2 Tupu 21:1-26
21 E sefulu lua tausaga o Manase+ ina ua fai o ia ma tupu, na pule foʻi o ia i Ierusalema i tausaga e lima sefulu lima. O le igoa o lona tinā o Efiseva.
2 Na ia faia mea leaga i le silafaga a Ieova,+ e tusa ma mea inosia a nuu ese+ na tuliesea e Ieova mai i luma o le fanauga a Isaraelu.
3 Na toe faia e ia o mea maualuluga na faaumatia e Esekia lona tamā,+ na ia faatūina foʻi fata faitaulaga iā Paala, ma faia le pou paia e pei ona faia e Aapo+ le tupu o Isaraelu; ua ifo+ foʻi o ia i ʻau uma o le lagi+ ma auauna i ai.+
4 Ua ia faia fata faitaulaga i le fale o Ieova,+ e tusa ma le mea na fetalai mai ai Ieova: “Ou te tuu loʻu igoa i Ierusalema.”+
5 Ua ia faia foʻi fata faitaulaga i ʻau uma o le lagi+ i lotoā e lua o le fale o Ieova.+
6 Ua ia faaui ane foʻi lona atalii i le afi,+ ma faia faiga faaagaga,+ ma saʻili i faailoga, ua ia tofia foʻi taulāitu+ ma ē e vavalo+ i mea e tutupu. E matuā tele lava mea leaga na ia faia i le silafaga a Ieova e faatigā ai iā te ia.
7 Ua ia tuu foʻi le faatusa ua tā+ o le pou paia na ia faia i le fale,+ na fetalai mai ai Ieova iā Tavita ma Solomona lona atalii: “O lenei fale ma Ierusalema, ua ou filifilia mai i ituaiga uma o Isaraelu, ou te tuu ai loʻu igoa i aso uma lava.+
8 Ou te lē toe tuliesea foʻi Isaraelu mai i le laueleele na ou tuuina atu i o latou augātamā,+ tau lava o lo latou faia e tusa ma mea uma na ou poloaʻi atu ai iā i latou,+ e oo lava i le tulafono uma na poloaʻi atu ai laʻu auauna o Mose iā i latou.”
9 Ae latou te leʻi faalogo,+ a ua faasesēina pea i latou e Manase ina ia faia mea leaga+ e sili atu, nai lo o nuu+ na faaumatia e Ieova mai i luma o le fanauga a Isaraelu.
10 Ua fetalai mai pea Ieova e ala i ana auauna o perofeta,+ e faapea:
11 “Talu ai ua faia e Manase+ le tupu o Iuta nei mea inosia,+ ua sili atu lona amioleaga nai lo o mea na faia e tagata Amorī+ na muamua atu iā te ia, ua ia faapogaia foʻi Iuta e agasala+ i ana tupua inosia.
12 O le mea lea ua faapea ona fetalai mai ai o Ieova le Atua o Isaraelu, ‘Ou te aumaia puapuaga i luga o Ierusalema+ ma Iuta, afai foʻi e faalogo i ai se tasi, e faateʻia*+ ai o ia.
13 Ou te fālō atu foʻi i luga o Ierusalema le fua+ na fuaina ai Samaria,+ ma le fua vai na fuaina ai le aiga o Aapo;+ ou te solo+ mamā lava Ierusalema e pei ona solo mamā e se tasi o le ipu faaofuofu e leai se ʻau, e solo mamā ma faafaō.+
14 Ou te lafoaʻi foʻi le vaega totoe+ o loʻu tofi+ ma tuuina atu i latou i lima o o latou fili, e ave faapagota ma faoa a latou oloa e o latou fili uma,+
15 talu ai ua latou faia mea leaga i oʻu luma, ma ua latou faatigā pea iā te aʻu mai i le aso na ō mai ai o latou augātamā mai i Aikupito seʻia oo mai i aso nei.’”+
16 Na faamasaaina+ foʻi e Manase le toto o le toʻatele o tagata e lē sala, seʻia oo ina tumu ai Ierusalema mai i le tasi itu e oo atu i le isi itu, e ese mai i lana agasala na ia faapogaia ai Isaraelu e agasala, i lona faia o le mea leaga i le silafaga a Ieova.+
17 A o le olaga uma o Manase, ma mea uma na ia faia, atoa ma lana agasala na ia agasala ai, po ua lē o tusia ea i le tusi+ e faatatau i olaga o tupu o Iuta?
18 Mulimuli ane, ua taoto Manase faatasi ma ona augātamā,+ ma ua tanu i le lotoā o lona fale i le lotoā o Usa;+ a ua pule Amone lona atalii e sui iā te ia.
19 E lua sefulu lua tausaga o Amone+ ina ua fai o ia ma tupu, ma e lua tausaga+ na ia pule ai i Ierusalema. O le igoa o lona tinā o Mesuleme le afafine o Arusa mai i Iatepa.
20 Na ia faia pea mea leaga i le silafaga a Ieova, e pei ona faia e Manase lona tamā.+
21 Na ia savali pea lava i ala uma na savali ai lona tamā,+ na ia auauna pea i tupua inosia+ na auauna i ai lona tamā, ma ifo atu i ai.
22 Ua ia tuulafoaʻia Ieova+ le Atua o ona augātamā, e leʻi savali foʻi o ia i ala o Ieova.+
23 Mulimuli ane, ona fouvale lea o auauna a Amone iā te ia, ma fasiotia+ le tupu i lona lava fale.
24 A ua fasiotia e tagata o le nuu o ē uma na fouvale+ i le Tupu o Amone. Ona faia lea e tagata o le nuu o Iosia+ lona atalii ma tupu e sui iā te ia.
25 A o le olaga uma o Amone, o mea na ia faia, po ua lē o tusia ea i le tusi+ e faatatau i olaga o tupu o Iuta?
26 Ua latou tanu o ia i lona tuugamau i le lotoā o Usa;+ ona pule lea o Iosia+ lona atalii e sui iā te ia.
Faamatalaga Pito i Lalo
^ I le gagana Eperu, “ua taalili ona taliga.”
