Esekielu 32:1-32
32 Ua oo mai foʻi le afioga a Ieova iā te aʻu i le tausaga lona sefulu lua, i le masina lona sefulu lua i le aso muamua o le masina e faapea:
2 “Le atalii e o le tagata, ia e fatu se pese o auēga e faatatau iā Farao le tupu o Aikupito, ma ia e fai atu iā te ia, ‘Ua faatamaʻia oe o lē ua pei o se leona taanoa i nuu.+
“‘Ua pei foʻi oe o le meaola telē i le sami,+ ua e tafe malosi i ou vaitafe, ua e faapalapalā vai i ou vae, ma ua faaleagaina ai o latou vaitafe.’
3 “O le fetalaiga lenei a le Alii Pule Silisili Ese o Ieova, ‘Ou te folasia laʻu upega+ i ou luga e ala i se faapotopotoga o tagata e toʻatele, ma e latou te aveina aʻe oe i laʻu upega.+
4 Ou te tuua oe i le laueleele. Ou te lafoina oe i luga o le fanua taalaelae.+ O le a faanonofo manufelelei uma o le lagi iā te oe, ou te fafaga ia maoona manufeʻai o le lalolagi iā te oe.+
5 Ou te tuuina lou tino i luga o mauga ma faatumu vanu i vaega o lou tino oti.+
6 Ou te faainu le eleele i lou toto ua alu ese mai iā te oe,+ i luga o mauga; o le a tutumu foʻi vaitafe i lou toto.’
7 “‘O le a ou ufitia le lagi ma faapouliuligia fetu pe a ou faafanoina oe. Ou te ufitia le lā i ao, o le a lē susulu foʻi le masina.+
8 O le a ou faapouliuligia malamalama pupula uma o le lagi ona o oe, o le a ou tuuina foʻi le pogisa i lou laueleele,’ ua fetalai mai ai le Alii Pule Silisili Ese o Ieova.
9 “‘O le a ou faaita loto o le toʻatele o tagata pe a ou aveina faapagota nisi o ou tagata i isi atunuu, o atunuu e te leʻi iloa.+
10 Ou te faapogaia le ofo tele o le toʻatele o tagata iā te oe,+ e matuā fefefe lava o latou tupu iā te oe pe a faalālā laʻu pelu i o latou luma,+ e latou te gatete i taimi uma, e taʻitasi i latou ma faia faapea ona o lona lava ola, i le aso o lou paʻū.’+
11 “O le fetalaiga lenei a le Alii Pule Silisili Ese o Ieova, ‘O le a oo mai iā te oe le pelu a le tupu o Papelonia.+
12 Ou te fasiotia ou tagata e toʻatele i le pelu a tagata malolosi, o pule sauā o nuu, o i latou uma;+ o le a faatamaʻia le mitamitaga o Aikupito, ma o le a faaumatia foʻi ona tagata uma e toʻatele.+
13 O le a ou faatamaʻia manu lalata uma mai i autafa o vai,+ o le a lē toe faapalapalā vai i vae o tagata,+ pe e faapalapalā foʻi i vae o manu lalata.’
14 “‘I lenā taimi, o le a ou faamanino o latou vai ma o le a ou faatafe lemū vaitafe e pei o le suāuu,’ ua fetalai mai ai le Alii Pule Silisili Ese o Ieova.
15 “‘Pe a ou faatafunaina le atunuu o Aikupito, ma ua aunoa le atunuu ma mea sa tumu ai,+ pe a ou faaumatia foʻi o ē uma ua nonofo ai, ona latou iloa ai lea o aʻu lava o Ieova.+
16 “‘O le pese lenā o le auēga o le a usuina e tagata. E usu foʻi e tama teine o nuu; e latou te usuina lenā pese e faatatau iā Aikupito ma ona tagata uma e toʻatele,’+ ua fetalai mai ai le Alii Pule Silisili Ese o Ieova.”
17 Ua oo mai foʻi le afioga a Ieova iā te aʻu i le tausaga lona sefulu lua, i le aso lona sefulu lima o le masina e faapea:
18 “Le atalii e o le tagata, ia e auē ona o tagata e toʻatele o Aikupito ma folafola atu le lafoina+ o ia ma tama teine o nuu mamalu, i le mea i lalo ifo o le eleele,+ faatasi ma ē e ō ifo i le lua.+
19 “‘Ua sili ea oe iā te ai i le matagofie?+ Ia e alu ifo i lalo, ma ia e taatia faatasi ma ē ua lē peritomeina!’+
20 “‘O le a paʻuʻū i latou faatasi ma ē ua fasiotia i le pelu.+ Ua tuuina atu o ia i le pelu. Ia outou fetoso ese o ia ma ona tagata uma e toʻatele.
