Kasera.+
