Esekielu 20:1-49
20 O le tausaga lona fitu, i le masina lona lima, i le aso sefulu o le masina, ua ō mai ai nisi o toeaina o Isaraelu ina ia fesili atu iā Ieova,+ ona latou nonofo ai lea i oʻu luma.+
2 Ona oo mai lea o le afioga a Ieova iā te aʻu e faapea:
3 “Le atalii e o le tagata, ia e talanoa atu i toeaina o Isaraelu ma faapea atu iā i latou, ‘O le fetalaiga lenei a le Alii Pule Silisili Ese o Ieova: “Pe e tou te ō mai ea ina ia fesili mai iā te aʻu?+ ‘O loo ola aʻu, e tou te lē fesili mai lava iā te aʻu,’+ ua fetalai mai ai le Alii Pule Silisili Ese o Ieova.”’
4 “Pe e te faamasinoina ea i latou? Le atalii e o le tagata, po o le a e faamasinoina i latou?+ Ia faailoa atu iā i latou mea inosia na faia e o latou augātamā.+
5 Ia e fai atu iā i latou, ‘O le fetalaiga lenei a le Alii Pule Silisili Ese o Ieova: “I le aso na ou filifilia ai Isaraelu,+ na sii ai i luga loʻu lima+ i se tautoga i le fanau a Iakopo+ ma faailoaina atu aʻu lava iā i latou i Aikupito.+ E moni, na sii i luga loʻu lima i se tautoga iā i latou ma faapea atu, ‘O aʻu o Ieova lo outou Atua.’+
6 I lenā aso na sii ai i luga loʻu lima+ i se tautoga iā i latou, ina ia aumaia i latou mai i le atunuu o Aikupito ma avatu i se laueleele na ou saʻilia mo i latou, lea e tafe ai le suāsusu ma le meli.+ Ua sili ona matagofie i lo o atunuu uma.+
7 Na ou toe fai atu iā i latou, ‘Ia taʻitasi outou ma lafoaʻi mea inosia i ona luma,+ aua neʻi faaleagaina outou i tupua inosia a Aikupito.+ O aʻu o Ieova lo outou Atua.’+
8 “ʻ“Ona latou fouvale mai lea iā te aʻu,+ ma latou te leʻi fia faalogo mai iā te aʻu. Na lē taʻitasi i latou ma lafoaʻia mea inosia i ona luma, latou te leʻi tuua foʻi tupua inosia a Aikupito,+ o lea na ou folafola atu ai ou te liligi ifo loʻu ita tele iā i latou, ina ia faataunuu ai loʻu ita iā i latou i Aikupito.+
9 Peitaʻi, ou te leʻi faia ona o loʻu igoa neʻi faaleagaina i luma o nuu na latou iai,+ auā na ou faailoaina aʻu lava iā i latou i o latou luma, i le aumaia o i latou mai i Aikupito.+
10 Na ou aumaia i latou mai i le atunuu o Aikupito ma avatu i le toafa.+
11 “ʻ“Na ou tuu atu iā i latou aʻu tulafono;+ na ou faailoa atu foʻi iā i latou iʻuga o aʻu faamasinoga,+ ma o le tagata e na te faia ia mea e ola pea o ia e tusa ma nei mea.+
12 Na ou avatu foʻi iā i latou o aʻu sapati+ e fai ma faailoga iā te aʻu ma i latou,+ ina ia latou iloa ai o aʻu o Ieova o lē ua faapaiaina i latou.
13 “ʻ“Peitaʻi o i latou, o le aiga o Isaraelu, na fouvale faasaga mai iā te aʻu i le toafa.+ E leʻi savavali+ i latou e tusa ma aʻu tulafono ma latou teena iʻuga o aʻu faamasinoga,+ ma afai e tausia e le tagata, e ola ai foʻi o ia ona o ia mea.+ Na latou matuā solia oʻu sapati,+ o lea na ou folafola atu ai ou te liligi ifo loʻu ita tele iā i latou i le toafa, ina ia faaumatia ai i latou.+
14 Peitaʻi ou te leʻi faia ona o loʻu igoa neʻi faaleagaina i luma o nuu, i luma foʻi o i latou na ou aumaia ai i latou.+
15 O aʻu, na ou sii foʻi i luga loʻu lima i se tautoga iā i latou i le toafa,+ ina ia aua neʻi oʻu aumaia i latou i le laueleele na ou tuuina atu i ai, lea e tafe ai le suāsusu ma le meli,+ (ua sili ona matagofie i lo o atunuu uma,)+
16 talu ai na latou teena iʻuga o aʻu faamasinoga; e tusa ai foʻi ma aʻu tulafono, latou te leʻi savavali ai, ma na latou solia aʻu sapati, auā na pupū atu o latou loto i a latou tupua inosia.+
17 “ʻ“Peitaʻi na ou vaai ma le alofa iā i latou, o le mea lea na ou lē faaumatiaina+ ai i latou, na ou lē faafanoina foʻi i latou i le toafa.
