2 Tupu 17:1-41
17 O le tausaga lona sefulu lua o le nofoaiga a Aasa le tupu o Iuta, na fai ai Hosea+ le atalii o Ele ma tupu o Isaraelu i Samaria,+ i tausaga e iva.
2 Na faia pea e ia o mea leaga i le silafaga a Ieova, ae e lē pei o tupu o Isaraelu na muamua iā te ia.+
3 Ua siitaua mai iā te ia Salemanesa+ le tupu o Asuria,+ ma ua avea Hosea ma ana auauna, ua avatu foʻi meaalofa+ iā te ia.
4 Ae peitaʻi, na iloa e le tupu o Asuria le fouvale+ o Hosea i lona aauina atu o ni avefeʻau iā So le tupu o Aikupito,+ ma e leʻi avatua foʻi e ia meaalofa i le tupu o Asuria e pei o tausaga ua mavae. O lea, na taofia ai o ia e le tupu o Asuria, ma noanoatia i le falepuipui.+
5 Ona alu aʻe lea o le tupu o Asuria ma siitaua i le nuu uma, ua alu aʻe foʻi ma siʻosiʻomia+ Samaria i tausaga e tolu.
6 O le tausaga lona iva o le nofoaiga a Hosea, na faatoʻilaloina ai Samaria+ e le tupu o Asuria, ma ave faapagota+ Isaraelu i Asuria ma faanonofo ai pea i latou i Hala,+ i Havoli i le vaitafe o Kosane,+ ma i aai o Metai.+
7 Na oo mai lenei mea, talu ai ua agasala+ le fanauga a Isaraelu iā Ieova lo latou Atua, o lē na aveina aʻe i latou mai i le nuu o Aikupito,+ mai i lima o Farao le tupu o Aikupito, ma ua latou auauna foʻi i isi atua;+
8 ua latou savavali pea i tulafono+ a nuu ese na tuliesea e Ieova mai i luma o le fanauga a Isaraelu, ma tulafono a tupu o Isaraelu na faia e i latou lava;
9 ua faia e le fanauga a Isaraelu mea ua lē tonu iā Ieova lo latou Atua,+ ma faia pea e i latou mea maualuluga+ i aai uma, e mai i le ʻolo+ o tagata vāai e oo atu i le aai malupuipuia;
10 ua latou faatutūina pea mo i latou o poutū paia,+ ma pou paia+ i luga o aʻega uma+ ma lalo o laau lauolaola uma;+
11 ua latou faamū pea taulaga i mea maualuluga e pei o nuu ese+ na aveina faapagota e Ieova mai i o latou luma, ua faaauau foʻi ona latou faia o mea leaga e faatigā+ ai iā Ieova;
12 Ua faaauau ona latou auauna i tupua inosia,+ o le mea na fetalai mai ai Ieova iā i latou: “Aua neʻi outou faia lenei mea”;+
13 ua lapataʻi+ mai pea Ieova iā Isaraelu+ ma Iuta+ e ala i ana perofeta uma,+ ma ē e faamatalaina faaaliga,+ e faapea: “Inā liliuese ia mai i o outou ala leaga+ ma tausia aʻu poloaʻiga+ ma aʻu tulafono,+ e tusa ma mea uma o loo i le tulafono+ na ou poloaʻi atu ai i o outou augātamā,+ ma ou tuuina atu ai foʻi iā te outou e ala i aʻu auauna o perofeta”;+
14 ua lē faalogo i latou, a ua faauamaaa+ pea e pei ona faauamaaa o o latou augātamā, o ē e leʻi faatuatua+ iā Ieova lo latou Atua;
15 ua latou teena pea ana faatulagaga ma lana feagaiga+ na ia osia ma o latou augātamā, ma ana faamanatuga+ na ia lapataʻia ai i latou, ua latou mulimuli atu pea i tupua e lē aogā+ ma avea ai i latou ma ē e lē aogā,+ ua latou faaaʻoaʻo foʻi i nuu ese na siʻomiaina i latou, o ē na poloaʻi mai ai Ieova e aua neʻi faia e pei ona latou faia;+
16 Ua faaauau foʻi ona latou tuua poloaʻiga+ uma a Ieova lo latou Atua, ua latou faia mo i latou o tupua uʻamea,+ o tamaʻi povi poʻa e lua,+ ua faia foʻi se pou paia,+ ma ua latou ifo i ʻau uma o le lagi+ ma auauna atu iā Paala;+
17 ua latou faaui ane pea o latou atalii ma afafine i le afi,+ ma faia valovaloga faataulāitu,+ ma saʻili i faailoga,+ ma ua latou tuuina atu+ pea i latou e faia mea leaga i le silafaga a Ieova, e faatigā+ ai iā te ia;
18 O le mea lea na matuā toʻatamaʻi+ ai Ieova iā Isaraelu, ma ia aveesea ai i latou mai i ona luma.+ E na te leʻi faatotoeina ai foʻi se tasi, e na o le ituaiga lava o Iuta.+
19 Ae e leʻi tausia foʻi e Iuta poloaʻiga a Ieova lo latou Atua,+ a ua latou savavali i tulafono lava ia na faia e Isaraelu.+
20 Ona teena lea e Ieova o le fanauga+ uma a Isaraelu ma faapuapuagatia pea i latou, ma tuuina atu i latou i lima o ē e faomea, seʻia ona lafoaʻi ese i latou mai i ona luma.+
21 Auā ua vavaeese e ia o Isaraelu mai i le aiga o Tavita, ma ua latou faia Ierepoamo le atalii o Nepata ma tupu; ua taʻitaʻi ese e Ierepoamo+ o Isaraelu mai i le mulimuli atu iā Ieova, ma ua ia faapogaia foʻi i latou e agasala i le agasala tele.+
22 Ua savavali foʻi le fanauga a Isaraelu i agasala uma na faia e Ierepoamo.+ E leʻi liliuese ai i latou,
23 seʻia aveesea e Ieova Isaraelu mai i ona luma,+ e pei ona ia fetalai mai ai e ala i ana auauna uma o perofeta.+ Ona ave faapagota lea o Isaraelu mai i lona lava laueleele i Asuria, e oo mai i le aso nei.+
24 Mulimuli ane, ua aumaia e le tupu o Asuria tagata mai i Papelonia,+ o Kuta, o Ava,+ o Amato,+ ma Sefavaima,+ ma faanonofo i latou i aai o Samaria+ nai lo o le fanauga a Isaraelu; ua fai foʻi e i latou Samaria ma o latou tofi ma nonofo ai i ona aai.
