Esekielu 22:1-31
22 Ua toe oo mai le afioga a Ieova iā te aʻu e faapea:
2 “O oe foʻi le atalii e o le tagata, pe e te faamasino+ ea, pe e te faamasino i le aai+ ua nofosala i le toto ma faailoa atu i ai ana mea inosia uma?+
3 E ao ona e fai atu, ‘O le fetalaiga lenei a le Alii Pule Silisili Ese o Ieova: “Le aai e, ua faamasaa le toto+ i lona lotolotoi seʻia oo i le taimi o lona iʻuga,+ ua ia faia tupua inosia mo ia ina ia lē mamā ai,+
4 ua e nofosala+ i le toto ua e faamasaaina, ua e lē mamā foʻi ona o tupua inosia ua e faia.+ Ua latalata mai lou iʻuga ona o oe, ma e te oo i le iʻuga o ou tausaga. O le mea lea ou te faia ai oe ma luma i nuu ma tauemuga i atunuu uma.+
5 O oe lē e lē mamā i le igoa ma tele le fenuminumiaʻi, o le a tauemu mai iā te oe o atunuu e latalata mai ma atunuu e mamao.+
6 Faauta foʻi! ua iā te oe taʻitaʻi+ o Isaraelu, ua taʻitasi ma lagolago e lona lima le faamasaaina o le toto.+
7 Ua latou ʻinoʻino i tamā ma tinā ua iā te oe.+ Ua latou ave faagaoi mea a tagata ese e aumau i ou lotolotoi.+ Ua latou agaleaga i le tama e leai sona tamā ma le fafine ua oti lana tane ua iā te oe.”’”+
8 “‘Ua e manatu faatauvaa i aʻu mea paia ma ua e solia aʻu sapati.+
9 Ua iai iā te oe o ē e taufaaleaga, ina ia faamasaaina le toto;+ auā ua iā te oe i latou ua aai i taulaga i tupua i luga o mauga.+ Ua latou faia pea amioga matagā i ou lotolotoi.+
10 O ou lotolotoi ua latou faaaliali ai le telenoa o se tamā;+ o ou lotolotoi foʻi ua latou faamāina ai se fafine ua lē mamā ona o lona maʻi masina.+
11 O ou lotolotoi ua faia ai e se tamāloa mea inosia ma le avā a lana uō,+ ma ua faaleagaina e se tamāloa le avā a lona atalii i le faia o amioga matagā ma ia;+ ua faalumaina foʻi e se tamāloa lona tuafafine, o le afafine o lona tamā.+
12 Ua latou taliaina se foaʻi i faiga faaalatua ina ia faamasaaina ai le toto i lou lotolotoi.+ Ua e talia pasene+ ma polofiti mai i nonogatupe,+ ma lou ave faagaoi+ ma le sauā o mea ua e maua ai tupe+ mai i au uō, ma ua e faagaloina+ ai aʻu,’ ua fetalai mai ai le Alii Pule Silisili Ese o Ieova.
13 “‘Faauta foʻi! ua pati oʻu lima+ i au tupe ua maua i auala lē tonu,+ ma au gaoioiga o le faamasaatoto ua faia i lou lotolotoi.+
14 Pe e tumau+ ea lou loto ma malolosi pea ou lima i aso ou te gaoioi ai faasaga iā te oe?+ O aʻu lava o Ieova, ua ou fai atu ai ma ou te faia lava.+
15 O le a ou faataapeapeina oe i nuu ma faasalalauina oe i atunuu,+ ou te faaumatia foʻi lou tulaga lē mamā mai iā te oe.+
16 O oe foʻi o le a e faaleagaina oe i luma o nuu, ma o le a e iloa ai o aʻu lava o Ieova.’”+
17 Ua oo mai foʻi le afioga a Ieova iā te aʻu e faapea:
18 “Le atalii e o le tagata, ua avea le aiga o Isaraelu ma otaota o siliva iā te aʻu.+ O i latou uma o ʻapamemea, o ʻapa, o uʻamea, ma pulu* i totonu o se ogaumu. Ua avea i latou ma otaota o siliva.+
19 “O lea, o le fetalaiga lenei a le Alii Pule Silisili Ese o Ieova, ‘Talu ai ua avea outou uma ma otaota o siliva,+ o le mea lea ou te aoaoina ai outou i totonu o Ierusalema.+
20 E pei ona aoaoina o le siliva, ʻapamemea, uʻamea,+ pulu, ma ʻapa i totonu o le ogaumu ma tapili ai le afi ina ia liusuavai ai ia mea,+ e faapea foʻi ona ou aoaoina outou i loʻu ita ma loʻu ita tele, ma o le a tapili ma faaliusuavai+ ai outou.