18 Ona ou fai atu lea i a latou fanau i le toafa,+ ‘Aua tou te savavali i tuutuuga a o outou augātamā,+ aua tou te tausia a latou faamasinoga,+ aua foʻi tou te faaleagaina outou i a latou tupua inosia.+
19 O aʻu o Ieova lo outou Atua.+ Ia savavali e tusa ma aʻu tulafono,+ ia tausia iʻuga o aʻu faamasinoga+ ma faia ia mea.+
20 Ia faapaiaina aʻu sapati,+ ma ia fai ma faailoga iā te aʻu ma outou, ina ia outou iloa ai o aʻu lava o Ieova lo outou Atua.’+
21 “ʻ“Ona fouvale mai lea o le fanau faasaga iā te aʻu.+ E leʻi savavali i latou e tusa ai ma aʻu tulafono, latou te leʻi tausia foʻi iʻuga o aʻu faamasinoga e ala i le faia o nei mea, lea pe afai e tausia e le tagata, e ola ai foʻi o ia ona o ia mea.+ Na latou solia aʻu sapati.+ O lea na ou folafola atu ai ou te sasaa ifo loʻu ita tele iā i latou, ina ia faataunuu ai loʻu ita iā i latou i le toafa.+
22 Peitaʻi na ou taofia loʻu lima+ ma ou lē faia ona o loʻu igoa neʻi faaleagaina i luma o nuu, i luma foʻi o i latou na ou aumaia ai i latou.+
23 Na sii foʻi i luga loʻu lima i se tautoga iā i latou i le toafa,+ ina ia faataapeapeina i latou i nuu ma faasalalauina i latou i atunuu,+
24 talu ai latou te leʻi tausia iʻuga o aʻu faamasinoga;+ na latou teena aʻu tulafono,+ na latou solia foʻi aʻu sapati,+ ma faasaga o latou mata i tupua inosia a o latou augātamā.+
25 O aʻu foʻi na ou tuua pea i latou e mulimuli i tuutuuga lē lelei ma iʻuga o faamasinoga e lē mafai ona latou ola ai pea.+
26 Na ou tuua foʻi i latou ia leaga i a latou meaalofa ina ua latou faaui ane i ulumatua uma i le afi,+ ina ia ou faatafunaina ai i latou, ma latou iloa ai o aʻu lava o Ieova.”’+
27 “O le mea lea, le atalii e o le tagata, ia fai atu i le aiga o Isaraelu ma ia faapea atu iā i latou,+ ‘O le fetalaiga lenei a le Alii Pule Silisili Ese o Ieova: “I lea tulaga, na fai upuleaga ai o outou augātamā iā te aʻu, i lo latou lē faamaoni mai iā te aʻu.+
28 Ona ou avatu lea o i latou i le laueleele+ lea na sii ai i luga loʻu lima i se tautoga e avatu iā i latou.+ Ae ina ua latou vāai i mauga maualuluga+ uma ma laau lauolaola uma, ona latou osi ai lea o a latou taulaga+ i inā, ma avatu a latou taulaga inosia i inā, ma faamū ai i inā a latou mea manogi e faamalieina ai,+ na liligi ai foʻi i inā a latou taulaga i meainu.+
29 Ona ou faapea atu lea iā i latou, ‘O le ā lenei mea maualuga tou te ō atu i ai, lea e taʻua o le Mea Maualuga seʻia oo mai i le asō?’”’+
30 “O lea, ia fai atu i le aiga o Isaraelu, ‘O le fetalaiga lenei a le Alii Pule Silisili Ese o Ieova: “Po ua leaga ea outou e pei ona faia e o outou augātamā,+ ma ua faitaaga ea outou ma a latou mea inosia?+
31 Po ua faaleagaina ai outou i le faamamaluina o a outou tupua inosia, e ala i le avatuina o a outou meaalofa i le faaui ane o a outou fanau i le afi+ seʻia oo mai i le asō?+ Le aiga o Isaraelu e, pe e tou te fesili mai ea iā te aʻu nei?”’+
“‘O loo ola aʻu,’ ua fetalai mai ai le Alii Pule Silisili Ese o Ieova, ‘tou te lē fesili mai lava iā te aʻu.+
32 O le mea foʻi lea ua oso aʻe i lo outou agaga+ e lē mafai ona tupu o lenā mea,+ ma outou faapea ane ai: “Seʻi avea i tatou e pei o isi nuu, e pei o aiga o isi atunuu,+ e auauna atu i laau ma maa.”’”+
33 “‘O loo ola aʻu,’ ua fetalai mai ai le Alii Pule Silisili Ese o Ieova, ‘ou te pule o se tupu iā te outou i le lima malosi, i le lima faaloaloa,+ ma le sasaa atu o loʻu ita tele.+
34 Ou te aumaia outou mai i nuu, ou te faapotopotoina foʻi outou mai i atunuu ua faataapeape i ai outou i le lima malosi, i le lima faaloaloa ma le sasaa atu o le ita tele.+
35 Ou te avatu outou i le toafa o nuu,+ ma tatou faafesagaʻi ai ma faia la tatou faamasinoga.+
36 “‘E pei ona faia la matou faamasinoga ma o outou augātamā i le toafa o Aikupito,+ e faapena foʻi ona faia la tatou faamasinoga,’ ua fetalai mai ai le Alii Pule Silisili Ese o Ieova.
