Esekielu 25:1-17
25 Ua toe oo mai le afioga a Ieova iā te aʻu e faapea:
2 “Le atalii e o le tagata, ia faasaga atu ou mata i le fanauga a Amoni, ma faia valoaga e faasagatau iā i latou.+
3 E ao ona e fai atu i le fanauga a Amoni, ‘Inā faalogo mai ia i le afioga a le Alii Pule Silisili Ese o Ieova. O le fetalaiga lenei a le Alii Pule Silisili Ese o Ieova: “Talu ai ua e faapea mai, ua ā la! e faatatau i loʻu malumalu ona ua faaleagaina, ma le eleele o Isaraelu ona ua faatafunaina, faapea foʻi i le aiga o Iuta, ona ua ave faapagota i latou i se isi atunuu,+
4 o lea, ou te tuuina atu ai oe i tagata mai i Sasaʻe e fai mo i latou,+ e latou te faatūina o latou nofoaga e siʻomia i le pā i lou laueleele ma faatū foʻi o latou faleʻie i lou laueleele. E latou te aai i au faaeleeleaga ma latou feinu i lou suāsusu.+
5 O le a ou faia Rapa+ ma fanua e aai ai kamela, ma le laueleele o le fanauga a Amoni e fai ma mea e mālōlō ai lafumanu;+ o le a outou iloa ai o aʻu lava o Ieova.”’”+
6 “O le fetalaiga lenei a le Alii Pule Silisili Ese o Ieova, ‘Talu ai na patipati ou lima+ ma tatū ou vae, na e fiafia pea ma aamu i lou loto e faatatau i le laueleele o Isaraelu,+
7 o lea o aʻu lava; ou te faaloaloa atu loʻu lima faasaga iā te oe,+ o le a ou tuuina atu oe e fai ma mea e faoa e atunuu; o le a ou faaumatia oe mai i tagata ma faafanoina oe mai i atunuu.+ Ou te faaumatia oe+ ma o le a e iloa ai o aʻu lava o Ieova.’
8 “O le fetalaiga lenei a le Alii Pule Silisili Ese o Ieova, ‘Talu ai ua faapea mai Moapi+ ma Seira:+ “Faauta foʻi! E pei le aiga o Iuta o isi nuu uma,”+
9 o lea, ou te faaavanoaina ai mea malifa o Moapi i fili, o ona aai foʻi i ona tuaoi, o aai ia e faamatagofie ai le atunuu, o Petesemota,+ o Paalameona+ e oo atu i Kiriataima.+
10 Ou te tuuina atu i tagata mai i Sasaʻe+ faatasi ma le fanauga a Amoni+ e fai mo i latou, ina ia lē toe manatua+ ai le fanauga a Amoni i nuu.
11 Ou te faaoo atu le faasalaga+ iā Moapi; ona latou iloa ai lea o aʻu lava o Ieova.’+
12 “O le fetalaiga lenei a le Alii Pule Silisili Ese o Ieova, ‘Talu ai ua tauimasui Etoma i le aiga o Iuta, ua latou faia pea mea sesē ma ua latou taui atu iā i latou,+
13 o lea, o le fetalaiga lenei a le Alii Pule Silisili Ese o Ieova: “O le a ou faaloaloa loʻu lima e faasagatau iā Etoma,+ ma faaumatia ai tagata ma manu lalata o iai,+ o le a ou faatafunaina lea nofoaga e amata mai i Timanu+ e oo atu i Titana.+ O le a fasiotia i latou i le pelu.
14 ‘Ou te faaoo atu laʻu tauimasui iā Etoma e ala i le lima o loʻu nuu o Isaraelu;+ ma latou faia iā Etoma e tusa ma loʻu ita ma loʻu ita tele; ma o le a latou iloa ai laʻu tauimasui,’+ ua fetalai mai ai le Alii Pule Silisili Ese o Ieova.”’
15 “O le fetalaiga lenei a le Alii Pule Silisili Ese o Ieova, ‘Talu ai na tauimasui+ tagata o Filisitia, ma ua latou faia pea le tauimasui ma le tauemu i le loto, ina ia faaleagaina+ ai atoa ma le ita umi,+
16 o le mea lea, o le fetalaiga lenei a le Alii Pule Silisili Ese o Ieova: “Ou te faaloaloa atu loʻu lima e faasagatau i tagata Filisitia,+ ou te fasiotia tagata Kereti+ ma faaumatia isi o loo totoe i le talafatai.+
17 O le a ou faaoo iā i latou le tauimasui tele, ma aʻoaʻiga mamafa;+ ma o le a latou iloa ai o aʻu lava o Ieova pe a ou faaoo atu iā i latou laʻu tauimasui.”’”+
