2 Timoteo 4:1-22
4 Ou te matuā fai atu iā te oe i luma o le Atua ma Keriso Iesu, o lē ua tofia e faamasino+ i ē e ola ma ē ua oti,+ pe a faaali+ mai ma lona malo,+
2 ia talaʻi atu le upu,+ ia maelega i taimi e sologa lelei ai,+ ma taimi e lē sologa lelei ai,+ ia aʻoaʻi atu,+ ia matuā faatonu atu, ia apoapoaʻi atu ma le faapalepale+ ma le tomai e aʻoaʻo atu.
3 Auā e iai le taimi e latou te lē toe taliaina ai aʻoaʻoga aogā,*+ ae e tusa ai ma o latou lava tuʻinanauga, e latou te aoaoina aʻoaʻo mo i latou ina ia faalogo o latou taliga i mea e logolelei iā i latou lava;+
4 e liliuese foʻi o latou taliga mai i le upu moni, ae e liliu atu i tala sesē.+
5 A o oe, ia faaauau ona e mafaufau lelei+ i mea uma, ia onosaʻi i mea leaga,+ ia fai le galuega a le faievagelia,*+ ia faia ma le māeʻaeʻa lau faiva.+
6 Auā ua liligiina atu aʻu e pei o se taulaga i meainu,+ ma ua lata le taimi e faasaʻolotoina+ ai aʻu.
7 Ua ou tau le taua lelei,+ ua ou faaiʻuina le tausinioga,+ ua ou tausia le faatuatua.+
8 E amata atu nei, ua teuina mo aʻu le pale o le amiotonu,+ lea e tuuina mai iā te aʻu o se taui+ i lenā aso+ e le Alii o le faamasino amiotonu,+ e lē na o aʻu, ae faapea foʻi i latou o ē o naunau i lona faaali mai.
9 Ia e taumafai malosi e vave sau iā te aʻu.+
10 Auā ua tuulafoaʻiina aʻu e Tema+ ona o le naunau tele i lenei faiga o mea a le lalolagi,+ ma ua alu atu o ia i Tesalonia; ua alu atu Kerese i Kalatia,+ ae alu atu Tito i Talamatia.
11 Ua na o Luka o loo faatasi ma aʻu. Ia oulua ō mai ma Mareko, auā e aogā+ o ia iā te aʻu i le auaunaga.
12 Ae ua ou auina atu Tuiko+ i Efeso.
13 Pe a e sau, ia aumai le ofu tele na ou tuua i Teroa+ iā Kaapo, ma tusi tāʻai, aemaise lava paʻu e tusitusi ai.
14 Na matuā agaleaga Alesana+ le tagata fai mea ʻapamemea iā te aʻu, ae e toe taui atu e Ieova iā te ia e tusa ma ana gaoioiga+
15 ma ia e faaeteete foʻi iā te ia, auā na ia matuā tetee mai lava i a matou upu.
16 I laʻu uluaʻi tali atu i le faamasinoga, e leai se tasi na ʻau mai iā te aʻu, ae na latou tuulafoaʻiina aʻu;+ tau ina ia lē faasalaina i latou e tusa ma lenei mea+
17 ae na latalata mai le Alii+ ma foaʻi mai le mana iā te aʻu,+ ina ia faia ma le māeʻaeʻa le talaʻiga e ala iā te aʻu ma ia faalogo ai nuu uma;+ ma na laveaʻiina aʻu mai i le gutu o le leona.+
18 E laveaʻiina+ aʻu e le Alii mai i galuega leaga uma ma e na te faaolaina aʻu mo lona malo+ i le lagi. Ia iā te ia le mamalu e faavavau, faavavau lava. Amene.
19 Ia momoli atu oʻu alofa iā Piseka*+ ma Akula, ma le aiga o Oneseforo.+
20 Na nofo Erato+ i Korinito,+ ae na ou tuua Tofimo+ a o maʻi o ia i Meleto.+
21 Ia e taumafai malosi e taunuu a o leʻi oo i le tau mālūlū.
O loo momoli atu alofaaga o Eupolo, atoa foʻi ma Paute, ma Lino, ma Kalaotia, ma le ʻauuso uma.
22 Ia iai le Alii i le agaga ua e faaalia.+ Ia iā te outou foʻi lona agalelei faifua.
Faamatalaga Pito i Lalo
^ Po o “aʻoaʻoga e malosi ai.”
^ Po o “le galuega faamisionare.”
^ Po o “Pisila.”
