Eperu 9:1-28
9 O lenei, i le feagaiga muamua sa masani ona faia ai sauniga o le auaunaga paia,+ ma sa iai foʻi lona mea paia+ i le lalolagi.
2 Sa fausia le potu muamua o le faleʻie+ lea sa iai le tuugāmolī+ ma le laulau,+ sa laulauina ai falaoa;+ ma ua taʻua lea mea o “le Mea Paia.”+
3 Ae o tala atu o le ʻie puipui lona lua,+ sa iai le potu o le faleʻie e taʻua o “le Mea e Sili Ona Paia.”+
4 O lenei potu sa iai le ipu auro,+ ma le atolaau o le feagaiga+ na ufitia atoa i le auro,+ sa iai foʻi i totonu le fagu auro sa iai le manai+ ma le tootoo o Arona lea na fua,+ ma papamaa+ o le feagaiga;
5 sa i ona luga kerupi+ mamalu sa faamalumalu i le ufiufi o le atolaau.*+ Peitaʻi, e lē o le taimi lenei e faamatala auʻiliʻili ai nei mea.
6 Ina ua uma ona fausia faapena o nei mea, ona ulu atu lea o ositaulaga i le potu+ muamua o le faleʻie i taimi uma lava ina ia faia le auaunaga paia;+
7 a o le potu lona lua, e na o le ositaulaga sili e faatasi i le tausaga+ ona ulu atu i ai, ma le toto+ lea na te ofo atu ai le taulaga mo ia+ lava, atoa ma agasala e fai ma le lē iloa e le nuu.+
8 A ua faamanino mai e le agaga paia, e leʻi faailoaina mai le ala+ e ulu atu ai i le mea paia a o tū+ ai pea le faleʻie muamua.
9 O lenei faleʻie o le faatusa+ lea mo taimi atofaina ua oo mai,+ ma o loo ofoina+ atu ai meaalofa ma taulaga seʻia oo mai i le taimi nei. Ae peitaʻi, e lē mafai e nei mea ona faaatoatoaina+ le lotofuatiaifo+ o le tagata o loo faia le auaunaga paia,
10 ae e faasino atu nei mea i na o meaʻai,+ ma vaiinu,+ ma le faatofuina o mea eseese i le vai.*+ O mea na sa manaʻomia e le tulafono i le itu faaletino,+ ma na faatulaga mai seʻia oo i le taimi atofaina e faasaʻo ai mea.+
11 Ae ina ua afio mai Keriso o se ositaulaga sili+ o mea lelei ua faataunuuina, e ala i le faleʻie e sili ma atoatoa ona lelei e leʻi faia e lima, o lona uiga, e lē o se foafoaga faalelalolagi,+
12 e leʻi ulu atu o ia i le mea paia ma toto+ o ʻoti ma tamaʻi povi poʻa, ae o lona lava toto,+ e faatasi lava ona faia, ma mauaina ai e ia le faaolataga e faavavau mo i tatou.+
13 Auā afai na mafai i le toto o ʻoti,+ ma povi poʻa,+ ma le sausauina o lefulefu+ o le povi fafine, ona faapaiaina ai e oo lava i le faamamāina o tino+ o i latou ua faaleagaina,+
14 pe e lē sili ea ona faamamāina+ o tatou lotofuatiaifo mai i galuega iʻuvale+ i le toto+ o Keriso, o lē na ofo atu o ia lava+ ma le lē taʻuleagaina i le Atua, e ala i le agaga e faavavau ina ia tatou tuuina atu le auaunaga paia+ i le Atua soifua?
15 O le mea lea ua avea ai o ia ma puluvaga+ o le feagaiga fou, ina ia maua ai e i latou ua valaauina le folafolaga o le tofi+ e faavavau, auā na maliu o ia ina ia faasaʻolotoina ai e le togiola+ i latou mai i mea sesē na faia a o nonofo i le feagaiga muamua.+
16 Talu ai o loo iai se feagaiga+ ma le Atua, e tatau la ona oti le tagata o loo faataunuuina lenei feagaiga.*
17 E faamaonia se feagaiga pe a oti se tagata,* talu ai e lē aogā pe afai o loo ola pea le tagata na faataunuuina le feagaiga.
18 O lea la, e leʻi amataina le feagaiga+ muamua e aunoa ma le toto.+
19 Ina ua taʻu atu e Mose i le nuu+ atoa poloaʻiga uma o le Tulafono, ona tago lea o ia i le toto o tamaʻi povi poʻa, ma ʻoti, atoa ma le vai, ma fulufulu mamoe mūmū sesega, ma lau laau o le isopo,+ ua ia sausau atu ai i le tusi ma le nuu atoa,
20 ma faapea atu: “O le toto lenei o le feagaiga lea na tuuina mai e le Atua iā te outou+ ina ia tausia.”
21 Ua faapea foʻi ona ia sausauina i le toto+ le faleʻie,+ ma ipu uma lava na faaaogā i le auaunaga.*
22 Ioe, e toetoe o mea uma lava e faamamāina e le toto+ e tusa ai ma le Tulafono, ma e lē mafai ona faamagaloina agasala+ seʻi vaganā ua faamaligiina+ le toto.
23 O lea la, o le auala lenei+ sa tatau ona faamamāina ai faatusa+ o mea o i le lagi, a o mea faalelagi e faamamāina i taulaga e sili atu nai lo o ia taulaga.
24 Auā e leʻi ulu atu Keriso i le mea paia na faia e lima,+ o le ata lea o le mea moni,+ a o le lagi lava+ ina ia tulaʻi ai nei o ia i luma o le Atua mo i tatou.+
25 E lē ina ia ofoina atu soo o ia lava, e pei ona ulu atu o le ositaulaga sili i le mea paia,+ i lea tausaga ma lea tausaga+ ma le toto ese.
26 Ana lē o lea, semanū e puapuagatia soo o ia talu mai le faavaeina+ o le lalolagi. Ae peitaʻi, ua faatasi+ ona ia faaalia mai o ia+ i le taufaaiʻuiʻuga o faiga o mea a le lalolagi,+ ina ia aveesea agasala e ala i le faataulagaina o ia lava.+
27 E pei ona faatasi ona oti o tagata,+ ma e mulimuli ane ona faamasinoina+ lea,
28 e faapena foʻi ona faatasi+ ona foaʻi atu e Keriso lona ola, ina ia tauaveina agasala a tagata e toʻatele;+ ma o le taimi lona lua+ e faailoa+ mai ai o ia, e lē ona o agasala,+ ae ina ia iloa ai o ia e i latou o loo matuā saʻili iā te ia mo le faaolataga.+
Faamatalaga Pito i Lalo
^ O le upu Eleni lea ua faaliliuina i le “ufiufi,” e mafai foʻi ona faasino atu i le taulaga o le togisala ina ia maua ai le finagalo malie o le Atua.
^ O lona uiga, o le faatāʻeleina o tagata ma le fufuluina o mea e tusa ai ma le Tulafono a Mose.
^ Po o le “taulaga e fai ma puluvaga.”
^ E mafai foʻi ona faasino atu i “manu mamate.”
^ Po o le, “auaunaga i le lautele.”
