2 Timoteo 3:1-17
3 Ia iloa lenei mea, o aso e gata ai+ e oo mai ai aso e sili ona faigatā.+
2 Auā e avea tagata ma ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, o ē e fai upuleaga i isi, o ē e lē usiusitaʻi i mātua,+ o ē e lē lotofaafetai, o ē e lē faamaoni,+
3 o ē e lē lotoaiga,+ o ē e mumusu i maliega,+ o ē e faia tala taufaaleaga,+ o ē e lē amio pulea, o ē e sauā,*+ o ē e lē fiafia i mea lelei,+
4 o ē e faalata,+ o ē e faaulumalō, o ē ua faafefeteina i le faamaualuga,+ o ē e pupū i mea faafiafia nai lo o le alolofa i le Atua,+
5 o ē e foliga mai e faamaoni i le Atua,+ ae e latou te lē o ola e tusa ai ma lea mana;+ ia ʻaloese mai iā i latou na.+
6 Auā o i latou na ua tutupu mai ai tane o ē e ō atu ma le faaʻoleʻole e faasesē tagata o aiga,+ ma puʻeina fafine ua vaivai o ē ua tumu i agasala ma pulea e tuʻinanauga eseese,+
7 ua aʻoaʻoina soo ae e leʻi mafai lava ona latou maua le poto saʻo i le upu moni.+
8 E pei ona tetee o Iani ma Iameri+ iā Mose, e faapena foʻi ona tetee i latou na i le upu moni,+ o tane ua lē o toe sagatonu o latou mafaufau,+ ua lē taliaina o ni ē e mulimuli i le faatuatua.+
9 Peitaʻi, e lē toe agaʻigaʻi i luma i latou, auā e iloa uma e tagata lo latou vālea, e pei foʻi ona sa iloa le vālea o na tane e toʻalua.+
10 Ae ua e mulimulituʻi i aʻu aʻoaʻoga, o loʻu olaga,+ o loʻu sini, o loʻu faatuatua, o loʻu faapalepale, o loʻu alofa, o loʻu tumau,
11 o sauāga ma puapuaga, o mea ia na oo iā te aʻu i Anetioka,+ i Ikonio+ ma Lusa,+ o ituaiga o sauāga na sa ou lavātia; ae peitaʻi na laveaʻiina+ aʻu e le Alii mai i na mea uma.
12 O le mea moni, e sauāina i latou uma e naunau e ola ma le faamaoni i le Atua ma aufaatasi ma Keriso Iesu.+
13 A o tagata amioleaga ma ē taufaasesē, e faateteleina pea lo latou leaga, o loo faasesē atu i nisi ma ua faasesēina foʻi i latou.+
14 A o oe, ia e tausisi pea i mea ua e aʻoaʻoina ma na faatalitonu+ ai oe, auā ua e iloa tagata na aʻoaʻoina oe+
15 na e iloa foʻi tusitusiga paia talu ona e laʻitiiti,+ lea e mafai ona faapotoina ai oe mo le faaolataga+ e ala i le faatuatua e tusa ai ma Keriso Iesu.+
16 O Tusitusiga Paia uma e mai i le agaga o le Atua,*+ ma e aogā e aʻoaʻo ai,+ e aʻoaʻi ai,+ e faasaʻo ai mea,+ e faatonu+ ai i le amiotonu,
17 ina ia matuā agavaa+ ai le tagata o le Atua, e lava saunia mo galuega lelei uma.+
Faamatalaga Pito i Lalo
^ I le gagana Eleni, e “taufeʻai.”
^ I le gagana Eleni, ua “mānava le Atua.”
