Esekielu 28:1-26
28 Ua oo mai foʻi le afioga a Ieova iā te aʻu e faapea:
2 “Le atalii e o le tagata, ia e fai atu i le taʻitaʻi o Turo, ‘O le fetalaiga lenei a le Alii Pule Silisili Ese o Ieova:
“ʻ“Ua faualuga lou loto,+ ma ua e faapea mai pea, ‘O aʻu o se atua.+ Ua ou nofo i le nofoa+ o le atua i le ogatotonu o le vasaloloa,’+ ae o oe o le tagata+ e lē o se atua,+ ma ua e manatu pea iā te oe o se atua,
3 faauta foʻi! ua sili lou poto nai lo o Tanielu.+ E leai se mealilo e te lē o malamalama i ai.+
4 O lou atamai ma lau faautaga loloto ua e tamaoaiga ai, ua e maua ai pea auro ma siliva i ou fale teuoloa.+
5 Ona o le tele o lou atamai+ ma au fefaatauaʻiga,+ ua tele ai lou tamaoaiga,+ ma ua faualuga ai lou loto ona o lou tamaoaiga.”’+
6 “‘O lea, o le fetalaiga lenei a le Alii Pule Silisili Ese o Ieova: “Talu ai ua e manatu pea iā te oe lava o se atua,+
7 o lea, ou te aumai ai iā te oe o tagata ese,+ o pule sauā mai i nuu,+ ma e latou te tō aʻe lava a latou pelu e faasagatau ai i le matagofie o lou atamai ma faaleagaina ai lou mamalu tele.+
8 O le a latou ave ifo oe i le lua,+ ma e te oti lava e pei o le tagata ua fasiotia i le ogatotonu o le vasaloloa.+
9 Pe e te lē faapea mai ea i luma o lē e fasioti iā te oe,+ ‘O aʻu o le atua,’ ae o oe o le tagata e lē o se atua,+ i lima o i latou e faalumaina oe?”’
10 “‘E te oti i lima o tagata ese+ e pei o le oti o ē e lē peritomeina, auā o aʻu lava ua ou fai atu ai,’ ua fetalai mai ai le Alii Pule Silisili Ese o Ieova.”
11 Ua oo mai foʻi le afioga a Ieova iā te aʻu e faapea:
12 “Le atalii e o le tagata, ia fatu se pese o le auēga e faatatau i le tupu o Turo,+ ma e ao ona e fai atu iā te ia, ‘O le fetalaiga lenei a le Alii Pule Silisili Ese o Ieova:
“ʻ“O oe o le faamaufaailoga o le lelei atoatoa, ua tumu foʻi oe i le atamai+ ma ua atoatoa lou matagofie.+
13 Sa e iai i Etena i le faatoʻaga a le Atua.+ Na ufitia oe i maa tāua o le salikea, o le topasi, o le ialoma; o le tasesa, o le maa soama+ ma le iasepi; o le safaira, o le nofeka+ ma le samaraki; o maa tāua taʻitasi ia na ufitia ai oe na teuteuina i le auro. Na saunia ia mea i le aso na faia ai oe.
14 O oe o le kerupi ua faauuina o lē o loo faamalumalu, ma ua ou tuuina ai oe. Sa e iai i le mauga paia o le Atua.+ Sa e fesavaliaʻi i totonu o maa aasa.
15 Sa lē ponā ou ala mai i le aso na faia+ ai oe seʻia oo ina iloa lau amiolētonu.+
16 “ʻ“Ona o le tele o au fefaatauaʻiga,+ ua faatumuina ai oe i le sauā, ma ua e agasala ai.+ Ou te aveesea oe mai i le mauga o le Atua o sē ua faaleagaina, ou te faaumatia foʻi oe+ mai i totonu o maa aasa, le kerupi e o loo faamalumalu.
17 “ʻ“Ua faualuga lou loto ona o lou aulelei.+ Ua e faaleagaina lou atamai ona o lou mamalu tele.+ Ou te lafoina oe i le eleele.+ Ou te tuuina oe i luma o tupu ina ia latou vaavaai atu iā te oe.+
18 “ʻ“Ona o le tele o au mea sesē,+ ma le lē tonu o au fefaatauaʻiga,+ ua e faaleagaina ai au mea paia. O le a ou aumaia se afi mai i totonu o oe.+ O le mea lenā e faatamaʻia ai oe. Ou te faia oe ma lefulefu i le eleele i luma o i latou o loo vaavaai atu iā te oe.+
19 O i latou uma e iloaina oe mai i nuu, o le a sioa atu iā te oe ma le ofo.+ O le a e puapuagatia i mala faafuaseʻi, o le a e lē toe iai i aso uma lava.”’”+
20 Ua oo mai foʻi le afioga a Ieova iā te aʻu e faapea:
21 “Le atalii e o le tagata, ia faasaga atu ou mata i Saitonu+ ma faia valoaga e faasagatau atu iā te ia.
22 Ia e fai atu, ‘O le fetalaiga lenei a le Alii Pule Silisili Ese o Ieova: “Saitonu e, ou te faasagatau atu iā te oe,+ o le a faamamaluina lava aʻu i ou lotolotoi;+ ma o le a iloa ai e tagata o aʻu lava o Ieova pe a ou faaoo atu le faasalaga+ iā te ia ma faapaia ai aʻu i lona lotolotoi.+
23 Ou te faaoo atu le faamaʻi iā te ia ma o le a iai le faamasaatoto i ona auala.+ E faasaga foʻi le pelu i ona itu uma, e feoti i latou o loo i lona lotolotoi;+ ma o le a iloa ai e tagata o aʻu lava o Ieova.+
24 O le a lē toe iai i le aiga o Isaraelu le alou mai i se mea matuitui+ po o se mea talatala e tigā ai mai iā i latou o siʻomiaina i latou, o ē ua manatu faatauvaa iā i latou; ma o le a iloa ai e tagata o aʻu lava o le Alii Pule Silisili Ese o Ieova.”’
25 “‘O le fetalaiga lenei a le Alii Pule Silisili Ese o Ieova: “Pe a ou faapotopotoina le aiga o Isaraelu mai i nuu na faataapeapeina i ai i latou,+ o le a faapaiaina aʻu ona o i latou i luma o atunuu.+ O le a nonofo i latou i lo latou eleele+ na ou avatu i laʻu auauna o Iakopo.+
26 O le a latou nonofo ma le saogalemu+ ma fau fale+ ma totō togāvine,+ e latou te nonofo ma le saogalemu+ pe a ou faaoo atu le faasalaga iā i latou uma ua manatu faatauvaa iā i latou o ē o loo siʻomiaina i latou;+ ona latou iloa ai lea o aʻu lava o Ieova lo latou Atua.”’”
