Esekielu 10:1-22
10 Ua ou vaai pea, faauta foʻi! i luga o le tulaga mafolafola+ o loo i luga aʻe o ulu o kerupi, ua iai se mea e foliga mai e pei o se maa safaira,+ e foliga mai e pei o se nofoālii+ ua tū mai i luga aʻe o i latou.
2 Ua ia fetalai atu i le tagata ua ofu i le ʻie lino+ e faapea: “Inā ulu atu ia i le va o uili taavavale,+ i lalo ifo o kerupi, ia faatumu faaofuofu o ou lima i malala ola+ mai i le afi o loo i le va o kerupi, ma faasalalau solo ai i luga o le aai.”+ Ona ia ulu atu lea a o oʻu vaai i ai.
3 Ua tutū kerupi i le itu taumatau o le fale a o ulu atu le tamāloa a ua faatumulia le lotoā pito i totonu i le ao.+
4 Ona alu aʻe lea o le mamalu o Ieova+ mai i luga o kerupi ua oo atu i le faitotoʻa o le fale, ma ua faasolosolo ona tumu le fale i le ao,+ ua faatumulia foʻi le lotoā i le pupula o le mamalu o Ieova.
5 Ua lagona foʻi le taalili o apaʻau o kerupi+ i le lotoā pito i fafo, e pei o le siʻufofoga o le Atua o Lē e ona le malosi uma lava pe a fetalai mai o ia.+
6 Ina ua uma ona ia faatonuina le tagata o loo ofu i le ʻie lino, e faapea: “Ia ave se afi mai i le va o uili taavavale, mai i le va o kerupi,” ona ia ulu atu lea ma tū i autafa o le uili.
7 Ona tago atu lea o le lima o le kerupi mai i le va o kerupi i le afi+ o loo i le va o kerupi,+ ua ave malala ola ma tuu i faaofuofu o lima o lē o loo ofu i ʻie lino,+ ona ave loa lea e ia ma alu.
8 Ua iloa foʻi i kerupi o se mea ua foliga mai e pei o le lima o se tagata i lalo ifo o o latou apaʻau.+
9 Ua ou vaai pea, faauta foʻi! ua iai uili e fā i autafa o kerupi, e tasi le uili i autafa o le kerupi e tasi, ma le uili e tasi i autafa o le isi kerupi,+ ma o foliga o uili ua pei o le pupula o le maa tasesa.
10 A o foliga o ia uili, e tutusa uma foliga o uili e fā, e pei ua faalava le isi uili i totonu o le isi uili.+
11 A taavavale nei uili, e taavavale i itulagi e fā. E lē suia le itulagi e taavavale i ai, auā o le itulagi e faasaga i ai le ulu e taavavale atu lava i ai. E lē suia le itulagi e taavavale i ai.+
12 O o latou tino uma ma o latou papatua, o latou lima ma o latou apaʻau atoa ma uili, ua soo i mata.+ Ua tofu i latou e toʻafā ma le uili.
13 Ae e tusa ai ma uili, ua valaau atu i ai a o oʻu faalogo i ai, “Uili taavavale e!”
14 Ua taʻitasi i latou ma ona mata e fā.+ O le mata muamua o mata o le kerupi, o le mata lona lua o mata o le tagata,+ o le mata lona tolu o mata o le leona, ma le mata lona fā o mata o le aeto.+
15 Ua ō aʻe foʻi kerupi i luga,+ o foafoaga agaga ia na ou vaaia i le vaitafe o Kepara,+
16 a ō atu kerupi, e taavavale atu ai foʻi uili i o latou autafa;+ a sii i luga e kerupi o latou apaʻau ina ia maualuga aʻe i le lalolagi, ae e lē suia foʻi e uili le itulagi e taavavale ai mai i o latou autafa.+
17 Pe a tutū i latou, e lē taavavale uili; pe a ō aʻe i latou,+ e ō aʻe foʻi ma uili, auā o le agaga o loo uunaʻia ai foafoaga agaga, ua iai foʻi i uili.+
18 Ona alu atu lea o le mamalu+ o Ieova mai i luga o le faitotoʻa o le fale ma tū i luga aʻe o kerupi.+
19 Ona sii aʻe lea e kerupi o o latou apaʻau ma ō aʻe mai i le lalolagi,+ a o oʻu vaai atu i ai. Ina ua latou ō atu, ua lalata atu foʻi uili i o latou autafa; ua latou tutū i le faitotoʻa o le pā i le itu i sasaʻe o le fale o Ieova, ma ua i luga aʻe o i latou le mamalu o le Atua o Isaraelu lea e mai i lugā.
20 O foafoaga agaga+ ia na ou vaaia i lalo o le nofoālii o le Atua o Isaraelu i le vaitafe o Kepara,+ ona ou iloa ai lea o i latou o kerupi.
21 A o le toʻafā, ua taʻitasi i latou ma ona mata e fā,+ e taʻitasi foʻi i latou ma ona apaʻau e fā, ua i lalo ifo o o latou apaʻau mea e pei o lima o le tagata.
22 E tusa ma foliga o o latou mata, o o latou foliga e tutusa lelei lava ma foliga na ou vaaia i autafa o le vaitafe o Kepara.+ E taʻitasi i latou ma alu saʻo i luma.+
