2 Tupu 8:1-29
8 Ua fai atu Elisaia i le fafine o lē na ia toe faaolaina lana tama,+ e faapea: “Tulaʻi ia ma e alu, o oe ma lou aiga, ma aumau o ni tagata ese i so o se mea e mafai ona outou aumau ai o ni tagata ese;+ auā ua finagalo Ieova e tuuina mai le oge,+ e lē gata i lea, e fitu tausaga e oo mai ai le oge i le nuu.”+
2 Ona tulaʻi lea o le fafine ma faia e pei ona fai atu ai le tagata o le Atua moni, ua latou ō,+ o ia ma lona aiga,+ ma ua aumau o ni tagata ese i le nuu o Filisitia+ mo tausaga e fitu.
3 Ua oo i le faaiʻuga o tausaga e fitu, ona toe foʻi mai lea o le fafine mai i le nuu o Filisitia, ua alu atu ma tagi atu i le tupu+ i lona fale ma lona fanua.
4 O le taimi lea ua fai atu ai le tupu iā Kiasi+ le auauna a le tagata o le Atua moni, e faapea: “Seʻi e faamatala mai lava iā te aʻu mea mataʻina uma na faia e Elisaia.”+
5 A o ia faamatala atu i le tupu le tagata oti na toe faaolaina e Elisaia,+ vaai! o le fafine e ana le tama na ia toe faaolaina, o loo tagi atu i le tupu i lona fale ma lona fanua.+ Ona faapea mai lea o Kiasi: “Loʻu alii e,+ le tupu, o le fafine lenei, ma o lana tama lenei na toe faaolaina e Elisaia.”
6 Ua fesili atu le tupu i le fafine, ona ia faamatala mai lea iā te ia o le tala.+ Ona avatu lea e le tupu iā te ia o se tagata aloaʻia,+ ua faapea atu: “Ia toe faafoʻi atu iā te ia ana mea uma, ma mea uma o le fanua e amata mai i le aso na ia tuua ai le nuu, seʻia oo mai i le asō.”+
7 Ua alu atu Elisaia i Tamaseko;+ a o maʻi Peniata+ le tupu o Suria. Ua tala atu le tala iā te ia, e faapea: “O lea ua sau i inei le tagata o le Atua moni.”+
8 Ona fai atu lea o le tupu iā Asaeli:+ “Ia e alu ma ave se meaalofa+ i lou lima, ma faafetaiaʻi le tagata o le Atua moni, ia e fesili+ atu foʻi iā Ieova e ala iā te ia, e faapea, ‘Po ou te toe malosi ea mai i lenei maʻi?’”
9 Ona alu lea o Asaeli e faafetaiaʻi o ia ma ave le meaalofa i lona lima, o mea lelei uma o Tamaseko, o avega a kamela e fā sefulu, ua sau ma tū i ona luma, ua faapea mai: “Ua auina mai aʻu iā te oe e lou atalii+ o Peniata le tupu o Suria, ua faapea mai, ‘Po ou te toe malosi ea mai i lenei maʻi?’”
10 Ona fai atu lea o Elisaia iā te ia: “Inā alu ia ma fai atu iā te ia, ‘E te toe malosi lava,’ a ua faailoa mai e Ieova iā te aʻu,+ o le a oti lava o ia.”+
11 Ua pulatoʻa atu pea o ia, ma iʻu ina mā ai o ia. Ona tagi ai lea o le tagata o le Atua moni.+
12 Ona fai mai lea o Asaeli: “Aiseā ua tagi ai loʻu alii?” Ua ia fai atu: “Auā ua ou iloa lelei mea leaga+ o le a e faia i le fanauga a Isaraelu. E te susunu i le afi o latou aai malupuipuia, e te fasiotia i le pelu o latou tane ua filifilia, e te tuʻimomomo a latou fanau,+ ma e te faatiau foʻi o latou fafine totō.”+
13 Ona fai mai lea o Asaeli: “Po o le ā ea lau auauna, o lē ua na o se taʻifau+ e na te faia ai lenei mea mataʻutia?” A ua fai atu Elisaia: “Ua faaali mai e Ieova iā te aʻu, o le a fai oe ma tupu o Suria.”+
14 Ona alu ese lea o ia mai iā Elisaia, ma ua alu atu i lona alii, o lē na faapea mai iā te ia: “O le ā se tala a Elisaia iā te oe?” Ua ia faapea atu: “Na fai mai o ia, ‘E te toe malosi lava.’”+
15 Ua oo i le aso e sosoo ai, ua ia ave le ʻie ma fufui i le vai, ma ufiufi ai ona foliga,+ ona oti ai lea o ia.+ Ona pule lea o Asaeli+ e sui iā te ia.