25 Ina ua amata ona latou nonofo ai i inā, latou te leʻi matataʻu+ iā Ieova. Ona aauina atu lea e Ieova o leona+ iā i latou, ma faaumatia ai nisi o i latou.
26 Ona latou taʻu atu lea i le tupu o Asuria, e faapea: “O nuu ese na e aveina faapagota ma faanonofo i aai o Samaria, e lē iloa le tapuaʻiga a le Atua o le nuu, ma ua ia aauina mai ai pea o leona iā i latou;+ faauta! ua faaumatia ai i latou, auā e leai ma se tasi e iloa le tapuaʻiga a le Atua o le nuu.”
27 Ona poloaʻi mai lea o le tupu o Asuria, e faapea: “Ia auina atu i inā se ositaulaga,+ o lē na outou aveina faapagota mai i inā, ina ia alu atu o ia ma nofo ai i inā, e aʻoaʻo i latou i le tapuaʻiga a le Atua o le nuu.”
28 Ua alu atu se tasi o ositaulaga o lē na latou aveina faapagota mai i Samaria, ma ua nofo ai i Peteli,+ ua avea foʻi o ia ma faiaʻoga iā i latou, e aʻoaʻoina i latou i le uiga o le mataʻu iā Ieova.+
29 Ae peitaʻi, ua taʻitasi le nuu ma faia lona lava atua,+ ma latou tuuina ai i le fale o mea maualuluga na faia e tagata Samaria, ua taʻitasi le nuu ma faia i o latou aai na nonofo ai.
30 Ua faia e tagata Papelonia o Suko-peno, ma ua faia e tagata Kuta+ o Nekala, ua faia foʻi e tagata Amato o Asima.
31 Ua faia e tagata Ava+ o Niveasa ma Tareaka; ma ua susunuina e tagata Sefavaima+ i le afi+ o latou atalii mo Atameleko ma Anameleko, o atua ia o Sefavaima.
32 Ua avea i latou ma ē e matataʻu iā Ieova, ma tofia foʻi mo i latou mai i o latou lava tagata o ositaulaga+ i mea maualuluga, ma ua galulue ai mo i latou i le fale o mea maualuluga.
33 Ua latou matataʻu iā Ieova,+ ae ua latou tapuaʻi atu i o latou lava atua,+ e tusa ma le tapuaʻiga a nuu o ē na aveina faapagota i latou.+
34 E oo mai lava i le asō, o loo latou faia e pei o a latou tapuaʻiga muamua.+ E leai se tasi na mataʻu iā Ieova,+ e leai foʻi se tasi na faia e tusa ma ana aiāiga, o iʻuga o ana faamasinoga,+ o le tulafono,+ ma le poloaʻiga+ na poloaʻi mai ai Ieova i le fanau a Iakopo,+ o lē na ia faaigoa iā Isaraelu;+
35 ina ua osia e Ieova se feagaiga+ ma i latou, ma ia poloaʻia i latou e faapea: “Aua tou te matataʻu i isi atua,+ aua foʻi tou te ifo atu iā i latou, pe auauna iā i latou, pe fai taulaga foʻi iā i latou.+
36 A o Ieova, o lē na aveina aʻe outou mai i le nuu o Aikupito ma le mana tele, ma le aao faaloaloa,+ o Ia e ao ona outou matataʻu i ai,+ o ia e ao ona outou ifo+ i ai, o ia foʻi e ao ona outou fai taulaga i ai.+
37 O faatulagaga,+ o iʻuga o faamasinoga,+ o le tulafono, ma le poloaʻiga na ia tusia mo outou,+ ia outou tausi i ai i aso uma lava;+ aua foʻi tou te auauna i isi atua.
38 O le feagaiga foʻi na ou osia ma outou, aua lava neʻi outou faagaloina;+ aua foʻi neʻi outou matataʻu i isi atua.+
39 A ia outou matataʻu iā Ieova+ lo outou Atua, auā o ia e na te laveaʻiina outou mai i lima o outou fili uma.”+
40 Ae latou te leʻi usiusitaʻi, a ua latou faia e tusa ai ma la latou tapuaʻiga muamua.+
41 Ua avea nei nuu ma ē e matataʻu iā Ieova,+ a ua latou auauna i a latou lava faatusa na tāina. A o o latou atalii ma atalii o o latou atalii, na latou faia e pei ona faia e o latou augātamā, seʻia oo mai lava i aso nei.