21 O le a ou faapotopoto faatasi outou ma tapili iā te outou i le afi o loʻu ita tele,+ ma o le a liusuavai ai outou i lona lotolotoi.+
22 E pei o le faaliusuavaiina o le siliva i totonu o le ogaumu, e faapea foʻi ona faaliusuavaiina outou i lona lotolotoi; ma o le a outou iloa ai o aʻu lava o Ieova, ua ou sasaa ifo loʻu ita tele iā te outou.’”+
23 Ua oo mai foʻi le afioga a Ieova iā te aʻu e faapea:
24 “Le atalii e o le tagata, ia e fai atu iā te ia, ‘O oe o le laueleele ua lē faamamāina, e leʻi totō ifo foʻi i ai le timu i le aso o le faasalaga.+
25 Ua iai le taupulepulega leaga a ona perofeta ua iā te ia,+ e pei o se leona ua tagi leotele ma saeia lana manu ua maua.+ Ua latou faatamaʻia tagata.+ Ua latou aveina pea oloa ma mea tāua.+ Ua faatoʻateleina ona fafine ua oti a latou tane i lona lotolotoi.+
26 Ua solia e ona ositaulaga aʻu tulafono,+ ma latou faaleagaina aʻu mea paia.+ Ua latou lē faaeseeseina le mea paia ma le mea faatauvaa,+ pe faaalia foʻi le eseesega+ o le mea lē mamā ma le mea mamā,+ ua liliuese o latou mata i aʻu sapati,+ ma ua taʻuleagaina ai aʻu i lo latou lotolotoi.+
27 O perenise ua iā te ia, ua pei o ni luko ua saeia ni manu ua maua i le faamasaaina o le toto,+ i le faaumatiaina o tagata ina ia maua ai tupe i auala lē tonu.+
28 Ua valiina e ana perofeta a latou amioga leaga i le vali paʻepaʻe,+ ua vaaia se faaaliga lē moni+ ma faia ni valovaloga pepelo+ mo i latou e faapea: “O le mea lenei ua fetalai mai ai le Alii Pule Silisili Ese o Ieova,” ae e leʻi fetalai mai ai lava Ieova.
29 Ua faia foʻi e tagata o le atunuu faufauga leaga ina ia ave faagaoi+ mea a tagata ma faoa+ faamalosi mea, ua latou agaleaga i lē ua puapuagatia+ ma lē ua mativa, ma ua latou ave faagaoi foʻi mea a le tagata ese e aumau e aunoa ma se faamasinogatonu.’+
30 “‘Ua ou saʻili pea mai iā i latou o se tagata, o lē na te toe atiaʻe le pā maa,+ ma tū i le vaega ua lepetia+ o le pā i oʻu luma mo le atunuu, ina ia ou lē faafanoina ai;+ ae ou te leʻi maua lava se isi.
31 O le mea lea ou te sasaa ifo ai iā i latou aʻu faasalaga.+ O le a ou faaumatiaina i latou i le afi o loʻu ita tele.+ Ou te taui atu iā i latou e tusa ma o latou ala,’+ ua fetalai mai ai le Alii Pule Silisili Ese o Ieova.”
Faamatalaga Pito i Lalo
^ O le uʻamea e vaivai toe faaʻefuʻefu lanu moana, e liusuavaigofie.
