Esekielu 14:1-23
14 Ua ō mai iā te aʻu nisi o toeaina o Isaraelu ma nonofo i oʻu luma.+
2 Ona oo mai lea o le afioga a Ieova iā te aʻu e faapea:
3 “Le atalii e o le tagata, ua pupū tele loto o ia tamāloloa, i a latou tupua inosia, ua latou tuu i luma o o latou mata le mea e tautevateva ai o le mea foʻi ua sesē ai i latou.+ Aiseā o le a latou fesiligia ai fua aʻu?+
4 O le mea lea, ia e talanoa atu iā i latou ma faapea atu i ai, ‘O le fetalaiga lenei a le Alii Pule Silisili Ese o Ieova: “O so o se tasi mai i le aiga o Isaraelu ua pupū tele lona loto i ana tupua inosia,+ ma tuu i luma o ona mata le mea e tautevateva ai o le mea foʻi ua sesē ai o ia, ma alu atu i le perofeta, o aʻu, o aʻu lava o Ieova, ou te tali atu iā te ia i lenei mataupu, e tusa ma le tele o ana tupua inosia,+
5 ina ia tupu ai le fefe i loto o le aiga o Isaraelu,+ auā ua ō ese i latou mai iā te aʻu, o i latou uma, ona o a latou tupua inosia.”’+
6 “O lea ia fai atu i le aiga o Isaraelu, ‘O le fetalaiga lenei a le Alii Pule Silisili Ese o Ieova: “Inā foʻi mai ia, inā liliuese ia mai i a outou tupua inosia,+ ma liliuese o outou mata mai i a outou mea inosia uma;+
7 auā o so o se tasi mai i le aiga o Isaraelu pe mai i ē e aumau o ni tagata ese i Isaraelu, e alu ese ae e lē mulimuli mai iā te aʻu,+ ma pupū lona loto i ana tupua inosia, ma tuu i luma o ona mata le mea e tautevateva ai o le mea foʻi ua sesē ai o ia, ma alu atu i le perofeta e fesili atu ai iā te aʻu,+ o aʻu, o aʻu lava o Ieova, ou te tali atu iā te ia.
8 E faasaga ese oʻu mata e tetee atu i lea tagata,+ ou te fai o ia ma faailoga+ ma faaupuga masani,+ ou te faaumatia o ia mai i loʻu nuu;+ ma o le a outou iloa ai o aʻu lava o Ieova.”’+
9 “‘A o le perofeta, afai e faasesēina o ia ma tautala ai i se upu, o aʻu lava o Ieova na faasesēina lenā perofeta;+ ou te faaloaloa atu loʻu lima faasaga iā te ia, ma faaumatia o ia mai i loʻu nuu o Isaraelu.+
10 E latou te selesele i āuga o a latou mea sesē.+ O le mea sesē a lē na fesili mai, ua tutusa ma le mea sesē a le perofeta,+
11 ina ia lē toe ō ese ai i latou o le aiga o Isaraelu mai i le mulimuli mai iā te aʻu,+ ma lē toe leaga ai i latou lava i a latou solitulafono. E ao ona avea i latou ma oʻu nuu ma fai aʻu ma o latou Atua,’ ua fetalai mai ai le Alii Pule Silisili Ese o Ieova.”+
12 Ua toe oo mai foʻi le afioga a Ieova iā te aʻu e faapea:
13 “Le atalii e o le tagata, afai e agasala mai se atunuu iā te aʻu i le lē faamaoni,+ ona ou faaloaloa atu lea o loʻu lima faasaga i ai ma gausia tootoo e tautau ai ana falaoa lapotopoto,+ ou te auina atu foʻi i ai le oge+ ma faaumatia tagata atoa ma manu lalata.”+
14 “‘Pe ana iai nei tamāloloa e toʻatolu, o Noa,+ o Tanielu+ ma Iopu,+ semanū e laveaʻiina na o o latou lava ola i la latou amiotonu,’+ ua fetalai mai ai le Alii Pule Silisili Ese o Ieova.”+
15 “‘Pe afai ou te faaui ane manufeʻai i le laueleele,+ ma faaumatia ai a latou fanau+ e ia manu ma faanoanoa ai, ma faagaogaoina ai le laueleele, e leai foʻi se isi e toe ui ane ai ona o manufeʻai,+
16 ana iai ia tamāloloa e toʻatolu, o loo ola aʻu,’ ua fetalai mai ai le Alii Pule Silisili Ese o Ieova, ‘e lē laveaʻiina e i latou o atalii po o afafine; e na o i latou lava e laveaʻiina, ma e faagaogaoina le laueleele.’”+
17 “‘Afai foʻi ou te faaoo atu le pelu i le atunuu,+ ma ou fai atu: “Ia ui atu le pelu i le atunuu,” ma afai ou te faaumatia tagata atoa ma manu lalata,+
18 ana iai ia tamāloloa e toʻatolu,+ o loo ola aʻu,’ ua fetalai mai ai le Alii Pule Silisili Ese o Ieova, ‘e lē laveaʻiina e i latou o atalii po o afafine; e na o i latou lava e laveaʻiina.’”+
19 “‘Afai ou te faaoo atu le faamaʻi i lea atunuu,+ ma ou sasaa ifo ai loʻu ita tele i le faamasaatoto,+ ina ia faaumatia ai tagata atoa ma manu lalata,
20 ana iai Noa,+ Tanielu+ ma Iopu,+ o loo ola aʻu,’+ ua fetalai mai ai le Alii Pule Silisili Ese o Ieova, ‘e lē laveaʻiina e i latou o se atalii po o se afafine; e laveaʻiina na o o latou lava ola i la latou amiotonu.’”+
21 “O lea, o le fetalaiga lenei a le Alii Pule Silisili Ese o Ieova, ‘E faapena foʻi pe a ou tuuina atu aʻu faasalaga mataʻutia+ e fā, o le pelu, o le oge, o manufeʻai ma faamaʻi+ ou te faaoo atu iā Ierusalema, ina ia faaumatia ai tagata atoa ma manu lalata.+
22 Faauta foʻi! o le a totoe i le atunuu se vaega ua faasaoina, o ē o le a taʻitaʻiina ese.+ O atalii ia ma afafine! O le a latou ō atu iā te outou, ma o le a outou iloa o latou ala ma a latou mea e fai.+ E faamāfanafanaina foʻi outou ona o le mala ou te faaoo atu i Ierusalema, o mea uma lava ou te faaoo atu iā te ia.’”
23 “‘O le a latou faamāfanafana iā te outou pe a outou vāai i o latou ala ma a latou mea e fai; e tou te iloa ai foʻi ou te leʻi faia fua ia mea na ou faia faasaga i le aai,’ ua fetalai mai ai le Alii Pule Silisili Ese o Ieova.”+
