Esekielu 27:1-36
27 Ua oo mai foʻi le afioga a Ieova iā te aʻu e faapea:
2 “O oe foʻi le atalii e o le tagata, ia fatu se pese o le auēga e uiga iā Turo,+
3 e ao ona e fai atu iā Turo,
“‘O oe lenā o loo nofo i le mea e ui atu ai i le sami,+ le fafine faatauʻoa o tagata o motu e tele,+ o le fetalaiga lenei a le Alii Pule Silisili Ese o Ieova: “Turo e, ua e faapea ane, ‘O aʻu ua atoatoa loʻu lalelei.’+
4 Ua iai ou oganuu i le ogatotonu o le sami.+ Ua faaatoatoaina e ou tufuga lou lalelei.+
5 Na latou fausia ou laupapa i laau o le perosi mai i Senira.+ Na latou faia lou fanā mai i le laau o le arasi mai i Lepanona.+
6 Na latou fausia ou foe mai i laau tetelē o Vasana. Na latou faia lou taumua mai i le laupapa o le tasura ua teuteuina i nifo elefane mai i atumotu o Kitimo.+
7 O le ʻie lino lanu eseese mai i Aikupito+ na faia ai lou ʻie telē, ina ia faia ma ou lā. O filo lanu moana+ ma fulufulu mamoe ua vali lanu mūmū violē+ mai i atumotu o Elisa,+ na faia ai lou faapaologa i lou fogāvaa.
8 “ʻ“Na fai tagata o Saitonu+ ma Arati+ ma ou alo vaa. Turo e, na fai ou tagata atamamai+ na iā te oe ma ou ʻauvaa.+
9 Na fai toeaina o Kavali+ ma ona tagata atamamai na iā te oe ma ē na pulutiina ou vaa ina neʻi mama.+ Na iā te oe foʻi o vaa uma o le sami, ma o latou tautai ina ia fefaatauaʻi ai oloa.
10 Na iai i au ʻautau o tagata o Peresia,+ o Luti+ ma tane o Futu+ e fai ma ou fitafita. Na latou tautau talipupuni ma puloutau iā te oe.+ O i latou ia na faamatagofieina oe.
11 O tagata Arati+ ma au ʻautau na iai i latou i luga o ou pā i itu uma, ma na iai foʻi tane totoa i ou ʻolo. Na latou faatautau a latou talita lapotopoto i itu uma o ou pā.+ Na latou faaatoatoaina lou lalelei.
12 “ʻ“O Tasesa+ o lau faatauʻoa lea ona o le anoanoaʻi o oloa tāua eseese.+ Na e avatu au oloa ina ia maua mai ai ana siliva, o uʻamea, o ʻapa ma le pulu.*+
13 O Iavana,+ o Tupalu+ ma Meseko+ o ē na fai a outou fefaatauaʻiga. Na e avatu au oloa ina ia maua ai tagata+ ma mea e faia i le ʻapamemea.
14 Na e avatu au oloa i le aiga o Tokaremo+ ina ia maua mai ai solofanua, o solofanua foʻi mo le taua ma asini.*
15 O atalii o Titana+ o au faipisinisi ia; na tele atumotu na e faafaigaluegaina e fai ma au faatauʻoa; na latou avatu iā te oe ni meaalofa o nifo elefane+ ma laau uliuli tāua.*
16 O Etoma o lau faatauʻoa lea ona o le anoanoaʻi o mea na e faia. Na e avatu au oloa ina ia maua mai ai o nofeka,+ o fulufulu mamoe ua vali lanu mūmū violē, o ʻie sili ona lelei, o maa tāua* ma maa mūmū.*
17 “ʻ“O Iuta ma Isaraelu o au faipisinisi ia.+ Na e avatu au oloa ina ia maua mai ai le saito+ mai i Meniti,+ o meaʻai faapitoa, o meli,+ o suāuu ma le pasama.+
18 “ʻ“O Tamaseko+ o lau faatauʻoa lea i le faia o fefaatauaʻiga o le tele o mea na e faia, ona o le tele foʻi o au oloa tāua eseese uma; na ia aumaia le uaina+ mai i Elepona, ma fulufulu mamoe ʻefuʻefu mūmū.
19 Na aumaia e Vetana ma Iavana mai i Usala a latou oloa ina ia maua ai au oloa. Na e avatu au mea ina ia maua ai uʻamea ua faia ai teuteu, o le kesia*+ ma le tolo.