37 ‘Ou te faaui ane foʻi iā te outou i lalo o le tootoo,+ ma aumaia outou i le noataga o le feagaiga.+
38 Ou te aveesea mai iā te outou o ē e fouvale ma ē e solitulafono+ faasaga iā te aʻu, ou te aumaia i latou mai i lo latou nofo aumau o ni tagata ese, ae e latou te lē ō atu i le laueleele o Isaraelu;+ ma o le a outou iloa ai o aʻu lava o Ieova.’+
39 “O outou foʻi, le aiga e o Isaraelu, o le fetalaiga lenei a le Alii Pule Silisili Ese o Ieova, ‘Ia outou ō ma taʻitasi ma auauna i ana lava tupua inosia.+ Ae e mulimuli ane, afai tou te lē fia faalogo mai iā te aʻu, tou te lē toe faaleagaina lava loʻu igoa paia e ala i a outou meaalofa ma a outou tupua inosia.’+
40 “‘Auā i loʻu mauga paia, i le mauga maualuga o Isaraelu,’+ ua fetalai mai ai le Alii Pule Silisili Ese o Ieova, ‘o i inā e auauna mai ai iā te aʻu o le aiga atoa o Isaraelu, o i latou uma i le atunuu.+ O i inā ou te fiafia ai iā i latou, o i inā foʻi ou te tāpā ai a outou foaʻi, ma mea sili ona lelei o a outou taulaga mai i a outou mea paia uma.+
41 Ou te fiafia iā te outou ona o mea manogi e faamalieina ai,+ pe a ou aumaia outou mai i nuu ma aoaoina outou mai i atunuu ua faataapeape i ai outou,+ ma e faapaiaina ai aʻu i luma o nuu ona o outou.’+
42 “‘O le a outou iloa ai o aʻu lava o Ieova,+ pe a ou avatu outou i le laueleele o Isaraelu,+ i le atunuu na sii ai loʻu lima i se tautoga e avatu i o outou augātamā.
43 Ona outou manatua ai lea i inā o outou ala,+ ma a outou mea uma na faia sa faaleagaina ai outou,+ o le a outou ʻinoʻino* foʻi iā te outou lava ona o mea leaga uma na outou faia.+
44 O le a outou iloa ai o aʻu lava o Ieova,+ pe a ou gaoioi faasaga iā te outou ona o loʻu igoa,+ e lē tusa ma a outou ala leaga, po o a outou gaoioiga faapiʻopiʻo,+ le aiga o Isaraelu e,’ ua fetalai mai ai le Alii Pule Silisili Ese o Ieova.”
45 Ua toe oo mai le afioga a Ieova iā te aʻu e faapea:
46 “Le atalii e o le tagata, ia faasaga ou mata+ i le itu i saute ma folafola+ atu le upu i le itu i saute, ma faia valoaga i le vaomatua o le laufanua o le itu i saute.
47 Ia e fai atu i le vaomatua o le itu i saute, ‘Inā faalogo mai ia i le afioga a Ieova. O le fetalaiga lenei a le Alii Pule Silisili Ese o Ieova: “Ou te tutu le afi faasaga iā te oe,+ ma faatamaʻia ai laau mata ma laau mago uma lava ua iā te oe.+ E lē tineia le afi ua mumū,+ e mū ai mata uma mai i le itu i saute e oo atu i le itu i mātū.+
48 Ona iloa ai lea e tagata uma, o aʻu lava o Ieova ua ou tutuina lea mea ina ia lē tineia ai.”’”+
49 Ona ou fai atu lea: “Oi auē, Ieova e le Alii Pule Silisili Ese! Ua latou faapea atu e uiga iā te aʻu, ‘Pe e lē o lana masani ea le faia o faaupuga masani faapea?’”+
Faamatalaga Pito i Lalo
^ I le gagana Eperu, “ʻinoʻino i o latou lava foliga.”