21 “‘O ē e taulamua o ē e malolosi o le a tautatala mai i totonu o le Tuugamau* iā te ia, atoa foʻi ma ona fesoasoani.+ O le a latou ō ifo i lalo;+ e taooto i latou ua fasiotia i le pelu o ni ē e leʻi peritomeina.
22 O i inā ua iai Asuria ma lana faapotopotoga uma.+ Ua siʻomia o ia i ona tuugamau. Ua fasiotia i latou uma, o ē ua fasiotia i le pelu.+
23 Auā ua tuuina ona tuugamau i vaega pito i totonu o se lua,+ ua siʻomia e lana faapotopotoga lona tuugamau, o i latou uma ua fasiotia o ē ua oti i le pelu, auā na latou faatupuina le mataʻu tele i ē o loo feola.
24 “‘O i inā ua iai Elama+ ma ona tagata e toʻatele ua siʻomia ai lona tuugamau, o i latou uma ua fasiotia o ē ua oti i le pelu, o ē ua ō ifo i le mea i lalo ifo o le eleele e leʻi peritomeina, o ē na faatupuina le mataʻu tele i ē o loo feola; ua oo foʻi iā i latou lo latou faalumaina faatasi ma ē e ō ifo i le lua.+
25 Ua latou faia se moega+ mo ia faatasi ma ē ua fasiotia i totonu o ona tagata uma e toʻatele. Ua siʻomia o ia e ona tuugamau. O i latou uma ua fasiotia i le pelu e leʻi peritomeina,+ auā na latou faatupuina le mataʻu tele i ē o loo feola i le laueleele; ua oo foʻi iā i latou lo latou faalumaina faatasi ma ē e ō ifo i le lua. E tuuina o ia i totonu o ē ua fasiotia.
26 “‘O i inā ua iai Meseko+ ma Tupalu+ ma ona tagata e toʻatele. Ua siʻomia o ia e ona tuugamau. O i latou uma ua tuia i le pelu, e leʻi peritomeina, auā na latou faatupuina le mataʻu tele i ē o loo feola.
27 Pe e latou te lē o taooto+ ea ma ē e malolosi ua paʻuʻū mai i ē e leʻi peritomeina, o ē ua ō ifo i le Tuugamau faatasi ma a latou auupega o le taua? O le a latou tuu a latou pelu i lalo o o latou ulu, ma o le a iai a latou mea sesē i luga o o latou ivi,+ auā na faatupuina e tagata malolosi le mataʻu tele i ē o loo feola.+
28 A o oe, o le a gausia oe i totonu o ē e leʻi peritomeina, o le a e taoto foʻi faatasi ma ē ua fasiotia i le pelu.
29 “‘O i inā ua iai Etoma,+ o ona tupu ma ona taʻitaʻi o ē a o malolosi, na tuu faatasi ma ē na fasiotia i le pelu;+ o le a latou taooto faatasi ma ē e leʻi peritomeina+ ma i latou e ō ifo i le lua.
30 “‘O i inā ua iai alo alii o le itu i mātū, o i latou uma lava, faatasi ma tagata Saitonu uma,+ o ē na ō ifo ma le māsiasi faatasi ma ē ua fasiotia, e ui i le mataʻu na latou faatupuina ona o lo latou malosi. E latou te taooto e lē peritomeina faatasi ma ē ua fasiotia i le pelu, ua oo foʻi iā i latou lo latou faalumaina faatasi ma ē e ō ifo i le lua.+
31 “‘O i latou ia o le a vaai i ai Farao, ma o le a faamāfanafanaina o ia ona o ona tagata uma e toʻatele.+ O le a fasiotia Farao ma ana ʻautau uma i le pelu,’ ua fetalai mai ai le Alii Pule Silisili Ese o Ieova.
32 “‘Talu ai na ia faatupuina le mataʻu tele i ē o loo feola i le laueleele,+ e ao la ona faataatia o ia faatasi ma ē e leʻi peritomeina, o ē ua fasiotia i le pelu, e oo foʻi iā Farao ma ona tagata e toʻatele,’ ua fetalai mai ai le Alii Pule Silisili Ese o Ieova.”
Faamatalaga Pito i Lalo
^ Tagaʻi i le Faaopoopoga e 6.
