Amosa 9:1-15
9 Ua ou iloa Ieova ua afio i luga aʻe o le fata faitaulaga,+ ma ua ia fetalai mai: “Ia tā le pito i luga o le poutū, ina ia lūlū ai faavae. Ia tā ese pito i luga o poutū uma.+ A o ē o totoe o le nuu, ou te fasiotia i le pelu. E lē taulau se tasi o i latou e sola, e lē sao foʻi se isi e sola.+
2 Afai latou te eli i le Tuugamau* ina ia lalafi ai, e aumaia i latou mai i lea mea e loʻu lima;+ afai latou te ō aʻe i le lagi, ou te ave ifo i latou mai i lea mea.+
3 Afai latou te lalafi i le tumutumu o Karamelu, ou te matuā suʻesuʻe i lea mea ma maua ai i latou.+ Afai foʻi latou te lalafi mai i oʻu luma i le ilititai o le sami,+ ou te faatonuina le gata i lea mea ona ūina ai lea o i latou e ia.
4 Afai e ave faapagota i latou i luma o o latou fili, o le a ou faatonuina le pelu i lea mea ma fasioti ai i latou;+ ou te faasaga atu iā i latou ina ia malaia ai, ae e lē ina ia manuia ai.+
5 O le Alii Pule Silisili Ese o Ieova o ʻau, o Lē ua paʻi i le laueleele ma liusuavai ai;+ o le a faavauvau o ē uma e nonofo ai;+ o le a alu aʻe le laueleele atoa e pei o le Vaitafe o le Naila ma e magoto ifo e pei o le Vaitafe o le Naila o Aikupito.+
6 “‘O Lē ua fausia ana faasitepu e agaʻi i le lagi,+ ma ana fausaga i luga o le lalolagi na ia faavaeina;+ o lē foʻi o loo valaau i vai o le sami,+ ina ia liligi ifo e ia i le fogāeleele,+ o Ieova o lona suafa lea.’+
7 “‘Le fanauga a Isaraelu e, po ua lē pei ea outou o atalii o Kuso iā te aʻu?’ ua fetalai mai ai Ieova. ‘Pe na ou lē aumaia ea Isaraelu mai i le atunuu o Aikupito,+ o tagata Filisitia+ mai i Kereta, ma Suria mai i Kiri?’+
8 “‘Faauta foʻi! Ua silasila le Alii Pule Silisili Ese o Ieova i le malo agasala,+ ma e na te faaumatia lava mai i le fogāeleele.+ Peitaʻi, ou te lē matuā faaumatia le aiga o Iakopo,’+ ua fetalai mai ai Ieova.
9 ‘Auā faauta! Ou te poloaʻi atu, o le a ou lūlūina le aiga o Isaraelu i atunuu uma,+ e pei ona lūlūina e se tasi i le faamamā ina ia lē paʻū ai se maamaa i le laueleele.
10 E feoti i latou i le pelu, o tagata agasala uma o loʻu nuu,+ o ē o loo faapea ane: “E lē taitai latalata mai le mala iā i tatou pe e oo mai iā i tatou.”’+
11 “‘O lea aso, o le a ou faatūina+ ai le faleʻie+ o Tavita ua paʻū,+ ma ou toe faaleleia o mea ua lepetia. Ou te toe atiaʻe ana mea ua faatafunaina, ma ou toe fausiaina e pei o aso ua mavae,+
12 ina ia fai mo i latou mea o totoe o Etoma,+ ma nuu uma ua faaigoaina i loʻu igoa,’+ ua fetalai mai ai Ieova, o lē ua faia lenei mea.
13 “‘Faauta! O le a oo mai aso,’ ua fetalai mai ai Ieova, ‘e aulia atu ai e lē e suatiaina le fanua o lē e seleseleina fuata,+ e aulia atu foʻi e lē e soli vine o lē e lūlū fatu;+ ma e sisina ifo le uaina suamalie i mauga,+ e liusuavai foʻi aʻega.+
14 O le a ou toe aumaia o ē na ave faapagota o loʻu nuu o Isaraelu,+ o le a latou toe fausia aai na faatafunaina ma nonofo ai,+ e totō foʻi togāvine ma feinu i le uaina mai i ia mea, e fai foʻi togālaau ʻaina ma aai ai i o latou fua.’+
15 “‘O le a ou totōina i latou i lo latou laueleele, ma o le a lē toe liaʻiina i latou mai i lo latou laueleele na ou avatu iā i latou,’+ ua fetalai mai ai Ieova lou Atua.”
Faamatalaga Pito i Lalo
^ Po o “Seoli,” e mai le upu Eperu sheʼohlʹ. Tagaʻi i le Faaopoopoga e 6.
