2 Samuelu 9:1-13
9 Ona fai atu lea o Tavita: “Po o iai ea se tasi o totoe o le aiga o Saulo, ina ia ou alofa faamaoni+ iā te ia ona o Ionatana?”+
2 Sa i le aiga o Saulo le auauna e igoa iā Sipa.+ Ona latou aumaia lea o ia iā Tavita, ua fesili atu foʻi le tupu iā te ia: “Po o oe ea o Sipa?” Ona fai mai lea o ia: “O aʻu o lau auauna.”
3 Ua fai atu le tupu: “Po o iai ea se tasi o totoe o le aiga o Saulo, ina ia ou faaalia iā te ia le alofa faamaoni o le Atua?”+ Ona faapea mai lea o Sipa i le tupu: “E iai le atalii o loo totoe o Ionatana, e pipili ona vae.”+
4 Ua fai atu le tupu: “O fea o iai o ia?” Ona fai mai lea o Sipa i le tupu: “Faauta! O loo iai o ia i le fale o Makiro+ le atalii o Amueli i Lotapara.”+
5 Ua feʻau faavave atu e le Tupu o Tavita, ma aumaia o ia mai i le fale o Makiro le atalii o Amueli i Lotapara.
6 Ina ua sau Mefiposeta le atalii o Ionatana, le atalii o Saulo iā Tavita, ona ia faapaʻū faō lea ma ifo.+ Ua fai atu Tavita: “Mefiposeta e!” a ua fai mai o ia: “O lau auauna lenei.”
7 Ona toe fai atu lea o Tavita: “Aua e te fefe, auā ou te alofa faamaoni+ lava iā te oe ona o Ionatana lou tamā;+ ou te toe faafoʻi atu foʻi iā te oe o fanua+ uma o Saulo le tamā o lou tamā, a o oe, e te ʻai e lē aunoa i meaʻai i laʻu laulau.”+
8 Ona ifo lea o ia ma faapea mai: “O ai ea lau auauna ina ua e silasila ai i le taʻifau ua mate,+ e pei o aʻu nei?”
9 Ua valaau atu le tupu iā Sipa le auauna a Saulo, ma faapea atu iā te ia: “O mea uma lava a Saulo ma lona aiga uma, ou te avatu+ i le atalii o le atalii o lou matai.
10 Ia e galueaʻiina le fanua mo ia, o oe ma ou atalii ma au auauna, ia outou aoina foʻi fua, ia avea ma meaʻai mo i latou o le aiga o le atalii o le atalii o lou matai, ia latou aai ai; a o Mefiposeta le atalii o le atalii o lou matai, e ʻai e lē aunoa o ia i meaʻai i laʻu laulau.”+
Sa iai atalii e toʻasefulu lima o Sipa ma auauna e toʻalua sefulu.+
11 Ua fai mai Sipa i le tupu: “O mea uma ua poloaʻia e loʻu alii le tupu mo lana auauna, e faapea lava ona fai e lau auauna; ae o Mefiposeta+ e ʻai o ia i laʻu laulau e pei o se tasi o atalii o le tupu.”
12 Sa iai le atalii o Mefiposeta e igoa iā Mika,+ ma o ē uma o nonofo i le fale o Sipa, o i latou o auauna a Mefiposeta.
13 Sa nofo Mefiposeta i Ierusalema, auā sa ʻai e lē aunoa o ia i meaʻai i le laoai a le tupu;+ sa pipili foʻi ona vae e lua.+
