Esekielu 1:1-28
1 O le tolu sefulu o tausaga, i le masina lona fā, i le aso lona lima o le masina, a o oʻu iai faatasi ma tagata na ave faapagota+ i tala ane o le vaitafe o Kepara,+ ua avanoa ai le lagi+ ona ou vaaia lea o faaaliga mai i le Atua.+
2 O le aso lona lima o le masina, o le tausaga lona lima lea talu ona ave faapagota le Tupu o Ioakina,+
3 na oo mai ai le afioga+ a Ieova iā Esekielu+ le atalii o Posai le ositaulaga i le nuu o tagata Kaletaia+ i tala ane o le vaitafe o Kepara, ua i ona luga le aao o Ieova i lea mea.+
4 Ua ou vaai atu, faauta foʻi, o loo sau se matagi malosi mai i le itu i mātū,+ o le ao tele+ ma le afi mumū+ ua siʻomia i le malamalama, ma ua emoemo mai ai se mea e pei ua fefiloi ai le auro ma le siliva mai i totonu o le afi.+
5 E mai i totonu o le afi, ua iai i latou e pei o ni foafoaga agaga+ se toʻafā, ma o o latou foliga mai: ua pei o foliga o le tagata.
6 Ua taʻitasi i latou ma ona mata e fā,+ e taʻitasi foʻi i latou ma ona apaʻau e fā.+
7 O o latou vae, o vae sasaʻo ia, ma o latou alofivae, ua pei o alofivae o se tamaʻi povi;+ ma ua iila o latou vae e pei o le pupula o ʻapamemea ua faaiilaina.+
8 I lalo ifo o o latou apaʻau e fā ua iai le lima o le tagata,+ ma ua taʻitasi i latou e toʻafā ma ona mata ma apaʻau.+
9 O o latou apaʻau e fesootaʻi le tasi i le isi. E lē liliu i latou pe a ō atu; e taʻitasi i latou ma alu saʻo i luma.+
10 O foliga o o latou mata, ua iā i latou e toʻafā mata o le tagata,+ o mata o le leona+ i le itu taumatau,+ ua iā i latou e toʻafā mata o le povi poʻa+ i le itu tauagavale;+ ma o le toʻafā o i latou ua iai foʻi mata o le aeto.+
11 O o latou mata na. Ua faaloloa i luga o latou apaʻau.+ Ua taʻitasi ma fesootaʻi apaʻau e lua, a o isi apaʻau e lua, ua ufitia ai o latou tino.+
12 Ua taʻitasi i latou ma alu saʻo atu i ona luma.+ Po o fea lava le itu e uunaʻia ai i latou e le agaga e ō atu i ai, e latou te ō atu lava i ai.+ E lē liliu i latou a o ō atu.+
13 E tusa ai ma le foliga mai o foafoaga agaga, e pei i latou o malala ola o le afi o loo mumū.+ E iai se mea e foliga mai o ni sulu+ ua fefoʻifoʻiaʻi i le va o foafoaga agaga, ua malamalama tele le afi ma ua emo mai le uila mai i le afi.+
14 Ua fefoʻifoʻiaʻi foafoaga agaga e pei o le emo o le uila.+
15 A o oʻu vaavaai pea i foafoaga agaga, faauta! ua iai le uili e tasi i le lalolagi i autafa o foafoaga agaga+ e iai mata e fā.+
16 E tusa ai ma foliga o uili+ ma le fausaga o ia mea, ua pei o le pupula o le tasesa;+ ma e tutusa uma foliga o ia uili e fā. E tusa ai ma foliga o uili ma fausaga o ia mea, e pei ua faalava le isi uili i totonu o le isi uili.+
17 Pe a taavavale uili, e mafai ona taavavale atu i itu uma e fā.+ E lē liliu i se isi itu pe a taavavale atu.+
18 E tusa ai ma le pito i fafo o uili,* e maualuluga ma e faapogaia ai le mataʻu; ua tumu foʻi le pito i fafo o uili i mata, ua liʻo uma ai i uili e fā.+
19 Pe a ō atu foafoaga agaga, e taavavale atu uili i o latou autafa ma pe a siitia aʻe foafoaga agaga mai i le laueleele, e siitia aʻe foʻi uili.+
20 Po o fea lava le itu e uunaʻia ai e le agaga e ō atu i ai, e ō atu lava i ai uili i le mea ua uunaʻia e le agaga e ō i ai; ma e siitia aʻe foʻi uili i o latou tafatafa, auā o le agaga o loo uunaʻia ai foafoaga agaga, ua iai foʻi i uili.
21 A ō foafoaga agaga, e taavavale foʻi uili; a tutū foafoaga agaga, e tutū foʻi uili; ae a siitia aʻe i latou mai i le laueleele, e siitia aʻe foʻi uili i o latou tafatafa, auā o le agaga o loo uunaʻia ai foafoaga agaga, ua iai foʻi i uili.+
22 I luga aʻe o ulu o foafoaga agaga, ua iai se mea e pei o se tulaga mafolafola+ e feʻilafi e pei o se ʻaisa matagofie ma mataʻina, ua folasia i luga aʻe o o latou ulu.+
23 I lalo o le tulaga mafolafola, ua faaloloa ai o latou apaʻau e fesootaʻi le tasi i le isi. E tofu i latou ma apaʻau e lua e ufiufi ai lea itu, ma e tofu foʻi i latou ma apaʻau e lua e ufiufi ai le la itu o o latou tino.
24 Ua ou faalogo i le taalili o o latou apaʻau pe a latou ō atu, ua pei o le taalili o vai e tele,+ e pei o le taalili o Lē e ona le malosi uma lava, e pei o le pisapisaō o le toʻatele,+ e pei foʻi o le taalili o se itu taua.+ Pe a tutū i latou, ona tuu lea i lalo o latou apaʻau.
25 Ua iai le siʻufofoga i le tulaga mafolafola o loo i luga aʻe o o latou ulu. (Pe a tutū i latou, ona tuu lea i lalo o latou apaʻau.)
26 I luga aʻe foʻi o le tulaga mafolafola lea o loo i luga o o latou ulu, ua iai se mea e foliga mai e pei o le maa safaira,+ e pei o se nofoālii.+ I luga aʻe foʻi o lea mea ua afio ai lē e foliga e pei o se tagata,+ i le mea e pei o se nofoālii.
27 Ua ou vaai ai i se mea e pei o le pupula+ o le auro ua fefiloi ma le siliva, e pei o le afi ua faataamilo ai i totonu,+ mai i le mea e foliga mai o ona puimanava e agaʻi i luga; ma mai i le mea e foliga mai o ona puimanava e agaʻi i lalo, ua ou vaaia ai se mea e pei o se afi, ma ua iai le pupula ua siʻomia ai o ia.
28 Ua iai le mea e pei o se nuanua+ lea e tupu i le ao tele i le aso e totō ai timuga. O foliga na o le matuā pupula ua siʻomia ai. E foliga mai e pei o le mamalu o Ieova.+ Ina ua ou vaai i ai, ona ou faapaʻū faō lea,+ ma ua ou faalogoina le siʻufofoga o se tasi o loo fetalai mai.
Faamatalaga Pito i Lalo
^ O le upu Peretania o le rim.