16 O le tausaga lona lima o le nofoaiga a Ioramo+ le atalii o Aapo le tupu o Isaraelu, a o fai Iosefatu ma tupu o Iuta, na fai ai Ioramo+ le atalii o Iosefatu ma tupu o Iuta.
17 E tolu sefulu lua ona tausaga ina ua fai o ia ma tupu, ma e valu tausaga na ia pule ai i Ierusalema.+
18 Na savali o ia i le ala o tupu o Isaraelu,+ e pei ona faia e i latou i le aiga o Aapo;+ auā na fai le afafine o Aapo ma ana avā,+ ma na ia faia pea mea i le silafaga a Ieova.
19 Ae e leʻi finagalo Ieova e faaoo mai le faaumatiaga iā Iuta+ ona o Tavita lana auauna,+ e pei ona ia folafola mai iā te ia, e tuuina mai pea se lamepa+ iā te ia ma lana fanau.
20 O ona aso ia na fouvale ai Etoma+ i le pule a Iuta, ma ua faia ai foʻi se tupu+ e pule iā i latou.
21 Mulimuli ane, ua alu atu Ioramo faapea ma ana kariota uma i Seila. Ona tulaʻi lea o ia i le pō ma fasiotia tagata Etoma na siʻosiʻomia o ia, ma alii e pule i kariota; ona sosola lea o le nuu i o latou faleʻie.
22 A ua fouvale pea Etoma i le pule a Iuta e oo mai i le aso nei. O le taimi lenā na fouvale ai foʻi ma le nuu o Lipena.+
23 A o le olaga uma o Ioramo ma mea uma na ia faia, po ua lē o tusia ea i le tusi+ e faatatau i olaga o tupu o Iuta?
24 Mulimuli ane, ua taoto Ioramo faatasi ma ona augātamā,+ ma ua tanu faatasi ma ona augātamā i le Aai a Tavita.+ Ona pule lea o Aasaia+ lona atalii e sui iā te ia.
25 O le tausaga lona sefulu lua o le nofoaiga a Ioramo le atalii o Aapo le tupu o Isaraelu, na avea ai Aasaia le atalii o Ioramo le tupu o Iuta ma tupu.+
26 E lua sefulu lua tausaga o Aasaia ina ua fai o ia ma tupu, ma e tasi le tausaga na ia pule ai i Ierusalema.+ O le igoa foʻi o lona tinā, o Atalia+ le afafine o le atalii o Omeri+ le tupu o Isaraelu.
27 Ua savali o ia i ala o le aiga o Aapo,+ ma faia pea mea leaga i le silafaga a Ieova+ e pei o le aiga o Aapo, auā e tau o ia i le aiga o Aapo.+
28 Ua la ō ma Ioramo le atalii o Aapo, e siitaua iā Asaeli+ le tupu o Suria i Ramota-kiliata,+ a ua fasia+ Ioramo e ʻautau a Suria.
29 Ona toe foʻi lea o Ioramo+ le tupu i Isereelu+ e togafiti ona manuʻa, na faamanuʻa ai o ia e Suria i Rama, ina ua ia tau ma Asaeli le tupu o Suria. A o Aasaia+ le atalii o Ioramo le tupu o Iuta, ua alu ifo o ia e vaai Ioramo le atalii o Aapo i Isereelu, auā ua maʻi o ia.
