Eperu 12:1-29
12 O lea la, ona ua iā i tatou se vaega e toʻatele o molimau*+ o loo siʻomia ai i tatou, seʻi o tatou tuu ese ai foʻi mea mamafa+ uma ma le agasala o loo faigofie ona faalavelave mai iā i tatou,+ a ia tatou taufetuli ma le onosaʻi+ i le tuuga+ o loo i o tatou+ luma,
2 a o tatou vaavaai totoʻa atu iā Iesu o le Sui Sili,+ ma o Lē e faaatoatoaina lo tatou faatuatua.+ Ona o le olioli sa i ona luma, na tumau+ ai o ia e ui ina faapuapuagatia* i le laau, na lē amanaʻia e ia le mā, ma nofo o ia i le itu taumatau o le nofoālii o le Atua.+
3 Ia manatunatu lelei i lē na tumau e ui i upu faifai+ a tagata agasala ia na taʻusalaina ai i latou, ina neʻi outou lē lavavā ma faavaivai ai.+
4 I le faia pea o la outou taua faasaga i lenā agasala, tou te leʻi tetee atu ai e oo lava i le faamaligiina o outou toto,+
5 ae ua matuā galo iā te outou le apoapoaʻiga lea na taʻua ai outou o atalii:+ “Loʻu atalii e, aua le manatu māmā i le aʻoaʻiga mai iā Ieova, aua foʻi neʻi faavaivai pe a aʻoaʻia oe e ia;+
6 auā e aʻoaʻia e Ieova o lē e alofa i ai; o le mea moni, e na te faasalaina* foʻi atalii uma ua ia taliaina.”+
7 Ua outou tumau ona o le aʻoaʻiga.+ O loo feagai le Atua ma outou e pei o ni atalii.+ Auā o ai se atalii e lē aʻoaʻia e se tamā?+
8 Ae afai e lē aʻoaʻia outou e pei ona aʻoaʻia o tagata uma lava, o fanau la o le pō outou,+ ae e lē o ni atalii.
9 E masani foʻi ona iai o tatou tamā faaletino sa aʻoaʻia i tatou,+ ma na tatou ave i ai le faaaloalo. Pe e lē sili ea ona tatou gauaʻi atu i le Tamā na fanauina i tatou i le agaga ma ola ai?+
10 Auā sa masani ona latou aʻoaʻia i tatou e mo ni nai aso, e tusa ma mea e foliga mai e lelei iā i latou,+ ae ua ia faia faapea mo lo tatou lava lelei ina ia tatou tofusia faatasi ai i lona paia.+
11 E moni, e foliga mai o aʻoaʻiga e lē o se mea e olioli ai i le taimi lenā,* ae o se mea e faanoanoa ai;+ peitaʻi, mulimuli ane e fua mai ai e i latou ua aʻoaʻoina fua o le filemu,+ o le amiotonu lea.+
12 O lea la, ia faasaʻo lima ua gagase+ ma tulivae ua vaivai,+
13 ma ia faasaʻo ala mo o outou vae,+ ina ia lē see sooga o le vae ua pipili, ae ia toe lelei.+
14 Ia outou tausisi i le filemu ma tagata uma,+ ma pe a lē faapaiaina+ se tagata, e lē vaai o ia i le Alii,+
15 ma ia vaai lelei ina neʻi teʻa ese se tasi mai i le agalelei faifua o le Atua;+ ina neʻi iai se aa oona+ e tupu aʻe, ma faatupu ai faafitauli, ma faaleagaina ai le toʻatele;+
16 ina ia leai sē e faitaaga po o se tasi na te lē talisapaia mea paia, e pei o Esau+ o lē na lafoaʻia lona tofi o le ulumatua ina ia maua ai se ʻaiga e tasi.+
17 Auā ua outou iloa na teena o ia+ ina ua manaʻo mulimuli ane e maua le faamanuiaga,+ ma e ui lava ina matuā ʻaiʻoi atu ma loimata,+ a ua lē maua e ia se mea e suia ai le mafaufau o lona tamā.+
18 Auā e tou te leʻi faalatalata atu i le mauga e mafai ona paʻi atu i ai,+ lea na iai le afi mumū,+ ma le ao uliuli, ma le matuā pogisa, ma le matagi malosi,+
19 ma le taalili o le pū,+ ma le siʻufofoga na tautala mai; ina ua faalogo i lenei siʻufofoga,+ ona talosaga atu lea o tagata e aua neʻi toe faaopoopo maia nisi upu.+
20 Auā na fefefe i latou i le poloaʻiga e faapea: “Afai e paʻi se manu i le mauga, ia fetogia i maa.”+
21 E mataʻutia foʻi le vaaiga lea na faapea mai ai Mose: “Ua ou mataʻu ma gatete.”+
22 A ua outou faalatalata atu i le Mauga o Siona+ ma le aai+ o le Atua soifua, o Ierusalema+ faalelagi lea, ma le matuā toʻatele o agelu+
23 o loo potopoto faatasi,+ ma le faapotopotoga o ulumatua+ o ē ua tusia i le lagi,+ ma le Atua o le Faamasino i mea uma,+ ma ē e amiotonu na fanauina i le agaga,+ ua lelei atoatoa i latou,+
24 ma Iesu le puluvaga+ o le feagaiga fou,+ ma le toto na sausauina ai,+ lea o loo tautala mai i se auala e sili atu ona lelei i le toto+ o Apelu.
25 Ia outou faaeteete neʻi o outou lē usiusitaʻi iā te ia o loo fetalai mai.+ Auā afai na lē sao o ē na lē usiusitaʻi iā te ia o lē na faaooina atu le lapataʻiga mai i le Atua i le lalolagi,+ e matuā lē sao lava i tatou pe a liliuese mai iā te ia o loo fetalai mai i le lagi.+
26 Ona lūlūina lea o le lalolagi+ i le taimi lenā i lona siʻufofoga, a o lenei ua ia folafola mai e faapea: “E toe tasi ona ou lūlūina lea o le lalolagi atoa ma le lagi.”+
27 O le faaupuga lenei, “E toe tasi” ua faaalia ai le aveesea o mea ua lūlūina o mea ia na faia e se tasi,+ ina ia tumau ai mea e leʻi lūlūina.+
28 O lea la, i le iloa o le a tatou maua se malo e lē mafai ona lūlūina,+ seʻi faaauau ona tatou maua le agalelei faifua, lea e mafai ai ona tatou tuuina atu le auaunaga paia e talileleia e le Atua ma le migao ma le mataʻu iā te ia.+
29 Auā o lo tatou Atua o le afi lea e faaumatia ai.+
Faamatalaga Pito i Lalo
^ I le gagana Eleni, “o molimau e matuā toʻatele e pei o se ao tele.”
^ Tagaʻi i le Faaopoopoga e 10.
^ I le gagana Eleni, o le “sasa faamoʻamoʻa.”
^ I le gagana Eleni, “e lē o se mea e olioli ai a o iai.”