20 Na e faia fefaatauaʻiga ma Titana+ ina ia maua mai ai ʻie ua lalagaina faapitoa mo nofoa e tuu i luga o manu.
21 O tagata Arapi+ ma taʻitaʻi uma o Kitara+ o tagata faatauʻoa ia na e faafaigaluegaina. Na latou fai fefaatauaʻiga ma oe i tamaʻi mamoe poʻa, o mamoe poʻa ma ʻoti poʻa.+
22 O faatauʻoa o Seepa+ ma Ragama,+ o i latou ia o faatauʻoa iā te oe; na e avatu au oloa ina ia maua mai ai mea manogi eseese e sili ona lelei, o maa tāua eseese uma ma auro.+
23 O Karana,+ o Kane ma Etena,+ o faatauʻoa mai i Seepa,+ o Asura+ ma Kilemata o faatauʻoa ia iā te oe.
24 O i latou na faia fefaatauaʻiga i ou maketi o fefaatauaʻiga o ofu mananaia, o ofu talaloa lanu moana ma lanu eseese, o kapeta e lua lanu, ma maea ua fili mau lelei.
25 “ʻ“Na fai vaa o Tasesa+ ma mea e laʻu ai au oloa mo fefaatauaʻiga, ma na faatamaoaigaina oe ma matuā mamalu lava oe i totonu o le vasaloloa.+
26 “ʻ“Ua avatu oe e i latou e alo vaa i le moana sausau.+ Ua nutililiiina oe e le matagi mai i sasaʻe i totonu o le vasaloloa.+
27 O au mea tāua, o au oloa,+ o au mea mo fefaatauaʻiga,+ o tautai, o lau ʻauvaa,+ o ē e pulutiina ou vaa ina neʻi mama,+ o ē na fefaatauaʻi ma oe a latou oloa, o au ʻautau+ uma o ē o loo iā te oe, ma ou faapotopotoga uma ua i ou lotolotoi, o le a faaumatia i latou i le ogatotonu o le vasa i le aso o lou paʻū.+
28 “ʻ“O le a lūlūina le laufanua taalaelae i le leo o le alalaga o au ʻauvaa.+
29 O i latou uma o ē e alo foe, o tautai, o ʻauvaa uma o le sami, o le a ō ifo i latou mai i o latou vaa; o le a tutū i latou i le laueleele.+
30 O le a latou vāvāō ona o oe ma e latou te fetagisi lava ona o le lototigā.+ E latou te asu aʻe le pefu i o latou ulu.+ E latou te taafili foʻi i le lefulefu.+
31 E sele mamā o latou ulu ma tula ai ona o oe,+ e oofu i ʻie talatala+ ma fetagisi ma le lototigā+ ona o oe ma tagiauē.
32 O lo latou faanoanoa ona o oe, o le a latou fatu ai se pese o le auēga, ma usu e faatatau iā te oe,+
“ʻ“‘O ai ea e pei o Turo,+ e pei o ia o lē ua oo mai lona iʻuga i le ogatotonu o le sami?+
33 Ina ua ave aʻe au oloa+ mai i le vasa,+ na e faamalieina ai le toʻatele o tagata.+ Na tamaoaiga tupu o le lalolagi i le tele o au mea tāua ma au oloa o fefaatauaʻiga.+
34 A o lenei ua nutililiia oe e le vasaloloa, i le loloto o le moana.+ Ua faaumatia au oloa o fefaatauaʻiga ma lau faapotopotoga+ atoa ua iā te oe.
35 O tagata uma e nonofo i atumotu,+ o le a latou sioa iā te oe ma le ofo tele, ma o le a gatete foʻi o latou tupu ona o le mataʻutia o mea.+ O le a foliga popole tagata.+
36 O le a tuufaaili atu iā te oe le ʻaufaatauʻoa mai i nuu.+ O le a puapuagatia oe i mala faafuaseʻi, ma o le a e lē toe iai i aso uma lava.’”’”+
Faamatalaga Pito i Lalo
^ O le uʻamea e vaivai toe faaʻefuʻefu lanu moana, e liusuavaigofie.
^ Po o le “miula,” lea e maua mai i le upu Eperu e faasino atu i le tama a le asini poʻa ma le solofanua fafine.
^ O le laau e uliuli le ogatotonu o le ogālaau. O le upu Peretania o le ebony.
^ Po o “ʻamu.” I le taimi na tusia ai le Tusi Paia, sa iai ni ituaiga o ʻamu e tautele.
^ E taʻua i le faa-Peretania o rubies.
^ O le laau o le kinamoni po o mea e maua mai ai.
