Auega 5:1-22
5 Ieova e, ia e manatua le mea ua tupu iā i matou.+ Ia e silasila mai ma silafia ai lo matou faalumaina.+
2 Ua avatu lo matou tofi i tagata ese, ma o matou fale i tagata mai i isi atunuu.+
3 Ua avea i matou ma ē ua mātuaoti, ua leai se tamā.+ Ua pei foʻi o matou tinā o fafine ua oti a latou tane.+
4 Ua matou feinu i a matou lava vai ua faatauina mai i tupe.+ Ua faatau mai foʻi a matou fafie.
5 Ua tuliloa mai i matou e fili, ua toetoe lava papaʻi mai i o matou ua.+ Ua vaivai lava i matou. Ua lē maua foʻi sa matou mālōlōga.+
6 Ua matou faalagolago+ atu iā Aikupito;+ ma Asuria,+ ina ia faamalieina ai i meaʻai.
7 Ua agasala o matou augātamā.+ Ua leai i latou. A ua matou tauaveina a latou mea sesē.+
8 Ua pule auauna iā i matou.+ Ua leai foʻi se tasi e aveesea i matou mai i o latou lima.+
9 Ua lamatia o matou ola i le aumaia o a matou meaʻai,+ ona o le pelu a le toafa.
10 Ua mū o matou paʻu e pei o se ogaumu, ona o le matuā fia aai.+
11 Ua latou faamāsiasi avā i Siona,+ faapea foʻi taupou i aai o Iuta.
12 Na latou sisi i perenise i o latou lima.+ E leʻi āva foʻi i toeaina.+
13 E oo lava i tauleleʻa na latou sii i luga le mea e olo ai saito,+ ma na tau paʻuʻū foʻi tamaiti i avegāfafie.+
14 Ua lē toe iai ni toeaina e nonofo i le faitotoʻa,+ ma ni tauleleʻa e tāina a latou pese.+
15 Ua mavae atu le fiafia o o matou loto. Ua liua foʻi a matou siva i le faavauvau.+
16 Ua paʻū le pale o lo matou ulu.+ Oi talofa iā i matou, auā ua agasala i matou!+
17 O le mea lea ua mamaʻi ai o matou loto.+ Ua nenefu ai foʻi o matou mata ona o nei mea,+
18 Ona ua tuufua le mauga o Siona;+ ua feoaʻi ai alope i luga.+
19 A o oe Ieova e, e te afio i lou nofoālii e faavavau.+ O lou nofoālii foʻi e mai i lea tupulaga i lea tupulaga.+
20 Aiseā ea ua e faagaloina ai i matou e faavavau,+ ma tuua ai i matou i aso e tele?+
21 Ieova e, ia e toe faafoʻi atu i matou iā te oe,+ ona matou foʻi atu lea ma le lotoatoa. Ia e foaʻi mai ni aso fou mo i matou, e pei o aso anamua.+
22 Ae peitaʻi, ua e matuā teena lava i matou.+ Ua e matuā toʻatamaʻi lava iā i matou.+
