2 Tupu 24:1-20
24 I ona aso, na alu aʻe ai Nepukanesa+ le tupu o Papelonia, ona fai ai lea o Ioakima ma ana auauna+ mo tausaga e tolu. Ae peitaʻi, na liliu atu o ia ma fouvale iā te ia.
2 Ona aauina atu lea e Ieova iā te ia o ʻau e faoa mea mai i Kaletaia,+ o ʻau e faoa mea mai i Suria, o ʻau e faoa mea mai i Moapi,+ ma ʻau e faoa mea mai i le fanauga a Amoni, ua ia aauina atu pea i latou e siitaua iā Iuta ma faaumatia ai, e tusa ai ma le afioga a Ieova+ na fetalai mai e ala i ana auauna le ʻauperofeta.
3 O le faatonuga lava a Ieova na oo ai lea mea iā Iuta, ina ia aveesea+ ai mai i ona luma ona o agasala a Manase,+ e tusa ma mea uma na ia faia;
4 ona o le toto foʻi o tagata e lē sala+ na ia faamaligiina, ua ia faatumuina ai Ierusalema i le toto o tagata e lē sala, ma e leʻi finagalo malie ai Ieova e faamagaloina o ia.+
5 A o le olaga uma o Ioakima+ ma mea uma na ia faia, po ua lē o tusia ea i le tusi+ e faatatau i olaga o tupu o Iuta?
6 Mulimuli ane, ua taoto Ioakima faatasi ma ona augātamā,+ ona pule lea o Ioakina lona atalii e sui iā te ia.
7 E leʻi toe+ sau lava le tupu o Aikupito mai i lona nuu,+ auā ua ave e le tupu o Papelonia mea uma a le tupu o Aikupito,+ e amata mai i le ālia+ o Aikupito e alu aʻe i le vaitafe o Eufirate.+
8 E sefulu valu tausaga o Ioakina+ ina ua fai o ia ma tupu, ma e tolu masina na pule ai o ia i Ierusalema.+ O le igoa o lona tinā o Neuseta, le afafine o Elenatana mai i Ierusalema.
9 Na ia faia pea mea leaga i le silafaga a Ieova, e tusa ma mea uma na faia e lona tamā.+
10 I le taimi lenā, na ō aʻe ai i Ierusalema auauna a Nepukanesa le tupu o Papelonia, ma siʻomia le aai.+
11 Ona sau lea o Nepukanesa le tupu o Papelonia e siitaua i le aai, a o siʻomia e ana auauna le aai.+
12 Ua alu atu Ioakina le tupu o Iuta i le tupu o Papelonia,+ o ia ma lona tinā,+ o ana auauna, o ana perenise, ma ona tagata aloaʻia; ua ave faapagota foʻi o ia e le tupu o Papelonia i le tausaga lona valu+ talu ona fai o ia ma tupu.
13 Ona ia aumaia lea mai i inā o oloa uma o le fale o Ieova ma oloa o le fale o le tupu,+ ua ia taʻei foʻi ipu auro+ uma na faia e Solomona le tupu o Isaraelu i le malumalu o Ieova, e pei lava ona fetalai mai ai Ieova.
14 Ua ia ave faapagota+ foʻi Ierusalema uma, o perenise+ uma, o tagata totoa uma ma malolosi,+ atoa foʻi ma tufuga+ uma ma ē e faia pā, e toʻasefulu afe o ē na ave faapagota. E leai se tasi na tuua seʻi vaganā ai tagata faatauvaa+ o le nuu.
15 Ona ia ave faapagota lea o Ioakina+ i Papelonia;+ ua ia ave faapagota foʻi mai i Ierusalema i Papelonia le tinā o le tupu,+ o avā a le tupu, o ona tagata aloaʻia,+ ma alii sili o le nuu.
16 O tagata totoa uma e toʻafitu afe, o tufuga, ma ē e faia pā e toʻaafe, o tagata malolosi uma e faia taua, na ave faapagota uma i latou e le tupu o Papelonia i Papelonia.+
17 Na tofia foʻi e le tupu o Papelonia+ Matania le uso o le tamā+ o Ioakina, e fai ma tupu e sui iā te ia. Ona ia suia lea o lona igoa iā Setekaia.+
18 E lua sefulu tasi tausaga o Setekaia+ ina ua fai o ia ma tupu, ma e sefulu tasi tausaga na pule ai o ia i Ierusalema. O le igoa o lona tinā o Hamutala+ le afafine o Ieremia mai i Lipena.
19 Ua ia faia pea mea leaga i le silafaga a Ieova, e tusa ma mea uma na faia e Ioakima.+
20 Ona o le toʻasā+ o Ieova iā Ierusalema ma Iuta, na iʻu ai ina ia lafoaʻiina i latou mai i ona luma.+ Ona fouvale ai lea o Setekaia i le tupu o Papelonia.+
